ឯកឧត្តម ឆាយ ឫទ្ធិសែន អញ្ជើញប្រកាសសមាសភាពក្រុមការងាររាជរដ្ឋាភិបាលចុះមូលដ្ឋាន ស្រុកទឹកផុស និងស្រុកសាមគ្គីមានជ័យ

ភ្នំពេញ៖ នៅថ្ងៃទី៣០ ខែមីនា ឆ្នាំ២០២៤ នៅសាលាស្រុកទឹកផុស និងស្រុកសាមគ្គីមានជ័យ ខេត្តកំពង់ឆ្នាំង ឯកឧត្តម ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ អនុប្រធានទី១ ក្រុមការងារថ្នាក់ជាតិចុះមូលដ្ឋានខេត្តកំពង់ឆ្នាំង និងជាប្រធានក្រុមការងាររាជរដ្ឋាភិបាលចុះមូលដ្ឋានស្រុកទឹកផុស និងស្រុកសាមគ្គីមានជ័យ បានអញ្ជើញជាអធិបតីក្នុងពិធីប្រកាសសមាសភាពក្រុមការងាររាជរដ្ឋាភិបាលចុះមូលដ្ឋាន ស្រុកទឹកផុស និងស្រុកសាមគ្គីមានជ័យ ។

អញ្ជើញចូលរួមក្នុងពិធីនេះផងដែររួមមាន ឯកឧត្ដម លោកជំទាវ ប្រធាន អនុប្រធានក្រុមការងាររដ្ឋាភិបាលចុះមូលដ្ឋានស្រុកទាំងពីរ ព្រមទាំង លោក លោកស្រី សមាជិក សមាជិកា ចុះមូលដ្ឋានឃុំទាំង ១៨ នៅក្នុងស្រុកទឹកផុស និងស្រុកសាមគ្គីមានជ័យមានចំនួនសរុប២៣០នាក់ ស្រី៣៨នាក់។

បន្ទាប់ពីបានស្តាប់ការអានសេចក្តីសម្រេចលេខ ០០៩/២៤ សសរ.ករ.កពឆ និង ០១០/២៤ សសរ.ករ.កពឆ ស្តីពីការចាត់តាំងសមាសភាពក្រុមការងាររាជរដ្ឋាភិបាលចុះមូលដ្ឋានស្រុកសាមគី្គភាពជ័យ និងស្រុកទឹកផុស រួចមក ឯកឧត្ដម ឆាយ ប្ញទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ អនុប្រធានទី១ក្រុមការងារថ្នាក់ជាតិចុះមូលដ្ឋានខេត្តកំពង់ឆ្នាំង និងជាប្រធានក្រុមការងារចុះមូលដ្ឋានស្រុកទឹកផុស និងស្រុកសាមគ្គីមានជ័យ បានពាំនាំនូវប្រសាសន៍ផ្តាំផ្ញើសួរសុខទុក្ខ ប្រកបដោយក្ដីនឹករលឹក និងពរសព្ទសាធុការពីសំណាក់សម្ដេចអគ្គមហាសេនាបតីតេជោហ៊ុន សែន អតីតនាយករដ្ឋមន្ត្រី ប្រធានឧត្ដមប្រឹក្សាផ្ទាល់ព្រះមហាក្សត្រ, សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា និងសម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្ដី នៃព្រះរាជាណាចក្រកម្ពុជា និងលោកជំទាវបណ្ឌិត ជូនចំពោះសមាជិក សមាជិកា អង្គពិធីទាំងអស់នៅទីនោះ ។

ឆ្លៀតក្នុងឱកាសនេះដែរ ឯកឧត្ដម បានថ្លែងអំណរគុណ និងកោតសរសើរដល់ក្រុមការងារដែលបានខិតខំប្រឹងប្រែងបំពេញតួនាទី និងភារកិច្ចរបស់ខ្លួនទទួលបានលទ្ធផលល្អប្រសើរក្នុងការគាំទ្រសកម្មភាពរាជរដ្ឋាភិបាលទាំងនៅក្នុងនីតិកាលបន្តបន្ទាប់កន្លងមកនិងសកម្មភាពជួយដល់ប្រជាពលរដ្ឋនៅតាមមូលដ្ឋានជាបន្តក្នុងនាមជារាជរដ្ឋាភិបាលនៅក្នុងនីតិកាលថ្មីនេះ។

ឯកឧត្តមរដ្ឋមន្ត្រី បានផ្តល់នូវអនុសាសន៍ចំនួន ៧ចំណុច ដើម្បីបន្តដំណើរការអនុវត្តការងាររបស់ក្រុមការងារថ្នាក់ជាតិ ថ្នាក់ក្រោមជាតិ និងអាជ្ញាធរមូលដ្ឋានគ្រប់កម្រិតថ្នាក់ឱ្យមានប្រសិទ្ធភាព និងនិរន្តរភាពដូចខាងក្រោម៖

១. ក្រុមការងារថ្នាក់ជាតិចុះមូលដ្ឋានថ្នាក់ស្រុក និងឃុំទាំង១៨ ត្រូវរៀបចំផែនការសកម្មភាព របៀបរបបការងារ និងចុះរៀបចំវេទិកាសាធារណៈ នៅតាមមូលដ្ឋានឃុំឱ្យបានច្បាស់លាស់ និងទៀងទាត់។

