ឯកឧត្តមកិត្តិនីតិកោសលបណ្ឌិត អុឹម ឈុនលឹម អញ្ជេីញដឹកនាំគណៈប្រតិភូចូលរួមសន្និសីទអន្តរជាតិនៃតុលាការធម្មនុញ្ញ សហព័ន្ធរុស្ស៊ី

ភ្នំពេញ៖ នៅល្ងាចថ្ងៃទី២៤ ខែមិថុនា ឆ្នាំ២០២៤ ឯកឧត្តមកិត្តិនីតិកោសលបណ្ឌិត អុឹម ឈុនលឹម ប្រធានក្រុមប្រឹក្សាធម្មនុញ្ញ នៃព្រះរាជាណាចក្រកម្ពុជា បានដឹកនាំគណៈប្រតិភូ អញ្ជើញចូលរួមសន្និសីទអន្តរជាតិនៃតុលាការធម្មនុញ្ញ សហព័ន្ធរុស្ស៊ី ក្រោមប្រធានបទ “ការការពារសិទ្ធិ និងការពិនិត្យធម្មនុញ្ញភាព” ដែលនឹងប្រព្រឹត្តទៅ នាទីក្រុង St. Petersburg ចាប់ពីថ្ងៃទី២៦ ដល់ថ្ងៃទី២៨ ខែមិថុនា ឆ្នាំ២០២៤។ ដំណើរអញ្ជើញនេះ គឺ ឆ្លើយតបតាមការអញ្ជើញរបស់ឯកឧត្តម Valery D.Zorkin ប្រធានតុលាការធម្មនុញ្ញសហព័ន្ធរុស្ស៊ី កាល ពីថ្ងៃទី១៤ ខែមីនា ឆ្នាំ២០២៤។

យោងតាមការអោយដឹងពី​ឯកឧត្តម​ តាំង​ រតនា​ អគ្គលេខាធិការ​ នៃអគ្គលេខាធិការដ្ឋានក្រុមប្រឹក្សាធម្មនុញ្ញ​ បានឲ្យដឹងថា​ នៅក្នុងសន្និសីទអន្តរជាតិខាងលើនេះ ឯកឧត្តមកិត្តិនីតិកោសលបណ្ឌិត​ ប្រធានក្រុមប្រឹក្សាធម្មនុញ្ញ​ នឹងអញ្ជេីញថ្លែង បទអន្តរាគមន៍ពិសេសចែករំលែកអំពីសមត្ថកិច្ចនិង ពិសោធន៍របស់ក្រុមប្រឹក្សាធម្មនុញ្ញ ក្នុងការលើក កម្ពស់និងការការពារសិទ្ធិ និងសេរីភាពររបស់ប្រជាពលរដ្ឋដែលមានចែងក្នុងរដ្ឋធម្មនុញ្ញ ក្នុងក្របខណ្ឌនៃ ការពិនិត្យធម្មនុញ្ញភាពនៃច្បាប់ ដោយផ្អែកលើរដ្ឋធម្មនុញ្ញរបស់កម្ពុជា។

ក្នុងនោះផងដែរ ឯកឧត្តមកិត្តិនីតិកោសលបណ្ឌិត ក៏នឹងលើកឡើងនូវករណីមួយចំនួនដែលក្រុមប្រឹក្សាធម្មនុញ្ញកម្ពុជា បានដោះស្រាយមានជាអាទិ៍៖ (១)ការការពារពលរដ្ឋខ្មែរពីការចាប់បញ្ជូនខ្លួនទៅឱ្យប្រទេសក្រៅ, (២)ការការពារនិងលើកស្ទួយសមភាពយេនឌ័រ និង(៣) ការការពារសិទ្ធិរស់រានមានជីវិត ដែលសុទ្ធតែជាការចូលរួមចំណែកក្នុងការការពារ និងលើកកម្ពស់សិទ្ធិជាមូលដ្ឋានរបស់ប្រជាពលរដ្ឋ។

សូមបញ្ជាក់ជូនផងដែរថា សន្និសីទអន្តរជាតិប្រចាំឆ្នាំរបស់តុលាការធម្មនុញ្ញនៃសហព័ន្ធរុស្ស៊ី ត្រូវបានចាត់ទុកជាវេទិកាមួយដ៏មានសារសំខាន់ ក្នុងការជំរុញឱ្យមាននូវកិច្ចពិភាក្សាចម្រុះទាក់ទងនឹង រដ្ឋធម្មនុញ្ញ ជាពិសេសយន្តការនៃការការពារសិទ្ធិ និងសេរីភាព ស្របតាមរដ្ឋធម្មនុញ្ញជាធរមានរបស់ ប្រទេសនីមួយៗ ហើយសន្និសីទអន្តរជាតិនេះ តែងតែប្រារព្ធធ្វើឡើងជារៀងរាល់ឆ្នាំនៅខែមិថុនា នាទីក្រុង St. Petersburg នៃសហព័ន្ធរុស្ស៊ី ៕