ជំនន់ទឹកភ្លៀង បន្តវាយប្រហារស្រូវកសិករជាង ៦ពាន់ហិកតា ក្នុងភូមិចំនួន១៧៦ នៃស្រុក-ក្រុងចំនួន៨ ក្នុងខេត្តកំពង់ធំ

ភ្នំពេញ៖ ជំនន់ទឹកភ្លៀងរដូវវស្សានៅតែបន្តវាយប្រហារស្រូវរបស់ប្រជាកសិករ ៤ ៨៤១គ្រួសារ ក្នុងភូមិចំនួន១៧៦ នៃស្រុក-ក្រុងចំនួន៨ ក្នុងខេត្តកំពង់ធំ ខណៈស្រូវមួយចំនួនធំរបស់កសិករដែលរងផលប៉ះពាល់នេះ ភាគច្រើនស្ថិតក្នុងអាយុកាល ដាក់ម្សៅ និងទុំស្លាបសេក។

លោក ប៉ែន វណ្ណរិទ្ធ ប្រធានមន្ទីរកសិកម្ម រុក្ខាប្រមាញ់ និងនេសាទ បង្ហាញរបាយការណ៍ថា ជំនន់ទឹកភ្លៀងបានប៉ះពាល់លិចដំណាំស្រូវប្រជាកសិករចំនួន៨ ក្រុង-ស្រុក រួមមាន៖ ស្រុកកំពង់ស្វាយ, ក្រុងស្ទឹងសែន, ប្រាសាទសំបូរ, សណ្តាន់, បារាយណ៍, សន្ទុក, ស្រុកស្ទោង និងតាំងគោក គិតត្រឹមថ្ងៃទី៥ សីហា។ ក្នុងនោះផ្ទៃដីប៉ះពាល់មានចំនួន ៦៨០៦ហិកតា ស្ថិតនៅក្នុងឃុំចំនួន៣៦។ រីឯដំណាំស្រូវដែលខូចខាតទាំងស្រុងមានចំនួន ៣ ២៧៤ហិកតា របស់ប្រជាកសិករ ២ ៤២៩គ្រួសារ។ គិតជាភាគរយ ផ្ទៃដីប៉ះពាល់សរុបនេះស្មើនឹង ៣,៣៣ភាគរយ រីឯការខូចខាត ស្មើនឹង ១,៦០ភាគរយ បើធៀបនឹងផ្ទៃដីដាំដុះអនុវត្តក្នុងខេត្ត។

ចំពោះស្ថានភាពកម្រិតកម្ពស់ទឹកស្ទឹងសែនមានកម្ពស់ ១៣,៩៤ម៉ែត្រ ធៀបម្សិលមិញទឹកនៅតែបន្តកើនឡើង ខណៈមន្ទីរធនធានទឹក និងឧតុនិយមខេត្តក៏បានព្យាករនៅថ្ងៃទី៦ សីហានេះថា រយៈពេល៣ថ្ងៃខាងមុខទឹកនៅបន្តកើនឡើងបន្ថែមទៀតដូច្នេះមន្ទីរអំពាវនាវដល់ពលរដ្ឋបង្កើនការប្រុងប្រយ័ត្ន។ គួរជម្រាបថា ការងារបង្កបង្កើនផលក្នុងខេត្តកំពង់ធំ ក្នុងឆ្នាំ២០២៤ នេះ សម្រេចបានលើផ្ទៃដីចំនួន១៩៨០៥៣ហិកតា ស្មើនឹង៩២,៨៥ភាគរយ នៃផែនការ២១៣៣០០ហិកតា ខ្ពស់ជាងឆ្នាំមុន១២៧៩ហិកតា៕