ហ្សេរុយសាឡឹម/ហ្គាហ្សា÷បទឈប់បាញ់មនុស្សធម៌ដ៏ផុយស្រួយរវាងអ៊ីស្រាអែល និងក្រុមហាម៉ាសបានដួលរលំកាលពីថ្ងៃសុក្រ ដោយភាគីជម្លោះបានចោទប្រកាន់គ្នាទៅវិញទៅមកថាបានរំលោភលើកិច្ចព្រមព្រៀងបទឈប់បាញ់។អ្នកនាំពាក្យកងទ័ពអ៊ីស្រាអែល លោក Avichay Adraee បាននិយាយថា អ៊ីស្រាអែលបានចាប់ផ្តើមការវាយប្រហារតាមអាកាសដ៏ធំ ដោយផ្តោតលើទីតាំងជាង ២០០ នៅតំបន់ហ្គាហ្សា បន្ទាប់ពីបទឈប់បាញ់បានផុតកំណត់នៅម៉ោង ០៧:០០ ម៉ោងក្នុងស្រុកថ្ងៃសុក្រ (០៥០០ GMT) ។
ក្រសួងសុខភាពដែលគ្រប់គ្រងដោយក្រុមហាម៉ាសបាននិយាយកាលពីយប់មិញថា ការវាយប្រហាររបស់អ៊ីស្រាអែលចាប់តាំងពីព្រឹកថ្ងៃសុក្រនៅតំបន់ហ្គាហ្សាបានបណ្តាលឱ្យមនុស្ស ១៧៨ នាក់ស្លាប់ និង ៥៨៩ នាក់រងរបួស។Benny Gantz សមាជិកនៃគណៈរដ្ឋមន្ត្រីសម័យសង្គ្រាមរបស់នាយករដ្ឋមន្ត្រី Benjamin Netanyahu បាននិយាយនៅក្នុងសេចក្តីថ្លែងការណ៍វីដេអូមួយកាលពីថ្ងៃសុក្រថា អ៊ីស្រាអែលបានធ្វើផែនការក្នុងអំឡុងពេលសប្តាហ៍មុនដើម្បីពង្រីកការវាយលុករបស់ខ្លួននៅក្នុងតំបន់ហ្គាហ្សា។
ទន្ទឹមនឹងនេះ អ្នកនាំពាក្យកងកម្លាំងការពារអ៊ីស្រាអែល (IDF) លោក Daniel Hagari បាននិយាយនៅក្នុងសន្និសីទសារព័ត៌មានមួយថា កងទ័ពបានវាយប្រហារតំបន់ដែលជាប់ដោយគ្រឿងផ្ទុះ រូងក្រោមដីដែលប្រើប្រាស់ដោយពួកសកម្មប្រយុទ្ធ ប៉ុស្តិ៍បាញ់បង្ហោះ និងមជ្ឈមណ្ឌលបញ្ជាប្រតិបត្តិការ។ក្រុមសកម្មប្រយុទ្ធហាម៉ាស់កាលពីថ្ងៃសុក្របានបន្តបាញ់រ៉ុក្កែតឆ្ពោះទៅកាន់ប្រទេសអ៊ីស្រាអែល ដែលភាគច្រើនត្រូវបានស្ទាក់ចាប់ដោយប្រព័ន្ធការពារដែនអាកាស Iron Dome របស់អ៊ីស្រាអែល។យោងតាមសេវាសង្គ្រោះ Magen David Adom របស់អ៊ីស្រាអែល បានឱ្យដឹងថា មិនមានអ្នកស្លាប់និងរបួសត្រូវបានរាយការណ៍ទេ។ការបែកបាក់នៃបទឈប់បាញ់នេះក៏បង្កក្តីបារម្ភដល់ចំណាប់ខ្មាំងប្រហែល ១៤០ នាក់ដែលនៅតែជាប់ជាឈ្លើយនៅហ្គាហ្សា បន្ទាប់ពីជាង ១០០ នាក់ត្រូវបានដោះលែងក្នុងអំឡុងពេលបទឈប់បាញ់។កិច្ចខិតខំប្រឹងប្រែងសម្របសម្រួលដោយកាតា ដែលសម្របសម្រួលជាមួយអេហ្ស៊ីប និងសហរដ្ឋអាមេរិក បានបន្តពេញមួយថ្ងៃសុក្រ ដើម្បីបញ្ឈប់ភ្លើង និងដោះលែងចំណាប់ខ្មាំងបន្ថែមទៀត។
អ្នកនាំពាក្យយោធាអ៊ីស្រាអែលបានប្រាប់អ្នកសារព័ត៌មានថា ទោះបីជាមានអរិភាពជាថ្មីក៏ដោយ អ៊ីស្រាអែលសង្ឃឹមថា “យ៉ាងហោចណាស់នឹងបញ្ចប់ដំណាក់កាលនៃការដោះលែងស្ត្រី និងកុមារទាំងអស់នៅក្នុងកិច្ចព្រមព្រៀង” ។ការប្រយុទ្ធគ្នាក៏បានបន្តនៅតាមបណ្តោយព្រំដែនអ៊ីស្រាអែល-លីបង់ ដែលបណ្តាលឲ្យមនុស្សបីនាក់ស្លាប់ និងបីនាក់របួស។ក្រុមហេសបូឡាហ៍ ដែលជាក្រុមយោធាលីបង់ និកាយស៊ីអ៊ីត គាំទ្រដោយអ៊ីរ៉ង់ បាននិយាយថា ខ្លួនបានវាយប្រហារ ទាហានអ៊ីស្រាអែល នៅតាមព្រំដែន ដើម្បីគាំទ្រប៉ាឡេស្ទីន នៅតំបន់ហ្គាហ្សា។IDF បាននិយាយថា “យន្តហោះចម្បាំង ឧទ្ធម្ភាគចក្រ និងកាំភ្លើងធំបានវាយប្រហារហេដ្ឋារចនាសម្ព័ន្ធ Hezbollah ក្នុងប្រទេសលីបង់” ដើម្បីឆ្លើយតបទៅនឹងការបាញ់ប្រហារដោយក្រុមហេសបូឡា។ចំនួនអ្នកស្លាប់សរុបនៅហ្គាហ្សាចាប់តាំងពីការចាប់ផ្តើមនៃជម្លោះបានកើនឡើងដល់ជាង ១៥,០០០ នាក់ ខណៈដែលនៅក្នុងប្រទេសអ៊ីស្រាអែលច្រើនជាង ១,២០០ នាក់ត្រូវបានសម្លាប់ ដែលភាគច្រើនក្នុងអំឡុងពេលការវាយប្រហារដ៏គួរឱ្យភ្ញាក់ផ្អើលរបស់ក្រុមហាម៉ាសកាលពីថ្ងៃទី ៧ ខែតុលាដែលបង្កឱ្យមានជម្លោះ។
