ឯកឧត្ដម ស្វាយ សំអ៊ាង ដាក់បទបញ្ជាឲ្យគណៈបញ្ជាការឯកភាពក្រុង ស្រុក មន្ទីរពាក់ព័ន្ធ និងកងកម្លាំងប្រដាប់អាវុធ ត្រូវការពារសន្តិសុខ សណ្តាប់ធ្នាប់ សុវត្ថិភាពជូនពលរដ្ឋ
ភ្នំពេញ៖ ឯកឧត្តម ស្វាយ សំអ៊ាង អភិបាលខេត្តស្ទឹងត្រែង និងជាប្រធានគណៈបញ្ជាការឯកភាពរដ្ឋបាលខេត្ត បានដាក់បទបញ្ជាទៅដល់គណៈបញ្ជាការឯកភាពក្រុង ស្រុក មន្ទីរពាក់ព័ន្ធ និងកងកម្លាំងប្រដាប់អាវុធទាំង៣ ត្រូវការពារសន្តិសុខ សណ្តាប់ធ្នាប់ សុវត្ថិភាពសង្គមជូនប្រជាពលរដ្ឋ ហើយធ្វើយ៉ាងណាដើម្បីឲ្យប្រជាពលរដ្ឋនៅតាមមូលដ្ឋានក្នុងខេត្តរបស់យើងរស់នៅប្រកបដោយសុខដុមរមនា។
ក្នុងឱកាសអញ្ជើញដឹកនាំកិច្ចប្រជុំស្ដីពីការពង្រឹងការគ្រប់គ្រងសណ្ដាប់ធ្នាប់សាធារណៈ និងក្មេងទំនើង នាថ្ងៃទី៥ មិថុនានេះ ឯកឧត្ដម ស្វាយ សំអ៊ាង បានថ្លែងថា ក្នុងនាមគណៈបញ្ជាការឯកភាពរដ្ឋបាលខេត្ត សូមថ្លែងអំណរគុណដល់អស់លោកនូវក្នុងជួរបញ្ជាការឯកភាពរដ្ឋបាលខេត្ត ក៏ដូចជាអង្គភាពជំនាញក្នុងក្រមខ័ណ្ឌគណៈបញ្ជាការឯកភាពក្រុង ស្រុក ដែលបានចូលរួមកិច្ចប្រជុំដើម្បីត្រួតពិនិត្យទៅលើការអនុវត្តបទបញ្ជារបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ដែលបទបញ្ជានេះសម្តេចបានដាក់ចេញដោយផ្ទាល់គឺនៅថ្ងៃទី២៣ ខែឧសភា ឆ្នាំ២០២៤ កន្លងមក។
ឯកឧត្ដមមានប្រសាសន៍បន្តថា ក្នុងនោះគណៈបញ្ជាការឯកភាពរដ្ឋបាលខេត្ត ក៏បានប្រជុំ និងចេញសេចក្តីណែនាំទៅដល់កងកម្លាំងប្រដាប់អាវុធទាំង៣ ដើម្បីឆ្លើយតបទៅនឹងគណៈបញ្ជាការឯកភាពក្រុង ស្រុក ក៏ដូចជាមន្ទីរ និងអង្គភាពពាក់ព័ន្ធ ដើម្បីដាក់ចេញនូវវិធានការទប់ស្កាត់ បង្ក្រាបសកម្មភាពដែលបង្កឡើងដោយភាពអសន្តិសុខ ជាពិសេសក្រុមក្មេងទំនើង។
ឯកឧត្តម ស្វាយ សំអ៊ាង ប្រធានគណៈបញ្ជាការឯកភាពរដ្ឋបាលខេត្ត បានលើកឡើងថា បើផ្អែកតាមបទបញ្ជា រួមទាំងកិច្ចប្រជុំរបស់គណៈបញ្ជាការឯកភាពរដ្ឋបាលខេត្ត ហើយក៏ផ្អែកទៅលើសេចក្តីណែនាំនេះ គឺមានរយៈពេល១៤ថ្ងៃហើយ នៃប្រតិបត្តិការរបស់យើង ក្នុងការចាត់វិធានការបង្រ្កាបទប់ស្កាត់នូវបញ្ហាក្មេងទំនើងដែលបង្កភាពអុកឡុកប៉ះពាល់សន្តិសុខសណ្តាប់ធ្នាប់ សុវត្ថិភាពសង្គម សម្រាប់ប្រជាពលរដ្ឋ។
ពាក់ព័ន្ធទៅនឹងបទបញ្ជា ក៏ដូចជាវិធានការនេះ ឯកឧត្តម ស្វាយ សំអ៊ាង បានដាក់បទបញ្ជាទៅដល់គណៈបញ្ជាការឯកភាពក្រុង ស្រុក មន្ទីរពាក់ព័ន្ធ និងកងកម្លាំងប្រដាប់អាវុធទាំង៣ ត្រូវការពារសន្តិសុខ សណ្តាប់ធ្នាប់ សុវត្ថិភាពសង្គមជូនប្រជាពលរដ្ឋ ហើយធ្វើយ៉ាងណាដើម្បីឲ្យប្រជាពលរដ្ឋនៅតាមមូលដ្ឋានក្នុងខេត្តរបស់យើងរស់នៅប្រកបដោយសុខដុមរមនា។
ទន្ទឹមនឹងការអនុវត្តបទបញ្ជា ក៏ដូចជាសេចក្តីណែនាំនេះ ឯកឧត្តម ស្វាយ សំអ៊ាង បានបញ្ជាក់ថា រាជរដ្ឋាភិបាលក៏បានដាក់ចេញនូវការជំរុញអនុវត្តគោលនយោបាយ “ភូមិ ឃុំ សង្កាត់ មានសុវត្ថិភាព” ដែលដាក់ចេញដោយរដ្ឋាភិបាលតាំងពីអាណត្តិមុនៗមក ជាពិសេសអាណត្តិទី៥ ទី៦ ក្រោមការដឹកនាំប្រកបដោយកិត្តិបណ្ឌិតរបស់សម្តេចអគ្គមហាសេនាបតីតេជោ ហ៊ុន សែន អតីតនាយករដ្ឋមន្ត្រី នៃព្រះរាជាណាចក្រកម្ពុជា កន្លងមក ក៏បានដាក់ចេញផែនការអនុវត្តគោលនយោបាយ “ភូមិ ឃុំ សង្កាត់ មានសុវត្ថិភាព” ហើយក៏ស្របទៅនឹងវិធានការផែនការ ដែលដាក់ចេញដោយសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា នីតិកាលទី៧ នៃរដ្ឋសភា ដើម្បីជំរុញការអនុវត្តនូវគោលនយោបាយនេះ ធានាឲ្យបាននូវសន្តិសុខសណ្តាប់ធ្នាប់ សុវត្ថិភាពសង្គម ហើយយើងត្រូវយ៉ាងណាការពារឲ្យប្រជាពលរដ្ឋមានភាពជឿជាក់មកលើរដ្ឋអំណាច ក៏ដូចជាសមត្ថកិច្ចយើង ដែលមានតួនាទីភារកិច្ចការពារសន្តិសុខ សណ្តាប់ធ្នាប់ សុវត្ថិភាពសង្គមជូនប្រជាពលរដ្ឋ ៕
