ឧត្តមសេនីយ៍ឯក ឯក សំអូន បិទវគ្គហ្វឹកហ្វឺនក្បាច់គុន កងយោធពលខេមរភូមិន្ទ និងបើកវគ្គហ្វឹកហ្វឺន ទូទៅនៅនឹងកន្លែង របស់វរសេនាតូចថ្មើរជើងលខ ៥៣៣, ៥៣៤ កងពលតូចថ្មើរជើងលេខ៥៣
ភ្នំពេញ៖ ឯកឧត្តម ឧត្តមសេនីយ៍ឯក ឯក សំអូន មេបញ្ជាការរង កងទ័ពជើងគោក មេបញ្ជាការ យោធភូមិភាគទី៥ នាថ្ងៃទី៣ ខែតុលា ឆ្នាំ២០២៣ បានអញ្ជើញបិទវគ្គហ្វឹកហ្វឺនបំប៉នពង្រឹង វរសេនាតូចថ្មើរជើងលេខ៥៣៤ វគ្គហ្វឹកហ្វឺនក្បាច់គុននៃកងយោធពលខេមរភូមិន្ទ និង បើកវគ្គហ្វឹកហ្វឺនទូទៅនៅនឹងកន្លែង របស់វរសេនាតូចថ្មើរជើងលខ ៥៣៣, ៥៣៤ កងពលតូចថ្មើរជើងលេខ៥៣ នៅទីបញ្ជាការកងពលតូចថ្មើរជើងលេខ៥៣។
មានមតិសំណេះសំណាលក្នុងឱកាសនេះ ឯកឧត្តម ឯក សំអូន បានលើកឡើងថា សិក្ខាកាមបើកវគ្គនេះត្រូវយកចិត្តទុកដាក់គោរពវិន័យ មានសីលធម៌ល្អ មានសាមគ្គីឯកភាពគ្នាខិតខំប្រឹងប្រែងក្នុងការរៀនសូត្រដើម្បីទទួលលទ្ធផលបានល្អប្រសើរគ្រប់ៗគ្នា ត្រូវគោរពច្បាប់រដ្ឋធម្មនុញ្ញ ច្បាប់លក្ខន្តិកៈ នៃកងយោធពលខេមរភូមិន្ទ យកចិត្តទុកដាក់ ខិតខំក្រេបជញ្ជក់ចំណេះដឹងពីគ្រូដើម្បីយកទៅអនុវត្តនៅអង្គភាពឲ្យបានល្អ ការហ្វឹកហ្វឺនកងទ័ព ជាវិស័យអាទិភាពមួយ នៃការកែទម្រង់ របស់កងយោធពលខេមរភូមិន្ទ សំដៅធ្វើទំនើបកម្ម និងបង្កើនសមត្ថភាព ដើម្បីការពារបូរណភាពទឹកដី ការពារសន្តិភាព ការពាររាជរដ្ឋាភិបាលស្របច្បាប់ ការពារសន្តិសុខ និងសណ្ដាប់ធ្នាប់សាធារណៈ ក៏ដូចជាការអភិវឌ្ឍន៍លើគ្រប់វិស័យនៅកម្ពុជា។
បច្ចុប្បន្នការងារហ្វឹកហ្វឺនបានដើរតួនាទីជាយុទ្ធសាស្ត្រយ៉ាងសំខាន់ ក្នុងការពង្រឹងខឿនការពារជាតិ តាមរយៈការផ្ដល់នូវចំណេះដឹង និងចំណេះធ្វើ ពិតប្រាកដឱ្យដល់កងទ័ព ជាពិសេសយោធិនដែលមានវ័យក្មេង ដែលជាប្រភពបន្តវេនជំនាន់ក្រោយ។ ត្រូវប្តេជ្ញាចូលរួមអនុវត្តឱ្យបាន សម្រេចជោគជ័យ នូវយុទ្ធសាស្ត្របញ្ចកោណដំណាក់កាលទី១ នីតិកាលទី៧ របស់រដ្ឋាភិបាល រងចាំទទួលបទបញ្ជា ផែនការ សេចក្ដីណែនាំរបស់ថ្នាក់លើគ្រប់ជាន់ថ្នាក់ និងសូមប្តេជ្ញាការពាររដ្ឋធម្មនុញ្ញ ការពារព្រះមហាក្សត្រ រាជរដ្ឋាភិបាលស្របច្បាប់ ដែលកើតចេញពីឆន្ទៈរបស់ប្រជាពលរដ្ឋ ធានាការពាររាជបល្ល័ង្ក របបរាជានិយមអាស្រ័យរដ្ឋធម្មនុញ្ញ នៅកម្ពុជា ការពារឱ្យបានដាច់ខាតនូវសុខសន្តិភាព ស្ថិរភាពសង្គម អធិបតេយ្យភាព បូរណភាពទឹកដី វាយកម្ទេចរាល់ឧបាយកលអគិតិ ប៉ុនប៉ង បង្កើតឱ្យមានចលនាបដិវត្តន៍ពណ៌នៅកម្ពុជា។
ឯកឧត្តម ឧត្តមសេនីយ៍ឯក ឯក សំអូន បានធ្វើការកោតសរសើរចំពោះសិក្ខាកាមដែលបានឆ្លងកាត់វគ្គហ្វឹកហ្វឺនរហូតទទួលបានលទ្ធផលល្អប្រសើរ និងសូមឱ្យសិក្ខាកាមដែលបានបញ្ចប់វគ្គក្នុងថ្ងៃនេះបន្តចែករំលែកនូវចំណេះដឹងរបស់ខ្លួន ដល់អ្នកដែលមិនចេះ ហើយចំពោះសិក្ខាកាមដែលត្រូវបានបើកវគ្គហ្វឹកហ្វឺនបំប៉នទូទៅនៅនឹងកន្លែង ត្រូវបន្តយកចិត្តទុកដាក់សិក្សារៀនសូត្រពីយោធាចារ្យ ហើយគោរពឲ្យបាននូវវិន័យផ្សេងៗរបស់អង្គភាពដើម្បីធានាបាននូវគុណភាពសិក្សាប្រកបដោយគុណភាពខ្ពស់។
ជាចុងបញ្ជាប់ ឯកឧត្តម ឧត្តមសេនីយ៍ឯក បានប្រគល់លិខិតបញ្ជាក់ការសិក្សា និងប័ណ្ណសរសើរ ជូនដល់សិក្ខាកាម និងឧបត្ថម្ភថវិកា ចំនួន ២.០០០.០០០រៀល និងប្រកាសបិទវគ្គ និងបើកវគ្គចាប់ពីពេលនេះតទៅ ។
សូមបញ្ជាក់ផងដែរថា វគ្គហ្វឹកហ្វឺនបំប៉នពង្រឹង វរសេនាតូចថ្មើរជើងលេខ៥៣៤ លទ្ធផលចំណាត់ថ្នាក់ជារួម
-និទ្ទេសល្អ ចំនួន ១៧នាក់ ស្មើ ១៧%
-និទ្ទេសល្អបង្គួរ ចំនួន ៦៥នាក់ ស្មើ ៦៥ %
-និទ្ទេសមធ្យម ចំនួន ១៨នាក់ ស្មើ ១៨%
និងវគ្គហ្វឹកហ្វឺនក្បាច់គុន នៃកងយោធពលខេមរភូមិន្ទ
+លទ្ធផលចំណាត់ថ្នាក់ជារួម
-និទ្ទេសល្អ ចំនួន ១៦នាក់ ស្មើ ១៦%
-និទ្ទេសល្អបង្គួរ ចំនួន ៥៣នាក់ ស្មើ ៥៣ %
-និទ្ទេសមធ្យម ចំនួន ៣១នាក់ ស្មើ ៣១%
ដោយឡែកចំពោះវគ្គហ្វឹកហ្វឺនដែលត្រូវបើកវគ្គបន្តនាពេលនេះ បើកវគ្គហ្វឹកហ្វឺន ទូទៅនៅនឹងកន្លែង របស់វរសេនាតូចថ្មើរជើងលខ ៥៣៣, ៥៣៤ កងពលតូចថ្មើរជើងលេខ៥៣ មានសិក្ខាកាម ចំនួន ៣២០នាក់ សិក្សារយៈពេល ៩៦ថ្ងៃ ៕