២. ក្រុមការងារត្រូវចូលរួមសហការជាមួយអាជ្ញាធរមូលដ្ឋាន ចុះរៀបចំកិច្ចប្រជុំនៅមូលដ្ឋានឃុំរបស់ខ្លួនដើម្បីស្តាប់នូវរបាយការណ៍ និងការលើកឡើងអំពីក្តីកង្វល់បញ្ហាប្រឈម តម្រូវការចាំបាច់ និងសំណូមពរនានារបស់ប្រជាពលរដ្ឋមូលដ្ឋាន ចំពោះសំណូមពរ និងបញ្ហាប្រឈមទាំងឡាយណាដែលហួសពីសមត្ថកិច្ចដោះស្រាយរបស់ខ្លួនត្រូវបូកសរុប និងរាយការណ៍ជូនរដ្ឋបាលខេត្ត ដើម្បីបូកសរុប ឬចាត់វិធានការឱ្យបានឆាប់។

៣. ក្រុមការងារត្រូវចូលរួមពិនិត្យ និងជួយជំរុញអាជ្ញាធរមូលដ្ឋានឱ្យខិតខំលើកកម្ពស់ការផ្តល់សេវាសាធារណៈ ប្រកបដោយស្មារតីទទួលខុសត្រូវ មានតម្លាភាព និងគណនេយ្យភាពចំពោះប្រជាពលរដ្ឋ។

៤. ត្រូវចូលរួមពង្រឹងសន្តិសុខ សណ្តាប់ធ្នាប់សាធារណៈ សុវត្ថិភាពសង្គម តាមរយៈការអនុវត្តគោលនយោបាយភូមិ/ឃុំមានសុវត្ថិភាព និងខិតខំពង្រឹងការអនុវត្តច្បាប់ឱ្យបានមុឺងម៉ាត់ចូលរួមបង្ការ ទប់ស្កាត់ និងបង្ក្រាបបទល្មើសនានា ឱ្យកាន់តែមានប្រសិទ្ធភាពខ្ពស់បន្ថែមទៀត ជាពិសេសសកម្មភាពលួចឆក់ប្លន់ ការប្រើប្រាស់ និងការជួញដូរគ្រឿងញៀនខុសច្បាប់ ល្បែងស៊ីសងខុសច្បាប់ ការជួញដូរមនុស្ស ការជម្រិតទារប្រាក់ បទល្មើសឆបោកតាមប្រព័ន្ធបច្ចេកវិទ្យាព័ត៌មាន និងសកម្មភាពក្មេងទំនើង -ល-។

៥. ចុះពិនិត្យ និងដោះស្រាយបញ្ហាប្រឈម និងសំណូមពរចាំបាច់នានារបស់ប្រជាពលរដ្ឋ តាមរយៈការជួបប្រាស័្រយទាក់ទងតាមសហគមន៍មូលដ្ឋាន និងការរៀបចំវេទិកាសាធារណៈមូលដ្ឋាន ព្រមទាំងខិតខំលុបបំបាត់នូវអំពើអសកម្ម និងចំនុចខ្វះខាតនានា ដែលប៉ះពាល់ដល់សតិអារម្មណ៍ និងជីវភាពរស់នៅរបស់ប្រជាពលរដ្ឋមូលដ្ឋាន។

៦.ខិតខំធ្វើអំពើល្អបម្រើប្រជាពលរដ្ឋឱ្យអស់ពីចិត្តពីថ្លើម សំដៅបង្កើនភាពជឿជាក់
ទុកចិត្ត និងកក់ក្តៅរបស់ប្រជាពលរដ្ឋមកលើរាជរដ្ឋាភិបាល។

៧.ចូលរួមសម្របសម្រួលក្នុងការជំរុញការអភិវឌ្ឍហេដ្ឋារចនាសម្ព័ន្ធរូបវន្តចាំបាច់នានា សម្រាប់បម្រើដល់សកម្មភាពសេដ្ឋកិច្ច ការវិនិយោគ ការធ្វើពាណិជ្ជកម្ម ទេសចរណ៍ និងការប្រកបមុខរបរខ្នាតតូចរបស់ប្រជាពលរដ្ឋ ពិសេសត្រូវគិតគូរ និងលើកទឹកចិត្តដល់សហគ្រាសធន់តូច និងមធ្យម ក៏ដូចជាវិស័យកសិកម្ម និងកសិឧស្សាហកម្ម ដែលជាវិស័យចម្បងរបស់ខេត្ត សំដៅបង្កើនការងារ និងប្រាក់ចំណូលរបស់ប្រជាពលរដ្ឋ កាត់បន្ថយភាពក្រីក្រ ជំរុញកំណើនសេដ្ឋកិច្ច និងរួមចំណែកជាមួយរាជរដ្ឋាភិបាលក្នុងការងារអភិវឌ្ឍន៍សង្គមសេដ្ឋកិច្ច ប្រកបដោយចីរភាព និងបរិយាបន្ននេះ៕