ហ្សេរុយសាឡឹម៖ នាយករដ្ឋមន្ត្រីអ៊ីស្រាអែល លោក Benjamin Netanyahu បានប្រកាសកាលពីថ្ងៃអាទិត្យថា យោធាអ៊ីស្រាអែលកំពុងរៀបចំបើកការវាយប្រហារលើទីក្រុង Rafah ខណៈដែលការចរចាបទឈប់បាញ់បានចាប់ផ្តើមឡើងវិញនៅក្នុងប្រទេសអេហ្ស៊ីប។
ក្រុង Rafah ដែលជាទីក្រុងភាគខាងត្បូងបំផុតរបស់តំបន់ Gaza បានក្លាយជាជម្រកសម្រាប់ជនភៀសខ្លួនប៉ាឡេស្ទីនជាងមួយលាននាក់ដែលកំពុងស្វែងរកទីជំរកពីការទម្លាក់គ្រាប់បែក។ អ្នកជំនាញរបស់អង្គការសហប្រជាជាតិ និងប្រទេសមួយចំនួនបានព្រមានថា ប្រតិបត្តិការជើងគោកណាមួយនៅក្នុងទីក្រុងនឹងនាំឱ្យមានមហន្តរាយដល់ជនស៊ីវិល។
នៅក្នុងសន្និសីទសារព័ត៌មានមួយ លោក Netanyahu បានឲ្យដឹងថា បន្ទាប់ពីការយល់ព្រមរបស់គាត់ចំពោះផែនការរបស់យោធាសម្រាប់ការវាយប្រហារលើដីនៅក្រុង Rafah កាលពីដើមខែមីនា ឥឡូវនេះកងទ័ពកំពុងរៀបចំជម្លៀសប្រជាជនមុនពេលវាយប្រហារទីក្រុង។
នៅតំបន់ហ្គាហ្សាភាគខាងជើង ជាកន្លែងដែលអង្គការសហប្រជាជាតិបានឲ្យដឹងថា ទុរ្ភិក្សជិតមកដល់ កងកម្លាំងអ៊ីស្រាអែលបានបន្តការវាយឆ្មក់ទៅលើមន្ទីរពេទ្យ Al-Shifa ដែលជាមជ្ឈមណ្ឌលវេជ្ជសាស្ត្រដ៏ធំបំផុតរបស់តំបន់នេះ មុនពេលមានជម្លោះ។ យោងតាមលោក Netanyahu យ៉ាងហោចណាស់មានជនសកម្មប្រយុទ្ធ ២០០នាក់ត្រូវបានសម្លាប់នៅក្នុងមន្ទីរពេទ្យ។ យោងតាមក្រសួងសុខាភិបាលដែលគ្រប់គ្រងដោយក្រុមហាម៉ាស មនុស្សរាប់សិបនាក់ត្រូវបានសម្លាប់នៅមន្ទីរពេទ្យ ដែលអ្នកជំងឺ និងជនភៀសខ្លួនប្រហែល ៣,០០០នាក់កំពុងស្វែងរកទីជម្រក។
នៅពេលរសៀល គណៈប្រតិភូមន្ត្រីសន្តិសុខអ៊ីស្រាអែលបានចេញដំណើរទៅជួបចរចាថ្មីជាមួយអ្នកចរចានៅទីក្រុងគែរ។
ទន្ទឹមនឹងនេះ អ៊ីស្រាអែលបានបន្តធ្វើការវាយប្រហារយ៉ាងខ្លាំងនៅក្នុងក្របខណ្ឌប៉ាឡេស្ទីន។ យោធាបានឲ្យដឹងថា យន្តហោះចម្បាំងរបស់ខ្លួនបានកំណត់គោលដៅប្រតិបត្តិការរបស់មជ្ឈមណ្ឌលបញ្ជាការ Jihad អ៊ីស្លាម និងក្រុមសកម្មប្រយុទ្ធនៅទីធ្លាមន្ទីរពេទ្យ Al-Aqsa នៅកណ្តាលហ្គាហ្សាស្ទ្រីប។
ការិយាល័យប្រព័ន្ធផ្សព្វផ្សាយដែលគ្រប់គ្រងដោយក្រុម Hamas នៅទីក្រុង Gaza បានឲ្យដឹងនៅក្នុងសេចក្តីថ្លែងការណ៍មួយថា ការវាយប្រហារតាមអាកាសបានវាយប្រហារលើតង់លំនៅដ្ឋានអ្នកកាសែត និងមនុស្សផ្លាស់ទីលំនៅនៅក្នុងបរិវេណមន្ទីរពេទ្យ។ ប្រភពវេជ្ជសាស្ត្រប៉ាឡេស្ទីនបាននិយាយថា ការវាយប្រហារនេះបានសម្លាប់មនុស្ស ០៤នាក់ និងរបួស ១៧នាក់ផ្សេងទៀតជាមួយនឹងរបួសផ្សេងៗគ្នា រួមទាំងអ្នកកាសែតពីរនាក់ផងដែរ។
ក្រសួងសុខាភិបាលនៅហ្គាហ្សាបានឲ្យដឹងនៅក្នុងសេចក្តីថ្លែងការណ៍មួយថា ក្នុងរយៈពេលមួយថ្ងៃកន្លងមក ការវាយប្រហាររបស់អ៊ីស្រាអែលបានសម្លាប់ជនជាតិប៉ាឡេស្ទីនយ៉ាងហោចណាស់ ៧៧នាក់ និងរបួស ១០៨នាក់ផ្សេងទៀត។ សរុបមក យ៉ាងហោចណាស់មានជនជាតិប៉ាឡេស្ទីន ៣២,៧៨២នាក់ត្រូវបានសម្លាប់ និង ៧៥,២៩៨នាក់បានរងរបួស ចាប់តាំងពីអ៊ីស្រាអែលបានបើកការវាយប្រហារសងសឹកប្រឆាំងនឹងក្រុមហាម៉ាសកាលពីថ្ងៃទី០៧ ខែតុលា ឆ្នាំ២០២៣។ ចំនួនអ្នកស្លាប់របស់អ៊ីស្រាអែលពីការវាយប្រហារដ៏គួរឱ្យភ្ញាក់ផ្អើលរបស់ក្រុមហាម៉ាសមានចំនួន ១,១៣៩នាក់ ហើយប្រហែល ១០០នាក់នៅតែជាចំណាប់ខ្មាំងនៅក្នុងតំបន់ហ្គាហ្សា។
