ឯកឧត្តម ថេង ច័ន្ទសង្វារ អញ្ជើញផ្សព្វផ្សាយគោលនយោបាយគណបក្ស និងបង្រៀនពីរបៀបគូសសន្លឹកឆ្នោតឱ្យបានត្រឹមត្រូវដល់សមាជិក សមាជិកាគណបក្សនៅភូមិកំពង់ឫស្សី ឃុំជីរោទិ៍ទី១ ស្រុកត្បូងឃ្មុំ

ភ្នំពេញ៖ ឯកឧត្តម ថេង ច័ន្ទសង្វារ អនុប្រធានយុវជនគណបក្សថ្នាក់កណ្ដាល និងជាប្រធានក្រុមការងារគណបក្សចុះមូលដ្ឋានស្រុកត្បូងឃ្មុំ នារសៀលថ្ងៃសៅរ៍ ១៣រោច ខែបឋមាសាឍ ឆ្នាំថោះ បញ្ចស័ក ព.ស.២៥៦៧ ត្រូវនឹងថ្ងៃទី១៥ ខែកក្កដា ឆ្នាំ២០២៣ បានបន្តអញ្ជើញចុះជួបសំណេះសំណាល ដើម្បីផ្សព្វផ្សាយគោលនយោបាយគណបក្ស និងណែនាំពីរបៀបគូសសន្លឹកឆ្នោតឱ្យបានត្រឹមត្រូវ ដែលមានលេខរៀងទី១៨ នៃសន្លឹកឆ្នោតជូនសមាជិកបក្ស នៅភូមិកំពង់ឫស្សី ឃុំជីរោទិ៍ទី១ ស្រុកត្បូងឃ្មុំ ខេត្តត្បូងឃ្មុំ។

ឯកឧត្តមប្រធានបានរំលឹកពីប្រវត្តិនៃកិច្ចខិតខំប្រឹងប្រែងរបស់ថ្នាក់ដឹកនាំគណបក្សប្រជាជនកម្ពុជា ក្នុងការកសាង និងអភិវឌ្ឍសមិទ្ធផលសេដ្ឋកិច្ចនិងសង្គមនៅក្នុងប្រទេសកម្ពុជា រួមមាន ផ្លូវថ្នល់ ស្ពាន សាលារៀន វត្តអារាម។ល។ ជាពិសេសសមិទ្ធផល “សន្តិភាព” ដែលកម្ពុជាមានសព្វថ្ងៃនេះ ត្រូវបានកសាងដោយគណបក្សប្រជាជនកម្ពុជាតែមួយគត់ តាំងពីការរំដោះប្រទេសពីរបបប្រល័យពូជសាសន៍ រហូតដល់អាចធានាបានស្ថិរភាពនយោបាយ ដែលជាកម្លាំងចលកររុញច្រានប្រទេសកម្ពុជាឱ្យរីកចម្រើនដូចសព្វថ្ងៃបាន។ គុណតម្លៃនៃសន្តិភាពនេះមានតម្លៃមិនអាចកាត់ថ្លៃបានឡើយ។ ហេតុដូច្នេះ សមាជិកគណបក្សប្រជាជនកម្ពុជាគ្រប់រូបត្រូវរួមគ្នាសាមគ្គីថែរក្សាឱ្យបានខានតែបាន។

ឯកឧត្តមប្រធានបានអំពាវនាវដល់សមាជិកគណបក្សប្រជាជនកម្ពុជានៅក្នុងភូមិកំពង់ឫស្សីដែលមានសិទ្ធិបោះឆ្នោត ត្រូវគូសលើសន្លឹកឆ្នោតឱ្យបានត្រឹមត្រូវ ដើម្បីរក្សាតម្លៃនៃសន្លឹកឆ្នោតស្របតាមទិសស្លោក “សន្លឹកឆ្នោតមួយសន្លឹក ជាការគាំទ្រគណបក្សប្រជាជនមួយសំឡេង”។ ជាពិសេស សូមបោះឆ្នោតជូនគណបក្សប្រជាជនកម្ពុជា នៅលេខរៀងទី១៨ ដែលមានរូបសញ្ញា «ទេវតាបាចផ្កា» ជាសញ្ញាសម្គាល់។

ឯកឧត្តមប្រធានក៏បានណែនាំដល់សមាជិកគណបក្សគ្រប់រូបឱ្យត្រៀមអត្តសញ្ញាណបណ្ណសម្រាប់ការបោះឆ្នោតនៅថ្ងៃទី២៣ ខែកក្កដា ឆ្នាំ២០២៣ខាងមុខ។ ក្នុងករណីមានការបាត់បង់ ឬខូចខាត ត្រូវទាក់ទងទៅកាន់មេភូមិនៅក្នុងមូលដ្ឋានរបស់ខ្លួន ដើម្បីសម្របសម្រួលធ្វើឯកសារបញ្ជាក់អត្តសញ្ញាណ (ឯ.អ) ដើម្បីអាចបោះឆ្នោតបាន។

អង្គពិធីទាំងមូលបានប្រកាសគាំទ្រជាឱឡារិក សម្តេចអគ្គមហាសេនាបតីតេជោ ហ៊ុន សែន ជាបេក្ខភាពនាយករដ្ឋមន្ត្រីសម្រាប់ការបោះឆ្នោតជ្រើសតាំងតំណាងរាស្រ្តនីតិកាលទី៧ នៃរដ្ឋសភា និងគាំទ្រឯកឧត្តមបណ្ឌិត ហ៊ុន ម៉ាណែត ជាបេក្ខភាពនាយករដ្ឋមន្ត្រីសម្រាប់ពេលអនាគត ៕