រុស្ស៊ី ឱ្យលោក គីម ជុងអ៊ុន ពិនិត្យមើលយន្តហោះចម្បាំង និងនាវាចម្បាំងរបស់ខ្លួន

រុស្សុី៖ មេដឹកនាំកូរ៉េខាងជើង លោក គីម ជុងអ៊ុន បានត្រួតពិនិត្យយន្តហោះចម្បាំង ទស្សនាអាកាសយានដ្ឋាន និងទស្សនានាវាចម្បាំងរបស់កងនាវាចរប៉ាស៊ីហ្វិកកាលពីថ្ងៃសៅរ៍ ខណៈដែលការឈប់ចុងក្រោយក្នុងដំណើរទស្សនកិច្ចរបស់លោកទៅកាន់ប្រទេសរុស្ស៊ីបាននាំលោកទៅកាន់ទីក្រុង Vladivostok។

ប្រព័ន្ធផ្សព្វផ្សាយរដ្ឋរបស់រុស្ស៊ីបានរាយការណ៍ថា លោក គីម ជុងអ៊ុន បានជួបរដ្ឋមន្ត្រីការពារជាតិរុស្ស៊ីលោក Sergei Shoigu នៅអាកាសយានដ្ឋាន Knevichi ក្នុងទីក្រុង Vladivostok មុនពេលអ្នកទាំងពីរត្រូវបានអមដំណើរដោយមេបញ្ជាការកងទ័ពជើងទឹករុស្ស៊ីឧត្តមនាវីឯក Nikolai Evmenov ក្នុងដំណើរទស្សនកិច្ចទៅកាន់នាវាចម្បាំងរបស់កងនាវាចរប៉ាស៊ីហ្វិក Marshal Shaposhnikov។

ទីភ្នាក់ងារសារព័ត៌មានរដ្ឋកូរ៉េខាងជើង KCNA បានរាយការណ៍កាលពីថ្ងៃអាទិត្យថា លោក គីម ជុងអ៊ុន ត្រូវបានស្វាគមន៍ដោយលោក Sergei Shoigu នៅពេលមកដល់ ហើយអ្នកទាំងពីរបានពិភាក្សាអំពីកិច្ចសហប្រតិបត្តិការយោធា រវាងកងកម្លាំងប្រដាប់អាវុធ និងក្នុងវិស័យការពារជាតិ និងសន្តិសុខរបស់ពួកគេ។

ក្រសួងការពារជាតិរុស្ស៊ីបានឲ្យដឹងតាមរយៈ Telegram ថា មេដឹកនាំកូរ៉េខាងជើងក៏ត្រូវបានបង្ហាញមជ្ឈមណ្ឌលបញ្ជាកណ្តាលរបស់កប៉ាល់ និងប្រព័ន្ធគ្រប់គ្រងអាវុធមីស៊ីលដ៏ទំនើបរបស់ខ្លួនផងដែរ។

ក្រសួងការពារជាតិរុស្ស៊ីបានបន្ថែមថា ឧត្តមនាវីឯក Nikolai Evmenov បានពិភាក្សាជាមួយលោក គីម ជុងអ៊ុន អំពីការពង្រីកសមត្ថភាពនៃប្រព័ន្ធគ្រប់គ្រងថ្មី ដែលអនុញ្ញាតឱ្យកាំជ្រួចធ្វើដំណើរតាមសមុទ្រ Kalibr ត្រូវបានប្រើប្រាស់យ៉ាងមានប្រសិទ្ធភាពប្រឆាំងនឹងគោលដៅសមុទ្រ និងឆ្នេរសមុទ្រនៅចម្ងាយជាង ១,៥០០ គីឡូម៉ែត្រពីនាវា។

ការចុះចតនៅទីក្រុង Vladivostok គឺជាដំណើរចុងក្រោយបង្អស់របស់លោក គីម ជុងអ៊ុន ក្នុងដំណើរទស្សនកិច្ចទៅកាន់ប្រទេសរុស្ស៊ី និងតំបន់ចុងបូព៌ារបស់ខ្លួន បន្ទាប់ពីកិច្ចប្រជុំរបស់លោកជាមួយប្រធានាធិបតីរុស្សុី លោក Vladimir Putin កាលពីដើមសប្តាហ៍នេះ ដែលមេដឹកនាំកូរ៉េខាងជើងបានបង្ហាញខ្លួនដើម្បីគាំទ្រសង្គ្រាមរបស់ទីក្រុងម៉ូស្គូលើអ៊ុយក្រែន។

កិច្ចប្រជុំនេះបាននាំឱ្យមានការរំពឹងទុកជុំវិញសក្តានុពលសម្រាប់កិច្ចសហប្រតិបត្តិការយោធាមួយចំនួនរវាងទីក្រុងម៉ូស្គូ និងទីក្រុងព្យុងយ៉ាង។

ប្រភព៖ CNN

ប្រែសម្រួលដោយ៖ {ឡាយ លីហួ}