ឯកឧត្តមផុសសុវណ្ណ៖ ប្រព័ន្ធផ្សព្វផ្សាយដើរតួនាទីសំខាន់ក្នុងការអប់រំ និងបញ្ជ្រាបវប្បធម៌កម្ពុជា-ចិន

ភ្នំពេញ៖ ឯកឧត្តមផុសសុវណ្ណបានមានប្រសាសន៍ថា ក្រៅពីផ្សព្វផ្សាយព័ត៌មានដល់សាធារណជន ប្រព័ន្ធផ្សព្វផ្សាយទាំងអស់ គឺពិតដើរតួនាទីយ៉ាងសំខាន់ក្នុងការអប់រំ និង ការបញ្ជ្រាបវប្បធម៌រវាងកម្ពុជា និងចិនតាមគ្រប់រូបភាព និងគ្រប់មធ្យោបាយ។
នៅក្នុងវេទិកាជាន់ខ្ពស់នៃប្រព័ន្ធផ្សព្វផ្សាយកម្ពុជា-ចិន និង វេទិកាផ្លាស់ប្ដូរវប្បធម៌កម្ពុជា-ចិន លើកទី ៣ នៅឯសណ្ឋាគាសុខាភ្នំពេញ ឯកឧត្តមផុសសុវណ្ណ អគ្គនាយក នៃអគ្គនាយកដ្ឋានព័ត៌មាន និងសោតទស្សន៍ក្រសួងព័ត៌មានមានប្រសាសន៍ថា អ្នកសារព័ត៌មានបានផ្សព្វផ្សាយតាមរយៈមធ្យោបាយផ្សេងៗដូចជាសៀវភៅ ទស្សនាវដ្ដី កម្មវិធីទូរទស្សន៍ និងអ៊ិនធឺណិតជាដើម ប្រព័ន្ធផ្សព្វផ្សាយអាចបញ្ជ្រាបចំណេះដឹងវប្បធម៌ផ្សេងៗដល់សាធារណជន និងលើកកម្ពស់អក្ខរកម្មវប្បធម៌របស់ប្រជាជន។ លើសពីនេះ ប្រព័ន្ធផ្សព្វផ្សាយក៏ផ្តល់ឱ្យទស្សនិកជននូវធនធានសិក្សាជាច្រើន ដូចជាវគ្គបង្រៀនវប្បធម៌ បាឋកថា និងការតាំងពិព័រណ៌ជាដើម ដើម្បីជួយមហាជនឱ្យយល់ដឹងយ៉ាងស៊ីជម្រៅ អំពីអត្ថន័យ និងលក្ខណៈពិសេសនៃវប្បធម៌ផ្សេងៗគ្នា។
ឯកឧត្តមបញ្ជាក់ថា ប្រព័ន្ធផ្សព្វផ្សាយក្នុងពេលកំពុងបន្តស្នងវប្បធម៌ប្រពៃណីដ៏ល្អឆ្នើមហើយ ក៏បានជំរុញការច្នៃប្រឌិត និងការអភិវឌ្ឍន៍វប្បធម៌ផងដែរ។ ថ្មីៗនេះ អគ្គស្ថានីយវិទ្យុ និង ទូរទស្សន៍មជ្ឈិមចិន បានរៀបចំផែនការរៀបចំការតាំងពិព័រណ៍ទេសចរណ៍ជាសកលមួយឈ្មោះថា “អ្វីជាអរិយធម៌” ដោយប្រើការច្នៃប្រឌិតបច្ចេកវិទ្យាបែបឌីជីថល និងទំនើប ដើម្បីស្តារវប្បធម៌ប្រពៃណីដ៏ល្អឥតឆ្នើម និងបំពេញតួនាទីយ៉ាងសកម្មនៃប្រព័ន្ធផ្សព្វផ្សាយក្នុងការលើកកម្ពស់ការផ្លាស់ប្តូរ និងការរៀនសូត្រពីគ្នាទៅវិញទៅមករវាងអរិយធម៌ផ្សេងៗគ្នា។
ឯកឧត្តមបន្តថា នៅដើមឆ្នាំ២០២៣ អគ្គស្ថានីយវិទ្យុនិងទូរទស្សន៍មជ្ឈិមចិនបានចុះហត្ថលេខាលើអនុស្សរណៈនៃកិច្ចសហប្រតិបត្តិការជាមួយក្រសួងព័ត៌មាន។ ជាមួយគ្នានេះ ឯកឧត្តមបានអំពាវនាវឱ្យប្រព័ន្ធផ្សព្វផ្សាយកម្ពុជានិងចិនសហការគ្នាយ៉ាងសកម្ម និងពង្រឹងកិច្ចសហប្រតិបត្តិការក្នុងការផ្លាស់ប្តូរព័ត៌មាន