មន្ត្រីជាន់ខ្ពស់ក្រសួងមហាផ្ទៃ ណែនាំ និងផ្ដាំផ្ញើការងារជាអាទិភាពមួយចំនួន ក្នុងពិធីបិទកិច្ចប្រជុំផ្សព្វផ្សាយលិខិតបទដ្ឋាន និងកិច្ចការនានាសម្រាប់ត្រៀមចូលកាន់តំណែងរបស់ក្រុមប្រឹក្សារាជធានី ខេត្ត ក្រុង ស្រុក ខណ្ឌ អាណត្តិទី៤
ភ្នំពេញ៖ ឯកឧត្តម ប្រាក់ សំអឿន រដ្ឋលេខាធិការក្រសួងមហាផ្ទៃ នាថ្ងៃទី២៧ ខែឧសភា ឆ្នាំ២០២៤នេះ បានអញ្ជើញជាអធិបតីបិទកិច្ចប្រជុំ ផ្សព្វផ្សាយលិខិតបទដ្ឋាន និងគោលការណ៍ណែនាំនានា សម្រាប់ត្រៀមរៀបចំកិច្ចប្រជុំចូលកាន់តំណែង របស់ក្រុមប្រឹក្សារាជធានី ក្រុមប្រឹក្សាខេត្ត ក្រុមប្រឹក្សាក្រុង ក្រុមប្រឹក្សាស្រុក
ក្រុមប្រឹក្សាខណ្ឌ អាណត្តិទី៤ ។
ដោយឈរលើមូលដ្ឋាននៃភាពជោគជ័យដែលប្រទេសយើងបានរៀបចំព្រឹត្តិការណ៍បោះឆ្នោតជាអសកល ពោលគឺការបោះឆ្នោតជ្រើសរើសក្រុមប្រឹក្សារាជធានី ខេត្ត ក្រុង ស្រុក ខណ្ឌ អាណត្តិទី៤ បានបិទបញ្ចប់រួចរាល់យ៉ាងត្រចះត្រចង់នេះ ក្នុងនាមក្រសួងមហាផ្ទៃ ដែលជាស្ថាប័នមានសមត្ថកិច្ច ក្នុងការទទួលរៀបចំកិច្ចការផ្សេងៗគាំទ្រដល់ការប្រកាសចូលកាន់តំណែងរបស់ក្រុមប្រឹក្សាដែលនឹងទទួលបានការជាប់ឆ្នោតអាណត្តិទី៤ នាពេលខាងមុខនេះ ឱ្យបានត្រឹមត្រូវ និងទាន់ពេលវេលាស្របតាមច្បាប់រៀបចំអង្គការដែលបានកំណត់ជាធរមាន ឯកឧត្ដម ប្រាក់ សំអឿន ក៏បានយកឱកាសនៃពិធីបិទកិច្ចប្រជុំនេះ ធ្វើការគូសបញ្ជាក់ ណែនាំ និងផ្ដាំផ្ញើការងារជាអាទិភាពមួយចំនួន ដូចតទៅ៖
ទីមួយ. ផ្អែកតាមមាត្រា ៦២ នៃច្បាប់ស្ដីពីការគ្រប់គ្រងរដ្ឋបាលរាជធានី ខេត្ត ក្រុង ស្រុក ខណ្ឌ បានកំណត់ថា កិច្ចប្រជុំចូលកាន់តំណែងរបស់ក្រុមប្រឹក្សាជាប់ឆ្នោតអាណត្តិថ្មី ត្រូវធ្វើឡើងក្នុងរយៈពេលមិនលើសពី១៤ថ្ងៃ បន្ទាប់ពីថ្ងៃគ.ជ.ប ប្រកាសជាផ្លូវការនូវលទ្ធផលបោះឆ្នោត ដែលប្រតិទិនសម្រាប់ការប្រកាសលទ្ធផលជាផ្លូវការនៃការបោះឆ្នោតជ្រើសរើសក្រុមប្រឹក្សាអាណត្តិទី៤នេះ នឹងប្រកាសនៅថ្ងៃទី៨ ខែមិថុនា ឆ្នាំ២០២៤ខាងមុខនេះ។ ហេតុនេះសូមស្នើដល់អគ្គនាយកដ្ឋានរដ្ឋបាល ដែលជាសេនាធិការជូនរដ្ឋមន្រ្តីក្រសួងមហាផ្ទៃ នៅក្នុងការសម្របសម្រួលរៀបចំពិធីប្រកាសចូលកាន់តំណែងក្រុមប្រឹក្សា នៃរដ្ឋបាលថ្នាក់ក្រោមជាតិ បន្តការខិតខំប្រឹងប្រែង ពន្លឿនការរៀបចំសេចក្ដីព្រាងព្រះរាជក្រឹត្យ និងអនុក្រឹត្យ ស្ដីពីការទទួលស្គាល់សមាសភាពក្រុមប្រឹក្សាដែលជាប់ឆ្នោត ឱ្យបានឆាប់រហ័ស ត្រឹមត្រូវ ច្បាស់លាស់ និងគ្រប់ជ្រុងជ្រោយ ទាំងទៅលើទម្រង់ ខ្លឹមសារ និងអក្ខរាវិរុទ្ធ។
