ក្រសួងមហាផ្ទៃ រៀបចំពិធីបិទសិក្ខាសាលាស្តីពីការរៀបចំថវិកាសមិទ្ធកម្ម និងពង្រឹងការគ្រប់គ្រងទ្រព្យសម្បត្តិរដ្ឋ ឆ្នាំ២០២៣ ដែលបានបញ្ចប់ដោយជោគជ័យរយៈពេលពីរថ្ងៃ

ភ្នំពេញ៖ នារសៀលថ្ងៃសុក្រ ទី២៣ ខែវិច្ឆិកា ឆ្នាំ២០២៣ ក្រសួងមហាផ្ទៃ បានរៀបចំពិធីបិទសិក្ខាសាលាស្តីពី “ការរៀបចំថវិកាសមិទ្ធកម្ម និងពង្រឹងការគ្រប់គ្រងទ្រព្យសម្បត្តិរដ្ឋ” ដែលបានដំណើរការអស់រយៈពេលពីរថ្ងៃ ចាប់ពីទី២៣-២៤ ខែវិច្ឆិកា ឆ្នាំ២០២៣ នៅខេត្តសៀមរាប ក្រោមអធិបតីភាព ឯកឧត្តម នាយឧត្តមសេនីយ៍ សេង យូអ៊ាន់ អគ្គនាយក នៃអគ្គនាយកដ្ឋានភស្តុភារនិងហិរញ្ញវត្ថុ និងជាប្រធានក្រុមការងារកែទម្រង់ការគ្រប់គ្រងហិរញ្ញវត្ថុសាធារណៈ ក្រសួងមហាផ្ទៃ ដោយមានការអញ្ជើញចូលរួមពី ឯកឧត្តម លោកជំទាវ អគ្គនាយករង នៃអគ្គនាយកដ្ឋាន និងអង្គភាពចំណុះក្រសួមហាផ្ទៃ ប្រធាន អនុប្រធាននាយកដ្ឋាន នាយ នាយរងការិយាល័យ និងតំណាងស្នងការដ្ឋាននគរបាលរាជធានី-ខេត្ត ព្រមទាំងមន្ត្រីជំនាញ ជាច្រើនរូបផងដែរ។

លោកឧត្តមសេនីយ៍ទោ តិច សុខា ប្រធាននាយកដ្ឋានផែនការសេដ្ឋកិច្ចនិងហិរញ្ញវត្ថុ ផ្នែកសន្តិសុខសាធារណៈ នៃអគ្គនាយកដ្ឋានភស្តុភារ និងហិរញ្ញវត្ថុ បានធ្វើសេចក្តីរាយការណ៍សង្ខេបស្តីពី ដំណើរការរៀបចំសិក្ខាសាលាស្តីពី ការរៀបចំថវិកាសមិទ្ធកម្ម និងពង្រឹងការគ្រប់គ្រងទ្រព្យសម្បត្តិរដ្ឋ ឆ្នាំ២០២៣។ ដោយ លោកឧត្តមសេនីយ៍ទោ បានលើកឡើងថា សិក្ខាសាលាផ្សព្វផ្សាយក្នុងរយៈពេល២ថ្ងៃនេះ បានផ្តល់ឱកាសដល់មន្រ្តីជំនាញនៃក្រុមការងារថវិការបស់អង្គភាពថវិកានីមួយៗ ក្នុងការបង្ហាញពីបទពិសោធន៍ការងារ និងបញ្ហាប្រឈមរបស់ខ្លួន តាមជំនាញរៀងៗខ្លួន។ ជាមួយនោះផងដែរ លោកឧត្តមសេនីយ៍ទោ បានបន្ថែមថា សិក្ខាកាមបានចូលរួមយ៉ាងផុលផុសដោយបានលើកឡើងនូវសំណួរ និងការចូលរួមមតិយោបល់ផ្សេងៗជាច្រើនពាក់ព័ន្ធនឹងនីតិវិធី បទប្បញ្ញត្តិ បច្ចេកទេស ពាក់ព័ន្ធនឹងការអនុវត្តថវិកាកម្មវិធី លើទិដ្ឋភាពជាក់ស្តែងនៃការអនុវត្តការងារប្រចាំថ្ងៃរបស់ក្រសួងមហាផ្ទៃ ផ្នែកសន្តិសុខសាធារណៈ ដែលជាចំណេះដឹង និងបទពិសោធន៍ដ៏មានតម្លៃក្នុងការអនុវត្តការងារជាក់ស្ដែងក្នុងកិច្ចដំណើរការអនុវត្តថវិការបស់អង្គភាពរៀងៗខ្លួន។

