ឧត្តមសេនីយ៍ទោ ជ វណ្ណារិទ្ធ បិទវគ្គហ្វឹកហ្វឺនបំប៉នជំនាញភស្តុភារ ថ្នាក់កងអនុសេនាធំ នៅសាលាពលទាហានទី១
ភ្នំពេញ៖ ឧត្តមសេនីយ៍ទោ ជ វណ្ណារិទ្ធ នាយសេនាធិការរង នាយការិយល័យទី៤ កងទ័ពជើងគោក នាថ្ងៃទី១ ខែកុម្ភៈ ឆ្នាំ២០២៤ បានអញ្ជើញជាអធិបតីក្នុងពិធីបិទវគ្គហ្វឹកហ្វឺនបំប៉នជំនាញភ័ស្តុភារ ថ្នាក់កងអនុសេនាធំ ជូនដល់សិក្ខាកាម អង្គភាព ចំនុះយោធភូមិភាគទី១។
វគ្គហ្វឹកហ្វឺនបំប៉នជំនាញភស្តុភារថ្នាក់កងអនុសេនាធំ សិក្សាមានរយះពេល ១ខែ ចំនួនសិក្ខាកាមសរុបចំនួន ៧២នាក់ ។ សិក្សាខ្លឹមសារមេរឿនរួមមាន៖ ១. មូលដ្ឋានចាត់តាំងភស្តុភារក្នុងកងទ័ព ២. ជំនាញស្បៀង ៣. ជំនាញយោធបរិក្ខា ៤. ជំនាញប្រេង និងជំនាញដឹកជញ្ជូន ។
ក្រោយបញ្ចប់វគ្គសិក្ខាកាមទទួលបាននិទ្ទេសល្អ : ចំនួន ៤៣ នាក់ = ៥៩,៧៣ % និទ្ទេសល្អបង្គួរ : ចំនួន ២៦ នាក់ = ២៦,៣៩% និងនិទ្ទេសមធ្យម : ចំនួន ១០ នាក់ =១៣,៨៨% ។
ឧត្តមសេនីយ៍ទោ ជ វណ្ណារិទ្ធ វគ្គបំប៉នជំនាញភស្តុភារ ថ្នាក់កងអនុសេនាធំ បានបញ្ចប់នាពេលនេះ ពិតជា មានសារៈសំខាន់ សំដៅធានាឱ្យការងារប្រយុទ្ធ និងការងារបម្រើប្រយុទ្ធក៏ដូចជា សកម្មភាពប្រចាំថ្ងៃ របស់កងទ័ពក្នុងការបំពេញភារកិច្ច។ ទទឹមនេះដែរវគ្គហ្វឹកហ្វឺននេះបានចូលរួម ចំណែកលើកកម្ពស់ និងបង្កើនសមត្ថភាព ក្នុងការដឹកនាំបញ្ជា និងបង្កើនប្រសិទ្ធភាព ទាំងចំណេះដឹង ចំណេះធ្វើយ៉ាងពិតប្រកដ ទាំងការងារគ្រប់គ្រងភស្តុភារ និងការ លើកកម្ពស់ ដឹកនាំបញ្ជា ការបំពេញភារកិច្ចប្រកបដោយជោគជ័យ និងការទទួលខុស ត្រូវខ្ពស់ក្នុងការធានាជីវភាពនៅជូនកងទ័ព ក៏ដូចជាការបង្កើនការដឹកនាំគ្រប់ខ្សែរយៈ លើវិស័យការងារភស្តុភារ ដើម្បីឈានទៅសម្រេចភារកិច្ចចាំបាច់ចំពោះមុខក៏ដូចជាដា ដំណើរការកែទម្រង់កងយោធពលខេមរភូមិន្ទ ។
ឧត្តមសេនីយ៍ទោ ជ វណ្ណារិទ្ធ បានថែមទៀតថា ឯកឧត្តម នាយឧត្តមសេនីយ៍ អគ្គមេបញ្ជាការរង មេបញ្ជាការកងទ័ពជើងគោក បានយកចិត្តទុកដាក់ធ្វើការកែទម្រង់ការងារធានាភស្តុ ភារក្នុងកងទ័ពជើងគោក ដើម្បីធានាបាននូវលទ្ធភាព និងប្រសិទ្ធភាពក្នុងការដឹកនាំកងទ័ពជើងគោក ការងារធានាភស្តុភារត្រូវអនុវត្ត តាមឋានានុក្រម ឯកភាពគ្នាតែមួយក្នុងជួរ កងទ័ពជើងគោក ពីថ្នាក់មូលដ្ឋានរហូតដល់ថ្នាក់លើ។ ក្នុងន័យនេះការិយាល័យទី៤ បានខិតខំយកចិត្តទុកដាក់ពង្រឹងការងារធានាភស្តុភារ ពង្រឹងខ្សែ រយៈជំនាញ តាមរយៈគណៈកម្មការ អនុគណៈកម្មការពង្រឹងខ្សែរយៈជំនាញភស្តុភារ ពីកងទ័ពជើងគោក យោធភូមិភាគ កងពលធំ កងពលតូច តំបន់ប្រតិបត្តិការសឹករង ធ្វើការគ្រប់គ្រងពង្រឹងសមត្ថភាពជំនាញ នាយទាហាន នាយទាហានរង និងពលទាហាន ជំនាញកំពុងបំពេញភារកិច្ចឱ្យបានល្អ តាមរយៈការបើកវគ្គបំប៉នជំនាញភស្តុភារជាបន្តបន្ទាប់ ។
សូមបញ្ជាក់ថា នេះជាឆ្នាំទី៥ហើយ ដែលការិយាល័យទី៤ កងទ័ពជើងគោក យកចិត្តទុកដាក់ បើកវគ្គ និងសហការរៀបចំពិធីបើកវគ្គហ្វឹកហ្វឺនបំប៉នជំនាញភស្តុភារ ដល់នាយ ទាហាន នាយទាហានរង និងពលទាហាន ជំនាញភស្តុភារ តាមបណ្ដាកងឯកភាព ចំណុះកងទ័ពជើងគោក សរុប ១៩វគ្គ ដែលមានសិក្ខាកាមចំនួន ១ ០៩៩ នាក់ (ក្នុងនោះសិក្ខាកាមយោធភូមិភាគទី១ ចំនួន ៦២នាក់) រួមមាន ៖ បានបើកវគ្គហ្វឹកហ្វឺនបំប៉នជំនាញភស្តុភារ កងទ័ពជើងគោក ចំនួន ៧វគ្គ ដែល មានសិក្ខាកាម ចំនួន ៥៤០នាក់។
មជ្ឈមណ្ឌលហ្វឹកហ្វឺនកងទ័ពជើងគោក ចំនួន៤វគ្គ ដែលមានសិក្ខាកាម ចំនួន២៨០នាក់ ; ផ្ទៃក្នុងការិយាល័យទី ៤កងទ័ពជើងគោកចំនួន ៥វគ្គ ដែលមានសិក្ខាកាមចំនួន ២៦០នាក់ និងវគ្គហ្វឹកហ្វឺនបំប៉នជំនាញ ក្នុងផែនការរបស់អគ្គបញ្ជាការដ្ឋាន បើកវគ្គហ្វឹកហ្វឺន បំប៉នជំនាញភស្តុភារតាម បណ្តាកងពលធំ យោធភូមិភាគ ចំនួន ៥វគ្គ ដែលមាន សិក្ខាកាម ចំនួន ៣៥១នាក់ ៕
