ឧត្តមសេនីយ៍ទោ សោម ស៊ុន ផ្សព្វផ្សាយគម្រោងស្ថាបនាព្រែកជីកហ្វូណនតេជោ និងប្រកាសគាំទ្រយ៉ាងពេញទំហឹង ដើម្បីអភិវឌ្ឍន៍ប្រទេសជាតិ និងផលប្រយោជន៍របស់ប្រជាជនកម្ពុជា

ភ្នំពេញ៖ នៅថ្ងៃទី៦ ខែឧសភា ឆ្នាំ២០២៤ នៅទីបញ្ជាការតំបន់ប្រតិបត្តិការសឹករងកំពង់ធំ បានផ្សព្វផ្សាយគម្រោងស្ថាបនាព្រែកជីកហ្វូណនតេជោ ដែលជាព្រែកជីកប្រវត្តិសាស្រ្តលើកទី១ នៅកម្ពុជា ដែលជាការផ្តួចផ្តើមគំនិតរបស់សម្ដេចអគ្គមហាសេនាបតីតេជោ ហ៊ុន សែន អតីតនាយករដ្ឋមន្ត្រី និងជាប្រធានព្រឹទ្ធសភានៃព្រះរាជាណាចក្រកម្ពុជា ដើម្បីអភិវឌ្ឍន៍ប្រទេសជាតិ និងបម្រើផលប្រយោជន៍របស់ប្រជាជនកម្ពុជា ដែលពិធីនេះប្រព្រឹត្តទៅស្ថិតក្រោមអធិបតីភាពឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ។

ឧត្តមសេនីយ៍ទោ សោម ស៊ុន បានផ្សព្វផ្សាយអំពីគម្រោងស្ថាបនាព្រែកជីកហ្វូណនតេជោ ក្រោមការដឹកនាំរបស់សម្ដេចតេជោ ហ៊ុន សែន ក្នុងនាមនាយករដ្ឋមន្ត្រីនៃព្រះរាជាណាចក្រកម្ពុជា ក្នុងអាណត្តិទី ៦នាពេលកន្លងទៅ លោកបានផ្តួចផ្ដើមគំនិតឲ្យក្រសួងស្ថាប័នពាក់ព័ន្ធ ពិសេសក្រុមប្រឹក្សាអភិវឌ្ឍន៍កម្ពុជា ដើម្បី សិក្សាលើគម្រោងស្ថាបនាព្រែកជីកហ្វូណនតេជោ ដែលមានរយៈពេលសិក្សាជាង២៦ខែ ។ ហើយគម្រោងស្ថាបនាព្រែកជីកហ្វូណនតេជោនេះ មានប្រវែង១៨០គីឡូម៉ែត្រ មុខកាត់ខាងលើប្រវែង១០០ម៉ែត្រ មុខកាត់បាតក្រោមប្រវែង ៨០ម៉ែត្រ និងជម្រៅ៥,៤ ម៉ែត្រ ។ មានផ្លូវ២ខ្សែអមសងខាងព្រែក ដោយត្រូវឆ្លងកាត់ខេត្តចំនួន៤ គឺខេត្តកណ្ដាល ខេត្តតាកែវ ខេត្តកំពត និងខេត្តកែប ដែលត្រូវចំណាយថវិកាក្នុងការស្ថាបនាជាងមួយពាន់១.៧០០លានដុល្លារសហរដ្ឋអាមេរិក ដែលជាគម្រោងរដ្ឋជាមួយវិស័យឯកជន ដោយប្រើប្រាស់រយៈពេលស្ថាបនាចំនួន៤ឆ្នាំ ដោយចាប់ផ្ដើមដំណើរការស្ថាបនានៅឆ្នាំ២០២៤នេះ។

ឧត្តមសេនីយ៍ទោ សោម ស៊ុន បានបញ្ជាក់បន្ថែមទៀតថា ព្រែកជីកហ្វូណនតេជោនេះ បានផ្ដល់ផលប្រយោជន៍យ៉ាងច្រើនដល់ការអភិវឌ្ឍន៍ប្រទេស និងកំណើនសេដ្ឋកិច្ចជាតិ ហើយបានបម្រើផលប្រយោជន៍ប្រជាជនកម្ពុជា ដែលរស់នៅតាមមាត់ព្រែក និងនៅទូទាំងប្រទស ព្រមទាំងងាយស្រួលដល់ការដឹកជញ្ជូនទំនិញគ្រប់ប្រភេទបម្រើឱ្យវិស័យសេដ្ឋកិច្ចជាតិ ពីក្នុងប្រទេសទៅកាន់បណ្ដាប្រទេសនានានៅលើពិភពលោក ដោយមិនចាំបាច់ឆ្លងកាត់ប្រទេសជិតខាង ។

នាយទាហាន នាយទាហានរង និងពលទាហាននៃបញ្ជាការដ្ឋានតំបន់ប្រតិបត្តិការសឹករកកំពង់ធំទាំងអស់ សូមប្រកាសគាំទ្រយ៉ាងពេញទំហឹង ចំពោះគម្រោងស្ថាបនាព្រែកជីកហ្វូណនតេជោ ក្រោមការផ្ដួចផ្ដើមរបស់សម្ដេចតេជោ ហ៊ុន សែន និងការដឹកនាំស្ថាបនាដោយសម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ឲ្យទទួលបានជោគជ័យ ដើម្បីផលប្រយោជន៍ប្រទេសជាតិនិងប្រជាជនកម្ពុជា ៕