ភ្នំពេញ៖ ដោយអនុវត្តន៍តាមបទបញ្ជាយ៉ាងម៉ឺងម៉ាត់ពី លោកឧត្តមសេនីយ៍ទោ ឈាង ផាន់ណារ៉ា ស្នងការនគរបាលខេត្តតាកែវ និងមានការសម្រប សម្រួលនីតិវិធីពី ឯកឧត្តម ឯក ឆេងហួត ព្រះរាជអាជ្ញាអមសាលាដំបូងខេត្តតាកែវ នៅថ្ងៃសៅរ៍ ទី០៤ ខែវិច្ឆិកា ឆ្នាំ២០២៣ លោកវរសេនីយ៍ទោ កប សេម អធិការ នៃអធិការដ្ឋាននគរបាលស្រុក បានបញ្ជាអោយកម្លាំងជំនាញ និងអន្តរាគមន៍ស្រុក ល្បាតតាមគោលដៅសំខាន់ៗ នៅវេលាម៉ោង១:៣០នាទី រំលងអាធ្រាត ឃាត់ខ្លួនជនសង្ស័យចំនួន០២នាក់ នៅលើផ្លូវជាតិលេខ២ ភូមិជ្រែ ឃុំជីខ្មា ស្រុកទ្រាំង ខេត្តតាកែវ ។
ជនសង្ស័យទាំង ២នាក់នោះរួមមាន៖
១- ឈ្មោះ ព្រីង ភុង ភេទប្រុស អាយុ ២៦ឆ្នាំ មុខរបរកសិករ រស់នៅភូមិតាប៊ួ ឃុំពេជសារ ស្រុកកោះអណ្តែត ខេត្តតាកែវ ( មុខសញ្ញាជួញដូរសារធាតុញៀន ) ។
២- ឈ្មោះ ប៉ិល វុទ្ធី ភេទប្រុស អាយុ៣០ឆ្នាំ មុខរបរកសិករ រស់នៅភូមិព្រៃធំ ឃុំពេជសារ ស្រុកកោះអណ្តែត ខេត្តតាកែវ ។
ក្នុងប្រតិបត្តិការណ៍នោះ ដកហូតបានម្សៅក្រាម ពណ៌សថ្លា សង្ស័យជាសារធាតុញៀន ០៣កញ្ចប់ ទូរស័ព្ទដៃចំនួន០២ គ្រឿង ម៉ូតូ០១គ្រឿង ម៉ាកHonda C១២៥ សេរីឆ្នាំ២០១២ ពាក់ស្លាកលេខ ភ្នំពេញ ១BD ៥៨១៧ លុយចំនួន៨០.០០០៛ ( ប្រាំបីម៉ឺនរៀលគត់) ។
បច្ចុប្បន្នកម្លាំងជំនាញ កំពុងធ្វើការសាកសួរ កសាងសំណុំរឿងតាមនីតិវិធី បញ្ជូនទៅស្នងការដ្ឋាននគរបាលខេត្ត ៕
