សម្តេចធិបតី អំពាវនាវឲ្យគណៈសង្ឃទាំងពីរគណៈ និងថ្នាក់ដឹកនាំគ្រប់សាសនា បន្តសហការជាមួយក្រសួងធម្មការ ដើម្បីថែរក្សាសុខដុមរមនីយកម្មសាសនា សាមគ្គីភាពនិងវឌ្ឍនភាពសង្គម

ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានបន្តអំពាវនាវដល់គណៈសង្ឃទាំងពីរគណៈ និងថ្នាក់ដឹកនាំគ្រប់សាសនា នៅក្នុងព្រះរាជាណាចក្រកម្ពុជា បន្តកិច្ចសហការជាមួយក្រសួងធម្មការ និងសាសនា ដើម្បីចូលរួមថែរក្សាសុខដុមរមនាកម្មសាសនា សាមគ្គីភាពនិងវឌ្ឍនភាពសង្គម ។

នាឱកាស អញ្ជើញស្រោចស្រពព្រះសុគន្ធវារី ប្រគេនព្រះមន្ត្រីសង្ឃជាន់ខ្ពស់ គណៈមហានិកាយ នៃព្រះរាជាណាចក្រកម្ពុជាចំនួន១១អង្គនៅវត្តមុនីសុវណ្ណ ហៅវត្ត ចំពុះក្អែក ក្នុងសង្កាត់ព្រែកថ្មី ខណ្ឌច្បារអំពៅ រាជធានីភ្នំពេញ នាថ្ងៃទី១៧ ខែវិច្ឆិកា សម្តេចធិបតី ហ៊ុន ម៉ាណែត បានគូសបញ្ជាក់ថា «សូមគណៈសង្ឃទាំងពីរគណៈនិងថ្នាក់ដឹកនាំគ្រប់សាសនា នៅក្នុងព្រះរាជាណាចក្រកម្ពុជា បន្តកិច្ចសហការជាមួយក្រសួងធម្មការ និងសាសនា ដើម្បីចូលរួមថែរក្សាសុខដុមរមនីយកម្មសាសនា សាមគ្គីភាពនិងវឌ្ឍនភាពសង្គម។ ក្រសួងធម្មនិងសាសនា ត្រូវបន្តសហការជាមួយក្រសួងស្ថាប័នពាក់ព័ន្ធទាំងគ្រប់ភាគីពាក់ព័ន្ធ ដើម្បីជួយលើកកម្ពស់សាសនានិងសីលធម៌សង្គម»។

សម្តេចបន្ថែមថា ក្រសួងធម្មការនិងសាសនា ត្រូវបន្តជំរុញការរៀបចំច្បាប់ស្ដីពីសាសនាឲ្យបានឆាប់តាមដែលអាចធ្វើទៅបាន ដើម្បីធ្វើជាមូលដ្ឋានក្នុងកិច្ចប្រតិបត្តិការងារក្នុងវិស័យសាសនា និងបំពេញបន្ថែមលើលិខិតបទដ្ឋានគតិយុត្តនានាក្រោយច្បាប់ ដើម្បីបំពេញតម្រូវការជាក់ស្ដែងរបស់ក្រសួងសម្រាប់លើកកម្ពស់ព្រះពុទ្ធសាសនា ក៏ដូចជាសាសនាផ្សេងៗទៀតទៅកម្ពុជា លើកកម្ពស់សីលធម៍សង្គម សុខដុមនីយកម្មសាសនានៅក្នុងព្រះរាជាណាចក្រកម្ពុជាទាំងមូល។

សម្តេចមហាបវរធិបតី សូមឱ្យសម្តេចជាអម្ចាស់ សម្តេចព្រះថេរានុត្ថេរៈគ្រប់ព្រះអង្គ ព្រះមេត្តាបន្តផ្ដោតព្រះទ័យជួយជំរុញ និងលើកកម្ពស់ការប្រតិបត្តិធម៍វិន័យឲ្យបានត្រឹមត្រូវតាមពុទ្ធដិកា ដើម្បីជាយានសម្រាប់ចម្លង និងជាស្រែបុណ្យប្រកបដោយសម្មាតិធិ និងជាការសន្សំបុណ្យកុសលសម្រាប់ព្រះសង្ឃរៀងៗព្រះអង្គ និងពុទ្ធបរិស័ទឲ្យមានសុខសន្តិភាព និងការវិវឌ្ឍជានិច្ចនិរន្តន៍។

សម្តេចមហាបវរធិបតី ហ៊ុន ម៉ាណែត ក៏សូមសម្តេចជាអម្ចាស់ សម្ដេចព្រះរាជាគណៈព្រះថេរានុត្ថេរៈគ្រប់ព្រះអង្គ ព្រះមេត្តាបន្តជួយដល់សង្គមជាតិ លើការលើកកម្ពស់គុណធម៌ សីលធម៍ សុជីវធម៌ ថែរក្សាវប្បធម៌អរិយធម៌ប្រពៃណីទំនៀមទម្លាប់ដ៏ថ្លៃថ្លារបស់ជាតិ តាមរយៈការសម្ដែងធម្មទេសនានៅគ្រប់ទីកន្លែង និងការផ្សព្វផ្សាយ​តាមបណ្ដាញសង្គម ដើម្បីជួយធ្វើឲ្យប្រជាជនកម្ពុជាមាននូវបញ្ញាស្មារតីប្រកបដោយព្រហ្មវិហារធម៍ កាត់បន្ថយអំពើអនាចារ អបាយមុខ អំពើហិង្សា អសីលធម៍ និងចូលរួមជួយឱ្យសង្គមជាតិមានសុខដុមរមនា និងពង្រឹងសាមគ្គីធម៍ផងដែរ៕