ឯកឧត្តម ស្វាយ សំអ៊ាង ទទួលជួបសម្ដែងការគួរសមជាមួយ អនុលេខាគណៈកម្មាធិការបក្សខេត្តកង់ទុំ នៃប្រទេសវៀតណាម ក្នុងដំណើរអញ្ជើញមកជូនពរ នាឱកាសចូលឆ្នាំថ្មី ប្រពៃណីជាតិខ្មែរ
ភ្នំពេញ៖ នារសៀលថ្ងៃទី០២ ខែមេសា ឆ្នាំ២០២៤ ឯកឧត្តម ស្វាយ សំអ៊ាង អភិបាល នៃគណៈអភិបាលខេត្តស្ទឹងត្រែង បានទទួលជួបសម្ដែងការគួរសម និងពិភាក្សាការងារជាមួយ ឯកឧត្តម ឡេ ង៉កទ័ន អនុលេខាគណៈកម្មាធិការបក្សខេត្ត ប្រធានគណៈកម្មាធិការប្រជាជនខេត្តកង់ទុំ នៃសាធារណរដ្ឋសង្គមនិយមវៀតណាម ក្នុងដំណើរដែលឯកឧត្តមបានដឹងនាំគណៈប្រតិភូអញ្ជើញមកជូនពរ និងអបអរសាទរ នាឱកាសចូលឆ្នាំថ្មី ប្រពៃណីជាតិខ្មែរ ដែលឈានចូលនៅថ្ងៃសៅរ៍ ៥កើត ខែចេត្រ ឆ្នាំរោង ឆស័ក ពុទ្ធសករាជ ២៥៦៧ ត្រូវនឹងថ្ងៃទី១៣ ខែមេសា ឆ្នាំ២០២៤ វេលាម៉ោង២២:១៧និង២៤វិនាទីយប់។
ក្នុងឱកាសនៃពិធីបុណ្យចូលឆ្នាំថ្មីប្រពៃណីជាតិខ្មែរ ឆ្នាំរោង ឆស័ក ពុទ្ធសករាជ ២៥៦៧ ដែលនឹងឈានមកដល់ នាពេលខាងមុខនេះ ឯកឧត្តមអនុលេខាគណៈកម្មាធិការបក្សខេត្ត សូមចូលរួមអបអរសាទរទិវាដ៏វិសេសវិសាលនេះជាមួយនឹង ឯកឧត្តម ស្វាយ សំអ៊ាង អភិបាល នៃគណៈអភិបាលខេត្តស្ទឹងត្រែង ព្រមទាំងថ្នាក់ដឹកនាំ មន្ត្រីរាជការ នៃរដ្ឋបាលខេត្តទាំងមូល ក្នុងក្តីសង្ឃឹមជឿជាក់លើការដឹកនាំប្រកបដោយគតិបណ្ឌិតរបស់ប្រមុខរាជរដ្ឋាភិបាលកម្ពុជា ប្តេជ្ញាចិត្តដើម្បីសម្រេចអោយបាននូវគោលដៅអភិវឌ្ឍន៍ប្រកបដោយចីរភាព តាមរយៈការអនុវត្តផែនការយុទ្ធសាស្ត្របញ្ចកោណ ដំណាក់កាលទី១ និងផែនការអភិវឌ្ឍន៍ជាតិ។
ក្នុងទិវាដ៏មហានក្ខត្តឫក្សនេះ ឯកឧត្តមអនុលេខាគណៈកម្មាធិការបក្សខេត្ត សូមសម្តែងនូវការកោតសរសើរ និងវាយតម្លៃខ្ពស់ ជូនចំពោះឯកឧត្តម ស្វាយ សំអ៊ាង ដែលបានខិតខំរួមគ្នា បំពេញភារកិច្ច ក្នុងកិច្ចដំណើការកសាងផែនការ ដឹកនាំ និងសម្របសម្រួលជាមួយស្ថាប័នផ្សេងៗ ក្នុងការត្រួតពិនិត្យនូវការអនុវត្ត ផែនការយុទ្ធសាស្ត្រអភិវឌ្ឍន៍ជាតិ និងបានជួយឧបត្ថម្ភគាំទ្រគ្រប់បែបយ៉ាង ដើម្បីបុព្វហេតុជាតិ និងប្រជាពលរដ្ឋក្នុងខេត្តស្ទឹងត្រែងទាំងមូល។
ឯកឧត្តមអនុលេខាគណៈកម្មាធិការបក្សខេត្តកង់ទុំ សូមបួងសួងដល់ទេវតាឆ្នាំថ្មី ព្រះនាម មហោទរាទេវី ជួយប្រោះព្រំនូវសព្ទសាធុការពរ សិរីសួស្តី ជ័យមង្គល វិបុលសុខ បវរមហាប្រសើរ ជូនចំពោះឯកឧត្តម ស្វាយ សំអ៊ាង ព្រមទាំងថ្នាក់ដឹកនាំ មន្ត្រីរាជការគ្រប់ជាន់ថ្នាក់ នៃរដ្ឋបាលខេត្តស្ទឹងត្រែង ឱ្យទទួលបាននូវពរទាំង ៥ ប្រការ គឺ អាយុ វណ្ណៈ សុខៈ ពលៈ និង បដិភាណៈ កុំបីឃ្លៀងឃ្លាតឡើយ។
ជាទីបញ្ចប់ ឯកឧត្តម ស្វាយ សំអ៊ាង ក៏បានថ្លែងអំណរគុណ និងបានពាំនាំនូវការផ្ដាំផ្ញើសាកសួរសុខទុក្ខពីសំណាក់ សម្តេចអគ្គមហាពញាចក្រី ហេង សំរិន ប្រធានកិត្តិយសឧត្តមក្រុមប្រឹក្សាផ្ទាល់ព្រះមហាក្សត្រ, សម្តេចអគ្គមហាសេនាបតីតេជោ ហ៊ុន សែន ប្រធានឧត្តមក្រុមប្រឹក្សាផ្ទាល់ព្រះមហាក្សត្រ, សម្តេចក្រឡាហោម ស ខេង សមាជិកឧត្តមក្រុមប្រឹក្សាផ្ទាល់ព្រះមហាក្សត្រ និងសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ជូនដល់ឯកឧត្តម ឡេ ង៉កទ័ន អនុលេខាគណៈកម្មាធិការបក្សខេត្ត ប្រធានគណៈកម្មាធិការប្រជាជនខេត្តកង់ទុំ នៃសាធារណរដ្ឋសង្គមនិយមវៀតណាម ព្រមទាំងគណៈប្រតិភូ ផងដែរ ៕
