សម្ដេចធិបតី ហ៊ុន ម៉ាណែត ឆ្លើយតបទៅក្រុមប្រឆាំងដែលថា ហ៊ុន ម៉ាណែត ពង្រឹកអំណាច ដើម្បីតែបក្សពួកខ្លួន ខណៈសម្ដេចខិតខំដើម្បីប្រជាពលរដ្ឋទូទាំងប្រទេស
ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានចំអកឱ្យក្រុមប្រឆាំងថា ហ៊ុន ម៉ាណែត ពង្រឹកអំណាច ដើម្បីតែបក្សពួកខ្លួន ខណៈសម្ដេចខិតខំដើម្បីប្រជាពលរដ្ឋទូទាំងប្រទេស សម្ដេចថ្លែងថានេះជាភាសាបកស្រាយយកជ្រុងចង្អៀតចង្អល់លើទស្សនៈទូលំទូលាយ គេចោទក្នុងទស្សនៈចង្អៀតចង្អល់ថា អ្វីដែលខ្ញុំធ្វើ នេះដើម្បីតែបក្សពួកមួយក្ដាប់តូច សម្រាប់ខ្ញុំគឺខ្ញុំធ្វើសម្រាប់បក្សពូកខ្ញុំ១៧លាននាក់ ហើយអ្នកមានអំណាចគឺពលរដ្ឋហ្នឹងឯងផ្ដល់ ឱកាសឱ្យគណបក្សប្រជាជនកម្ពុជាដឹកនាំប្រទេស។
ក្នុងឱកាសអញ្ជើញជួបសំណេះសំណាលជាមួយបងប្អូនកម្មករ និយោជិត ចំនួន ១៨.០២៨នាក់ នៅតាមបណ្តារោងចក្រ សហគ្រាស ដែលមានមូលដ្ឋានក្នុងខណ្ឌមានជ័យ និងខណ្ឌពោធិ៍សែនជ័យ រាជធានីភ្នំពេញ នាព្រឹកថ្ងៃសៅរ៍ ១៤កើត ខែអស្សុជ ឆ្នាំថោះ បញ្ចស័ក ពុទ្ធសករាជ២៥៦៧ ត្រូវនឹងថ្ងៃទី២៨ ខែតុលា ឆ្នាំ២០២៣នេះ សម្តេចធិបតី បានប្រសាសន៍ថា សម្ដេចមានតែរៀបចំគោល នយោបាយ បន្ថែមទៀត ដើម្បីប្រជាជនមានសុខសន្ដិភាព មានការអភិវឌ្ឍ ផ្ទុយពីការចោទប្រកាន់របស់ជនអគតិមួយចំនួនថា ធ្វើដើម្បីតែក្រុមខ្លួនឯង។
សម្ដេចធិបតី បានបញ្ជាក់ថា គណបក្សប្រជាជនកម្ពុជា ប្ដេជ្ញាដឹកនាំប្រទេសឱ្យមានសុខសន្ដិភាព និងជំរុញការអភិវឌ្ឍ ដើម្បីឆ្លើយតប ចំពោះការបោះឆ្នោតជូនគណបក្សប្រជាជនកម្ពុជា ក្នុងការដឹកនាំប្រទេស ៕
