ប្រឡាយមេទុកស្រូវ នាំទឹកពីកសិណហ្លួងព្រះស្តេចកន ដើម្បីស្រោចស្រពបន្ថែមលើផ្ទៃដីបង្កបង្កើនផលក្នុងស្រុកកំចាយមារ ខេត្តព្រៃវែង

ភ្នំពេញ៖ ប្រឡាយមេទុកស្រូវស្ថិតនៅក្នុងឃុំជាច ស្រុកកំចាយមារ ខេត្តព្រៃវែង មានចម្ងាយ ១៥៥គីឡូម៉ែត្រប៉ែកខាងជើងឆៀងខាងកើតរាជធានីភ្នំពេញ។ ប្រឡាយមេនេះកសាងតាំងពីសម័យប៉ុលពត បានទទួលទឹកពីប្រភពផ្ទៃរងទឹកភ្លៀងក្នុងតំបន់ និងពីកសិណហ្លួងព្រះស្តេចកន ដើម្បីធ្វើការស្រោចស្រពបន្ថែមលើផ្ទៃដីបង្កបង្កើនផលក្នុងស្រុកកញ្ជ្រៀច និងស្រុកកំចាយមារ ខេត្តព្រៃវែង។

ប្រឡាយមេទុកស្រូវបានជួបនូវស្ថានភាពគោករាក់ កកកំណកល្បាប់ស្ទើរតែទាំងស្រុង មិនអាចដំណើរការស្រោចស្រពបានតាមតម្រូវការនៅលើផ្ទៃដីបង្កបង្កើនផលកសិកម្មដែលមានស្រាប់ ជាហេតុបណ្តាលឱ្យប្រជាពលរដ្ឋក្នុងតំបន់ជួបញ្ហាខ្វះទឹកសម្រាប់ប្រើប្រាស់ក្នុងការងារបង្កបង្កើនផលកសិកម្ម និងការប្រើប្រាស់ប្រចាំថ្ងៃ។

ក្នុងគោលបំណងដើម្បីជួយដោះស្រាយបញ្ហាទឹកជូនប្រជាពលរដ្ឋ នាយកដ្ឋានវិស្វកម្មនៃក្រសួងធនធានទឹក និងឧតុនិយម បានចុះពិនិត្យ និងធ្វើការសិក្សាប្រមូលទិន្នន័យចងក្រងឯកសារគម្រោងទៅតាមលក្ខណៈបច្ចេកទេស ក្នុងការស្តារប្រឡាយមេទុកស្រូវឡើងវិញ។

នៅឆ្នាំ២០២៣ ការងារស្តារប្រឡាយមេទុកស្រូវត្រូវបានអនុវត្តនៅជំហានទី១ ប្រវែង ៧៥០០ម៉ែត្រ ស្ថិតក្នុងឃុំគោកគង់ខាងកើត ស្រុកកញ្ជ្រៀច ខេត្តព្រៃវែង។ ជាបន្ត នៅក្នុងឆ្នាំ២០២៤ នេះ ក្រសួងធនធានទឹក និងឧតុនិយម បានអនុវត្តគម្រោងស្តារប្រឡាយមេទុកស្រូវជំហានទី២ ប្រវែង ៧៥០០ម៉ែត្រ បន្ថែមទៀត ក្នុងឃុំជាច ស្រុកកំចាយមារ ខេត្តព្រៃវែង។

បើតាមលោក ម៉េង វាសនា ប្រធានគ្រប់គ្រងការដ្ឋានស្តារប្រឡាយមេទុកស្រូវជំហានទី២ បានឱ្យដឹងថា ការងារសំខាន់ៗរួមមាន៖ ទី១)ស្តារប្រឡាយមេទុកស្រូវប្រវែង ៧៥០០ម៉ែត្រ ទី២)សាងសង់សំណង់លូយកទឹកលើភ្លឺប្រឡាយមេចំនួន ៦កន្លែង ទី៣)សាងសង់សំណង់លូដោះទឹកលើភ្លឺប្រឡាយមេចំនួន ៦កន្លែង ទី៤)សាងសង់សំណង់ស្ទាក់ទឹកលើប្រឡាយមេ(ទ្វារ២)ចំនួន ៣កន្លែង និងទី៥)សាងសង់សំណង់លូចម្លងលើប្រឡាយមេចំនួន ២កន្លែង។

លោកប្រធានគ្រប់គ្រងការដ្ឋានបានបន្តឱ្យដឹងថា ការងារស្តារប្រឡាយមេទុកស្រូវបានចាប់ផ្តើមតាំងពីខែមករា ឆ្នាំ២០២៤ គិតមកដល់ពេលនេះ វឌ្ឍនភាពការងារគម្រោងស្តារប្រឡាយមេទុកស្រូវជំហានទី២ និងការសាងសង់សំណង់សិល្បការ្យ សម្រេចបានប្រមាណ ៦៥% ហើយការងារនេះគ្រោងនឹងបញ្ចប់នៅក្នុងខែមិថុនា ឆ្នាំ២០២៤ ខាងមុខនេះ។

អាជ្ញាធរមូលដ្ឋាន និងប្រជាពលរដ្ឋក្នុងតំបន់បានសម្តែងការសាទរ និងថ្លែងអំណរគុណចំពោះថ្នាក់ដឹកនាំរាជរដ្ឋាភិបាល និងថ្នាក់ដឹកនាំក្រសួងធនធានទឹក និងឧតុនិយម ព្រមទាំងក្រុមការងារអនុវត្តគម្រោងនៃនាយកដ្ឋានវិស្វកម្ម ចំពោះការស្តារប្រឡាយមេទុកស្រូវ ដែលជាសមិទ្ធផលថ្មីប្រកបដោយសក្តានុពលបន្ថែមទៀតនៅក្នុងភូមិសាស្ត្រឃុំជាច ស្រុកកំចាយមារ ខេត្តព្រៃវែង។

ក្រោយពីការស្តារប្រឡាយមេទុកស្រូវជំហានទី២ និងសាងសង់សំណង់សិល្បការ្យបានរួចរាល់តាមលក្ខណៈបច្ចេកទេស ប្រជាពលរដ្ឋក្នុងឃុំជាច ស្រុកកំចាយមារ ខេត្តព្រៃវែង ប្រមាណ ១០០៩គ្រួសារ នឹងទទួលបានប្រឡាយមេនាំទឹកមកស្រោចស្រពលើផ្ទៃដីបង្កបង្កើនផលកសិកម្ម ស្រូវវស្សាចំនួន ៦៧៦ហិកតា ស្រូវប្រាំងចំនួន ៣៨០ហិកតា និងដំណាំរួមផ្សំចំនួន ១០ហិកតា។

ទន្ទឹមនឹងនេះ ភ្លឺប្រឡាយមេនឹងដើរតួជាផ្លូវគមនាគមន៍ដ៏មានសក្តានុពលសម្រាប់ដឹកជញ្ជូនកសិផល និងការធ្វើចរាចរណ៍ក្នុងមូលដ្ឋាន ព្រមទាំងចូលរួមចំណែកក្នុងការដោះស្រាយបញ្ហាប្រែប្រួលអាកាសធាតុដូចជាគ្រោះរាំងស្ងួត និងគ្រោះទឹកជំនន់ និងការពារធនធានធម្មជាតិដែលមាននៅក្នុងមូលដ្ឋាន ៕