ទំនាក់ទំនងធនធានមនុស្ស និងការច្នៃប្រឌិតបច្ចេកវិទ្យាប្រព័ន្ធផ្សព្វផ្សាយជាដើម ដើម្បីជួយធ្វើឱ្យទំនាក់ទំនងកម្ពុជាចិនបន្តដំណើរទៅមុខឆ្ពោះទៅកម្រិតថ្មីមួយទៀត និងរួមចំណែកជាថាមពលនៃប្រព័ន្ធផ្សព្វផ្សាយដល់ “ឆ្នាំនៃការផ្លាស់ប្តូរប្រជាជននិងប្រជាជនកម្ពុជា-ចិន” ឆ្នាំ២០២៤។
កញ្ញា Yao Shiya ប្រធានគ្រប់គ្រងវិទ្យុមិត្តភាពកម្ពុជាចិន បានលើកឡើងថា ឆ្នាំនេះគឺជាខួបគម្រប់៦៥ឆ្នាំនៃការបង្កើតចំណងការទូតកម្ពុជាចិន និង ជាឆ្នាំមិត្តភាពកម្ពុជាចិន ហើយក៏ជាខួបគម្រប់១០ឆ្នាំនៃការរួមគ្នាកសាង”ខ្សែក្រវាត់និងផ្លូវ”រវាងកម្ពុជានិងចិនផងដែរ។
មិត្តភាពជាប្រពៃណីរវាងប្រទេសទាំងពីរកម្ពុជានិងចិនស្ថិតស្ថិរគង់វង្សយូរអង្វែង។ ពួកយើងបានមើលឃើញថា មានស្ពានភ្ជាប់ទឹកចិត្ត កំពុងផែវិបុលភាព និង ផ្លូវសុភមង្គលជាច្រើន កំពុងរីកស្គុះស្គាយនៅលើទឹកដីកម្ពុជា។ ឆ្នាំ២០២៣ វិទ្យុមិត្តភាពកម្ពុជាចិន នៃអគ្គស្ថានីយវិទ្យុ និង ទូរទស្សន៍មជ្ឈិមចិន បានទៅធ្វើសេចក្ដីរាយការណ៍ផ្ទាល់ទៅទីកន្លែងជាច្រើនដូចជាទីក្រុងភ្នំពេញ ខេត្តព្រះសីហនុ ខេត្តស្ទឹងត្រែង ខេត្តកណ្ដាលជាដើម ដែលនេះមិនត្រឹមតែធ្វើឱ្យកាម៉េរ៉ា និង ម៉ៃក្រូហ្វូននៃប្រព័ន្ធផ្សព្វផ្សាយ ក្លាយជា “ឧឃោសនសព្ទផ្សាយសំឡេង” នៃគោលនយោបាយរបស់ប្រទេសទាំងពីរ តែក៏ក្លាយជា”កញ្ចក់ឆ្លុះបញ្ចាំង”លទ្ធផលនៃការរួមគ្នាកសាងខ្សែក្រវាត់និងផ្លូវ”រវាងកម្ពុជានិងចិន និងជា”បង្អួចសន្ទនា”ឆ្លើយឆ្លងរវាងទស្សនិកជននៃប្រទេសទាំងពីរកម្ពុជានិងចិន។
កញ្ញាបន្តថា នវានុវត្តន៍បច្ចេកទេសមិនត្រឹមតែផ្ដល់ថាមពលដល់វឌ្ឍនភាពប្រព័ន្ធផ្សព្វផ្សាយប៉ុណ្ណោះទេ គឺរឹតតែជាសម្បត្តិដ៏អស្ចារ្យសម្រាប់ប្រទេសទាំងពីរពង្រឹងទំនាក់ទំនងព័ត៌មាន ធ្វើឱ្យស៊ីជម្រៅនូវការរួមបញ្ចូលវប្បធម៌ ក៏ដូចជាជំរុញការផ្សារភ្ជាប់ទឹកចិត្តប្រជាជនផងដែរ។ អនាគត ពួកយើងទន្ទឹងរង់ចាំ ការយកនវានុវត្តន៍បច្ចេកទេសជាតំណភ្ជាប់ បន្តផ្សារភ្ជាប់ឱ្យស៊ីជម្រៅរវាងប្រព័ន្ធផ្សព្វផ្សាយ មហាជន និង មជ្ឈដ្ឋានគ្រប់វិស័យទាំងអស់ ដើម្បីចូលរួមជាកម្លាំងក្នុងកិច្ចសហប្រតិបត្តិការប្រព័ន្ធអភិវឌ្ឍផ្សព្វផ្សាយ និង ការផ្លាស់ប្ដូរវប្បធម៌ រវាងកម្ពុជានិងចិន! ៕