ក្នុងឱកាសនោះ ឯកឧត្តម នាយឧត្តមសេនីយ៍ សេង យូអ៊ាន់ អគ្គនាយក នៃអគ្គនាយកដ្ឋានភស្តុភារនិងហិរញ្ញវត្ថុ និងជាប្រធានក្រុមការងារកែទម្រង់ការគ្រប់គ្រងហិរញ្ញវត្ថុសាធារណៈ ក្រសួងមហាផ្ទៃ បានអញ្ជើញថ្លែងសុន្ទរកថាបូកសរុបលទ្ធផលការងារនៃដំណើរការសិក្ខាសាលាបណ្តុះបណ្តាល ស្តីពី ការរៀបចំថវិកាសមិទ្ធកម្ម និងពង្រឹងការគ្រប់គ្រងទ្រព្យសម្បត្តិរដ្ឋ ឆ្នាំ២០២៣ លើកទី៨។ ឯកឧត្តម នាយឧត្តមសេនីយ៍ បានមានប្រសាសន៍លើកឡើងថា អង្គសិក្ខាសាលានៅថ្ងៃនេះ ពិតជាបានប្រព្រឹត្តទៅដោយរលូន និងជោគជ័យតាមការគ្រោងទុក និងបានផ្តល់ឱកាសគ្រប់គ្រាន់ឱ្យសិក្ខាកាមបានសិក្សាក្រេបជញ្ជក់នូវចំណេះដឹង ចំណេះធ្វើ និងបទពិសោធន៍ពាក់ព័ន្ធនឹងប្រធានបទសំខាន់ៗ ដែលផ្សារភ្ជាប់នូវទ្រឹស្តី និង ការអនុវត្តជាក់ស្តែង ពាក់ព័ន្ធនឹង ថវិកាសមិទ្ធកម្ម និងការគ្រប់គ្រងទ្រព្យសម្បត្តិរដ្ឋ។

ជាមួយគ្នានោះ ឯកឧត្តម នាយឧត្តមសេនីយ៍ បានមានប្រសាសន៍វាយតម្លៃខ្ពស់ថា សិក្ខាសាលានេះពិតជាទទួលផ្លែផ្កាដ៏ល្អត្រចះត្រចង់ ពោលគឺ សិក្ខាកាមទាំងអស់ ទទួលបានចំណេះដឹង ដែលឆ្លើយតបទៅនឹងសេចក្តីត្រូវការពិតប្រាកដ ក្នុងការអនុវត្តការងារជាក់ស្តែង។

ឯកឧត្តម នាយឧត្តមសេនីយ៍ អគ្គនាយក នៃអគ្គនាយកដ្ឋានភស្តុភារនិងហិរញ្ញវត្ថុ និងជាប្រធានក្រុមការងារកែទម្រង់ការគ្រប់គ្រងហិរញ្ញវត្ថុសាធារណៈ បានគូសបញ្ជាក់ថា សិក្ខាសាលាបណ្ដុះបណ្ដាលរយៈពេល ២ថ្ងៃនេះ មិនត្រឹមតែជាការចូលរួមដល់ការគាំទ្រ និងការអនុវត្តការកែទម្រង់ការគ្រប់គ្រងហិរញ្ញវត្ថុសាធារណៈ ឱ្យសម្រេចគោលដៅដែលបានកំណត់ ប៉ុណ្ណោះទេ ប៉ុន្តែថែមទាំង រួមចំណែកដល់ការអភិវឌ្ឍធនធានមនុស្ស និងមូលធនមនុស្ស ដែលរាជរដ្ឋាភិបាល នីតិកាលទី៧ នេះ ចាត់ទុកជាអាទិភាពខ្ពស់បំផុតនៅក្នុងយុទ្ធសាស្ត្របញ្ចកោណដំណាក់កាលទី១ របស់រាជរដ្ឋាភិបាលអណ្ណិតទី៧ ដែលបានប្រកាសដាក់ឱ្យអនុវត្តកាលពីថ្ងៃទី២៤ ខែសីហា ឆ្នាំ២០២៣ កន្លងទៅ។

