ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានមានប្រសាសន៍ថា ការដាក់គោលដៅដើម្បីក្លាយជាប្រទេសមានចំណូលមធ្យមកម្រិតខ្ពស់ ឬជាប្រទេសអ្នកមាននៅឆ្នាំ២០៥០ មិនមែនជាការស្រមើស្រមៃឡើយ។ ទោះយ៉ាងណា សម្តេចបានគូសបញ្ជាក់ថា បើទោះជាមានការចោទថា «ជាការស្រមើស្រមៃ» ក្ដី តែវាទាមទារនូវការស្រមៃនិងការដាក់ទិសដៅ ដើម្បីឱ្យយើងខំប្រឹងសម្រេចឲ្យបាន។
ក្នុងឱកាសអញ្ជើញចុះជួបសំណេះសំណាលជាមួយបងប្អូនកម្មករ និយោជិត ចំនួន ១៨,១០៨នាក់ នៅតាមបណ្តារោងចក្រ សហគ្រាសចំនួន ១៣រោងចក្រ ដែលមានមូលដ្ឋានក្នុងខណ្ឌកំបូល រាជធានីភ្នំពេញ នាព្រឹកថ្ងៃទី២១ ខែវិច្ឆិកា ឆ្នាំ២០២៣ សម្តេចធិបតី ហ៊ុន ម៉ាណែត បានថ្លែងថា រដ្ឋាភិបាលអាចមិនចាំបាច់កំណត់សូចនាករឆ្នាំ២០៥០ ឱ្យក្លាយជាប្រទេសអ្នកមានក៏បាន ពោលគឺអាចដាក់ក្នុងកម្រិតណាមួយ ហើយមិនបាច់ខំប្រឹងទេ ក៏ប៉ុន្តែរាជរដ្ឋាភិបាលត្រូវដាក់ក្តីរំពឹងឲ្យខ្ពស់ ហើយខំប្រឹងសម្រេចឲ្យបាន ដើម្បីយកផលជូនដល់ប្រជាជនកម្ពុជាឲ្យបានកាន់តែច្រើន។
សម្តេចធិបតី នាយករដ្ឋមន្ត្រី បានបញ្ជាក់ថា ការដាក់គោលដៅនៅឆ្នាំ២០៥០ ដើម្បីក្លាយជាប្រទេសអ្នកមាន ហើយខិតខំសម្រេចឲ្យបាន គឺជាភារកិច្ចនិងបេសកកម្មដែលរាជរដ្ឋាភិបាលត្រូវធ្វើសម្រាប់ជាតិនិងប្រជាជន ៕
