កៀវ៖ អ្នកនាំពាក្យយោធាអ៊ុយក្រែនបានឲ្យដឹងកាលពីថ្ងៃពុធថា សមាជិកជាច្រើនរយនាក់នៃក្រុមទាហានស៊ីឈ្នួលឯកជន Wagner របស់រុស្ស៊ីបានវិលត្រឡប់ទៅកាន់ភាគខាងកើតអ៊ុយក្រែនវិញដើម្បីប្រយុទ្ធ ប៉ុន្តែមិនមានផលប៉ះពាល់ខ្លាំងដល់សមរភូមិនោះទេ។
ក្រុមទាហានស៊ីឈ្នួលឯកជន Wagner បានដើរតួយ៉ាងសំខាន់ក្នុងការដណ្តើមកាន់កាប់ទីក្រុង Bakhmut ភាគខាងកើតរបស់រុស្ស៊ីក្នុងខែឧសភា បន្ទាប់ពីសមរភូមិដ៏វែងបំផុត និងដ៏ខ្លាំងក្លាបំផុតមួយនៃសង្រ្គាមរយៈពេល ១៩ ខែរបស់ទីក្រុងម៉ូស្គូនៅអ៊ុយក្រែន។
ពួកគេបានចាកចេញពីតំបន់ Bakhmut បន្ទាប់ពីការប្រយុទ្ធគ្នា ហើយអ្នកខ្លះបានទៅប្រទេសបេឡារុសក្រោមកិច្ចព្រមព្រៀងដែលបានបញ្ចប់ការបះបោររបស់ទាហានសុីឈ្នួល Wagner ក្នុងខែមិថុនា ក្នុងអំឡុងពេលដែលវាបានកាន់កាប់ទីបញ្ជាការយោធារុស្ស៊ី ហើយបានដើរក្បួននៅលើទីក្រុងម៉ូស្គូ។
ចាប់តាំងពីប្រធាន Wagner លោក Yevgeny Prigozhin ត្រូវបានសម្លាប់កាលពីថ្ងៃទី២៣ ខែសីហា នៅពេលដែលយន្តហោះឯកជនដែលគាត់កំពុងធ្វើដំណើរបានធ្លាក់ក្នុងកាលៈទេសៈដែលមិនអាចពន្យល់បាន វិមានក្រឹមឡាំងបានព្យាយាមនាំក្រុមនេះឱ្យស្ថិតនៅក្រោមការគ្រប់គ្រងរបស់រដ្ឋកាន់តែតឹងរ៉ឹង។ អ្នកសរសេរប្លុកយោធារុស្ស៊ីបានរាយការណ៍ថា យុទ្ធជន Wagner មួយចំនួនបាននិងកំពុងត្រឡប់ទៅអ៊ុយក្រែនវិញ។
លោក Serhiy Cherevatyi អ្នកនាំពាក្យនៃបញ្ជាការយោធាភាគខាងកើតបានឲ្យដឹងថា “យើងបានកត់ត្រាវត្តមានរបស់អ្នកប្រយុទ្ធអតិបរមាជាច្រើនរយនាក់នៃអតីត Wagner PMC [ក្រុមហ៊ុនយោធាឯកជន]”។
លោកបានបន្ថែមថា យុទ្ធជន Wagner ត្រូវបានខ្ចាត់ខ្ចាយនៅកន្លែងផ្សេងៗគ្នា មិនមែនជាផ្នែកនៃអង្គភាពតែមួយទេ ហើយមិនមានផលប៉ះពាល់អ្វីគួរឱ្យកត់សម្គាល់នោះទេ។
ទីប្រឹក្សាប្រធានាធិបតីអ៊ុយក្រែន លោក Mykhailo Podolyak បានឲ្យដឹងថា អ្នកខ្លះបានទៅទ្វីបអាហ្រ្វិក ខ្លះបែកខ្ចាត់ខ្ចាយឆ្លងកាត់រុស្ស៊ី ហើយខ្លះទៀតមានកិច្ចសន្យាជាមួយក្រសួងការពារជាតិរុស្ស៊ី ហើយកំពុងប្រយុទ្ធក្នុងវិស័យ Bakhmut។
លោកបានមានប្រសាសន៍ថា របាយការណ៍នៃការវិលត្រឡប់មកវិញរបស់ពួកគេគឺមានបំណងដើម្បីបំបិទព័ត៌មាននៃការដណ្តើមយកភូមិចំនួនពីររបស់អ៊ុយក្រែនឡើងវិញនៅជិតតំបន់ Bakhmut។
ប្រភព៖ Business day
ប្រែសម្រួលដោយ៖ {ឡាយ លីហួ}
https://www.google.com/amp/s/www.businesslive.co.za/amp/bd/world/europe/2023-09-27-hundreds-of-wagner-mercenaries-return-to-ukraine-war/