ទីពីរ. ព្រមជាមួយគ្នានេះ អគ្គនាយកដ្ឋានរដ្ឋបាល ត្រូវរៀបចំចាត់តាំងក្រុមការងារមន្រ្តីជំនាញពាក់ព័ន្ធ ចុះទៅចូលរួមសហការ និងសម្របសម្រួលរៀបចំធ្វើពិធីប្រកាសចូលកាន់តំណែងក្រុមប្រឹក្សារាជធានី ខេត្ត ដែលជាប់ឆ្នោតអាណត្តិថ្មី នៅតាមរដ្ឋបាលរាជធានី ខេត្ត ឱ្យមានប្រសិទ្ធភាព ស្របតាមគោលការណ៍ បែបបទ និងនីតិវិធីដែលបានកំណត់។
ទីបី. ទន្ទឹមនឹងការងាររៀបចំពិធីប្រកាសនេះ ខ្ញុំក៏សូមស្នើដល់រដ្ឋបាលរាជធានី ខេត្ត នីមួយៗ ផ្ដល់កិច្ចសហការឱ្យបានជិតស្និត ប្រកបដោយស្មារតីទទួលខុសត្រូវខ្ពស់ ជាមួយក្រុមការងារនៃអគ្គនាយកដ្ឋានរដ្ឋបាលក្រសួងមហាផ្ទៃ ដែលនឹងចុះទៅសហការរៀបចំ និងសម្របសម្រួលគាំទ្រដល់ដំណើរការកម្មវិធីប្រកាសចូលកាន់តំណែងរបស់ក្រុមប្រឹក្សារាជធានី ខេត្ត ដែលជាប់ឆ្នោតអាណត្តិថ្មី ឱ្យប្រព្រឹត្តទៅដោយរលូន និងទទួលបានជោគជ័យតាមការគ្រោងទុក។
ទីបួន. ក្រោយពេលពិធីប្រកាសចូលកាន់តំណែងក្រុមប្រឹក្សារាជធានី ខេត្ត អាណត្តិទី៤ បានបិទបញ្ចប់រួចរាល់ជាស្ថាពរ រដ្ឋបាលរាជធានី ខេត្ត សាមីនីមួយៗ ត្រូវយកចិត្តទុកដាក់លើការសម្របសម្រួលជាមួយរដ្ឋបាលក្រុង ស្រុក ខណ្ឌ រៀបចំកម្មវិធីចុះប្រកាសចូលកាន់តំណែងក្រុមប្រឹក្សាក្រុង ស្រុក ខណ្ឌ ជាបន្តទៀត ឱ្យបានចប់សព្វគ្រប់យ៉ាងយូរ១៤ថ្ងៃ គិតពីថ្ងៃប្រកាសលទ្ធផលជាផ្លូវការរបស់គណៈកម្មាធិការជាតិរៀបចំការបោះឆ្នោត។
ទីប្រាំ. ក្រៅពីនេះ ផ្អែកតាមអនុក្រឹត្យលេខ ២១៥ អនក្រ.បក និងអនុក្រឹត្យលេខ ២១៦ អនក្រ.បក ចុះថ្ងៃទី១៤ ខែធ្នូ ឆ្នាំ២០០៩ ស្ដីពីតួនាទី ភារកិច្ច និងទំនាក់ទំនងការងាររវាងក្រុមប្រឹក្សា និងគណៈអភិបាល ក្រុមប្រឹក្សារាជធានី ខេត្ត ក្រុង ស្រុក ខណ្ឌ ដែលកើតឡើងពីការបោះឆ្នោត គឺជាតំណាងសាធារណៈ ជាអ្នកការពារ និងបម្រើផលប្រយោជន៍របស់ប្រជាពលរដ្ឋគ្រប់រូបទាំងអស់នៅក្នុងមូលដ្ឋានរបស់ខ្លួន តាមរយៈការអនុវត្តសិទ្ធិអំណាចធ្វើសេចក្ដីសម្រេចខាងបញ្ញត្តិ និងសេចក្ដីសម្រេចខាងប្រតិបត្តិ។ ក្នុងការអនុវត្តសិទ្ធិអំណាចនេះត្រូវធ្វើឡើងតាមរយៈកិច្ចប្រជុំក្រុមប្រឹក្សាសាមញ្ញ និងវិសាមញ្ញរបស់ខ្លួន ដោយអនុលោមទៅតាមបទបញ្ជាផ្ទៃក្នុង នៃក្រុមប្រឹក្សានីមួយៗ។ ហេតុនេះ ដើម្បីធានាការអនុវត្តសិទ្ធិអំណាចរបស់ក្រុមប្រឹក្សាដែលជាប់ឆ្នោតអាណត្តិថ្មីនេះ បានត្រឹមត្រូវ ស្របតាមគោលការណ៍ច្បាប់ ខ្ញុំសូមស្នើឱ្យរដ្ឋបាលរាជធានី ខេត្តទាំងអស់ធ្វើការផ្សព្វផ្សាយនូវសេចក្ដីណែនាំលេខ ០២៤ សណន របស់ក្រសួងមហាផ្ទៃ ស្ដីពីការរៀបចំបទបញ្ជាផ្ទៃក្នុងរបស់ក្រុមប្រឹក្សារាជធានី ខេត្ត ក្រុង ស្រុក ខណ្ឌ អាណត្តិទី៤ និងប្រកាសលេខ ២៣៧៥ ប្រក ស្ដីពីកិច្ចប្រជុំចូលកាន់តំណែង កិច្ចប្រជុំសាមញ្ញលើកទី១ និងកិច្ចប្រជុំសាមញ្ញលើកទី២ របស់ក្រុមប្រឹក្សារាជធានី ក្រុមប្រឹក្សាខេត្ត ក្រុមប្រឹក្សាក្រុង ក្រុមប្រឹក្សាស្រុក ក្រុមប្រឹក្សាខណ្ឌ ដល់តួអង្គពាក់ព័ន្ធនៅក្នុងដែនសមត្ថកិច្ចរបស់រដ្ឋបាលរាជធានី ខេត្ត នីមួយៗរបស់ខ្លួន។
ទីប្រាំមួយ. បន្ថែមពីលើនេះ អភិបាលរាជធានី ខេត្តទាំងអស់ ត្រូវយកចិត្តទុកដាក់ ខិតខំប្រមែប្រមូល ចងក្រងរៀបចំរបាយការណ៍ស្ដីពីលទ្ធផលការងាររួមមាន៖ សមិទ្ធផលដែលសម្រេចបាន, ការងារដែលនៅសេសសល់ និងទិសដៅការងារបន្ត។
ទីប្រាំពីរ. ក្រោយពេលដែលក្រុមប្រឹក្សារាជធានី ខេត្ត ក្រុង ស្រុក ខណ្ឌ ដែលជាប់ឆ្នោតអាណត្តិថ្មី ចូលកាន់តំណែងរួចរាល់ហើយ ការងារអាទិភាពដែលត្រូវគិតគូរជាបន្តបន្ទាប់ទៀត គឺការងាររៀបចំកសាងផែនការអភិវឌ្ឍន៍រយៈពេល ៥ឆ្នាំ និងកម្មវិធីវិនិយោគ ៣ឆ្នាំរំកិល របស់រដ្ឋបាលរាជធានី ខេត្ត នីមួយៗ ឱ្យបានត្រឹមត្រូវ ទាន់ពេលវេលា ស្របតាមការកំណត់ និងអនុវត្តស្របទៅតាមស្មារតីនៃអនុក្រឹត្យលេខ ២១៩ អនក្រ.បក ចុះថ្ងៃទី១៤ ខែធ្នូ ឆ្នាំ២០០៩ ស្ដីពីផែនការអភិវឌ្ឍន៍ និងកម្មវិធីវិនិយោគ ៣ឆ្នាំរំកិល របស់រដ្ឋបាលរាជធានី ខេត្ត ក្រុង ស្រុក ខណ្ឌ បានកំណត់ជាធរមាន។
ឯកឧត្ដម បន្ថែមថា ជាថ្មីម្ដងទៀត សម្រាប់រយៈពេលពីនេះ ដល់ថ្ងៃប្រកាសលទ្ធផលជាផ្លូវការរបស់ គ.ជ.ប ឯកឧត្តម លោកជំទាវ អស់លោក លោកស្រី ដែលជាថ្នាក់ដឹកនាំ និងមន្រ្តីរាជការដែលពាក់ព័ន្ធត្រូវប្ដេជ្ញារួមគ្នាដោយប្រើប្រាស់ឱ្យអស់កម្លាំងកាយ ប្រាជ្ញាស្មារតី អនុវត្តកិច្ចការងារនានាសម្រាប់ត្រៀមចូលកាន់ តំណែងរបស់ក្រុមប្រឹក្សារាជធានី ខេត្ត ក្រុង ស្រុក ខណ្ឌ អាណត្តិទី៤ ប្រកបដោយស្មារតីទទួលខុសត្រូវខ្ពស់ និងសម្រេចបាននូវលទ្ធផលយ៉ាងត្រចះត្រចង់ ក្នុងបេសកកម្មដ៏ឧត្ដុង្គឧត្តមជូនសង្គមជាតិ និងប្រជាជនកម្ពុជា ៕