ជាមួយគ្នានោះ ឯកឧត្តម នាយឧត្តមសេនីយ៍ បានផ្តល់អនុសាសន៍មួយចំនួនដល់សិក្ខាកាម ដើម្បីជាមូលដ្ឋានសម្រាប់អនុវត្តការងារ និងពង្រឹងភាពជាម្ចាស់ការទទួលខុសត្រូវ ដែលរួមមាន៖

ទី១. ឱ្យយកចំណេះដឹង និងបទពិសោធន៍ដែលទទួលបាន ទៅប្រើប្រាស់នៅក្នុងការដ្ឋានការងារជាក់ស្តែងរបស់ខ្លួន និងសូមបន្តសិក្សាដកយកពិសោធន៍ និងស្វែងយល់ថែមទៀត ព្រមទាំងចែករំលែកចំណេះដឹង និងបទពិសោធន៍ទាំងនេះ ជូនដល់មន្រ្តីក្រោមឳវាទនៅតាមអង្គភាពរៀងៗខ្លួន។

ទី២. ឱ្យពង្រឹង និងធានាកិច្ចប្រតិបត្តិការចំណាយថវិកា និងការរៀបចំរបាយការណ៍ប្រកបដោយប្រសិទ្ធភាព ស័ក្តសិទ្ធិភាព ប្រកបដោយការសន្សំសំចៃ អនុលោមតាមគោលការណ៍ និងត្រឹមត្រូវតាមនីតិវិធីហិរញ្ញវត្ថុ ជាធរមាន។

ទី៣. សូមផ្សារភ្ជាប់ការវិភាជថវិកាទៅនឹងសកម្មភាពការងារជាក់ស្ដែង និង ត្រូវមានកម្មវិធី ផែនការសកម្មភាពច្បាស់លាស់ ដើម្បីលើកម្ពស់ការផ្សារភ្ជាប់ថវិកាទៅនឹងគោលដៅអាទិភាពរបស់អង្គភាពនីមួយៗ។

ទី៤.

ឱ្យរៀបចំចូលរួមសហការរៀបចំផែនការយុទ្ធសាស្រ្តថវិកា ៣ ឆ្នាំរំកិល និងផែនការថវិកាតាមប្រព័ន្ធថវិកាសមិទ្ធកម្មនាពេលខាងមុខឳ្យបានត្រឹមត្រូវច្បាស់លាស់ ស្របតាមទម្រង់ និងគោលការណ៍ណែនាំជាធរមាន។

ទី៥. សូមរៀបចំចូលរួមសហការគ្រប់គ្រងនិងរៀបចំបញ្ជីសាពើភណ្ឌទ្រពសម្បត្តិរដ្ឋ និងសិក្សាពីប្រព័ន្ធ FMIS លើមុខងារគ្រប់គ្រងទ្រព្យសម្បត្តិរដ្ឋដែលមុខងារថ្មីនឹងត្រូវអនុវត្តនាពេលខាងមុខនេះ។

ទី៦. ប្រសិនបើជួបបញ្ហាប្រឈម នៅក្នុងដំណើរការអនុវត្តការចំណាយថវិកា ដើម្បីជៀសវាងការរាំងស្ទះដល់ដំណើការអនុវត្តការងាររបស់អង្គភាពទាំងមូល សូមស្រូតរូតរកដំណោះស្រាយជាបន្ទាន់តាមរយៈ ការសុំពិគ្រោះយោបល់ផ្ទាល់ជាមួយថ្នាក់ដឹកនាំ ឬអង្គភាពទទួលបន្ទុកហិរញ្ញវត្ថុ ដើម្បីស្វែងរកដំណោះស្រាយ និង មានចំណាត់ការសមស្រប ៕