គណៈប្រតិភូគណៈកម្មការទី៨ នៃរដ្ឋសភា ចុះពិនិត្យសេវាសុខាភិបាលនៅមណ្ឌលសុខភាពតាកឹង ក្នុងស្រុកគូលែន ខេត្តព្រះវិហារ

ភ្នំពេញ៖ នាព្រឹកថ្ងៃទី១០ ខែមិថុនា ឆ្នាំ២០២៤ គណៈប្រតិភូគណៈកម្មការសុខាភិបាល សង្គមកិច្ច អតីតយុទ្ធជន យុវនីតិសម្បទា ការងារ បណ្តុះបណ្តាលវិជ្ជាជីវៈ និងកិច្ចការនារី នៃរដ្ឋសភា (គណៈកម្មការទី៨) ដឹកនាំដោយ​លោកជំទាវ ឡោក ខេង ប្រធានគណៈកម្មការ បានអញ្ជើញចុះពិនិត្យ និងស្វែងយល់ពីការផ្តល់សេវាសុខាភិបាលនៅមណ្ឌលសុខភាពតាកឹង ក្នុងស្រុកគូលែន ខេត្តព្រះវិហារ។

លោក ទិត សីហា ប្រធានមណ្ឌលសុខភាពបានមានប្រសាសន៍ថា មណ្ឌលសុខភាពតាកឹង បានផ្តល់សេវាសុខាភិបាលជូនប្រជាជនចំនួន ៧,៩៩២នាក់ មកពីឃុំថ្មី និងឃុំព្រីង និងភូមិចំនួន៨ ដែលមានបុគ្គលិកចំនួន ១០នាក់ ឆ្មប ចំនួន០៦នាក់ គិលានុបដ្ឋាកចំនួន ០៤នាក់ និងគ្មានវេជ្ជបណ្ឌិត។ បច្ចុប្បន្ននេះ​ មណ្ឌលសុខភាពបានជំរុញឱ្យមន្រ្តីពេទ្យទាំងអស់ ត្រូវតែពង្រឹងសមត្ថភាពចំណេះដឹងបន្ថែមទៀតឱ្យស្របតាមគ្រឿងបរិក្ខារពេទ្យទំនើប និងចូលរួមផ្សព្វផ្សាយទប់ស្កាត់ជំងឺផ្សេងៗទាន់ពេលវេលា ជាពិសេសជំងឺមិនឆ្លង និងខិតខំផ្តល់នូវសេវាសុខាភិបាលជូនដល់ប្រជាពលរដ្ឋឱ្យបានល្អប្រសើរ។ ដោយឡែកប្រជាពលរដ្ឋភាគច្រើនគឺពួកគាត់មកទទួលសេវាសុខាភិបាលដោយការប្រើប្រាស់ប័ណ្ណក្រីក្រ ប័ណ្ណសមធម៌ និងប័ណ្ណប.ស.ស និងមានប្រជាពលរដ្ឋមួយចំនួនតូចមកទទួលសេវាសុខាភិបាលដោយបង់ថវិកាផ្ទាល់ខ្លួន ដោយក្នុង១ខែ មានប្រជាពលរដ្ឋចំនួន ៥០០នាក់ មកទទួលសេវាពិនិត្យព្យាបាលជំងឺ និងមកសម្រាកចំនួន៣០នាក់​ ព្រមទាំងបានមកពិនិត្យ និងទទួលសេវាព្យាបាលជំងឺមិនឆ្លង ពិសេសជំងឺទឹកនោមផ្អែម និងជំងឺលើសសម្ពាធឈាមប្រហែល១០%។ ជាមួយគ្នានេះដែរ​ មណ្ឌលសុខភាពក៏ជួបបញ្ហាប្រឈមមួយចំនួនដូចជាកង្វះខាតម៉ាស៊ីនហ្វូតូកូពី កុំព្យូទ័រ និងសម្ភារៈបរិក្ខារមួយចំនួនផងដែរ។

លោកជំទាវ ឡោក ខេង បានថ្លែងអំណរគុណ និងផ្តល់អនុសាសន៍ជាច្រើនដល់មណ្ឌលសុខភាព ព្រមទាំងបង្ហាញពីយុទ្ធសាស្ត្រក្នុងពេលចុះផ្សព្វផ្សាយអំពីគោលនយោបាយភូមិឃុំមានសុវត្ថិភាព ប្រធានមណ្ឌលសុខភាពអាចធ្វើការផ្សព្វផ្សាយពីបញ្ហាជំងឺមិនឆ្លង និងមានរូបភាពស្តីពីផលប៉ះពាល់នៃជំងឺនេះបង្ហាញជូនប្រជាពលរដ្ឋបន្ថែម។

លោកជំទាវក៏បានជំរុញឱ្យប្រធានមណ្ឌលសុខភាពជួយផ្សព្វផ្សាយលើការបណ្តុះបណ្តាលជំនាញជូនប្រជាពលរដ្ឋក្រីក្រ ជាពិសេសយុវជនងាយរងហានិភ័យឱ្យមកទទួលការបណ្តុះបណ្តាលនៅសាលាពហុបច្ចេកទេសក្នុងខេត្ត ដែលជាយុទ្ធសាស្ត្ររបស់​ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា​ និងស្របតាមកម្មវិធីនយោបាយយុទ្ធសាស្រ្តបញ្ចកោណតំណាក់កាលទី១ ដើម្បីបង្កើនជីវភាពរស់នៅរបស់បងប្អូនឱ្យមានភាពល្អប្រសើរថែមទៀត។

លោកជំទាវក៏បានអំពាវនាវឱ្យអាជ្ញាធរពាក់ព័ន្ធទាំងអស់ត្រូវខិតខំធ្វើការផ្សព្វផ្សាយពន្យល់ឱ្យបងប្អូនប្រជាពលរដ្ឋយល់ពីយន្តការក្នុងការចូលជាសមាជិកប.ស.ស ដែលមានភាពងាយស្រួលក្នុងការទទួលបានសេវាពិនិត្យសុខភាព និងព្យាបាលជំងឺដោយឥតគិតថ្លៃ ៕