ប្រមុខរាជរដ្ឋាភិបាល បន្តអំពាវនាវឱ្យរួមគ្នាថែរក្សាសុខសន្តិភាព មិនត្រូវឱ្យពួកប្រតិកិរិយា មកបំផ្លាញសន្តិភាពបានឡើយ
ភ្នំពេញ៖ សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា បន្តអំពាវនាវដល់កម្មករ-កម្មការិនី និងពលរដ្ឋទាំងអស់រួមគ្នាថែរក្សាសុខសន្តិភាព ដើម្បីធានាការអភិវឌ្ឍន៍ប្រទេស មិនត្រូវឱ្យពួកប្រតិកិរិយាបំផ្លាញសន្តិភាពនោះឡើយ។
ក្នុងឱកាសអញ្ជើញជួបកម្មករ និយោជិតសរុបប្រមាណជិត៧០០០នាក់ មកពីរោងចក្រ សហគ្រាសចំនួន ១០ក្នុងខេត្តពោធិ៍សាត់ នាថ្ងៃទី៣០ ខែមិថុនា ឆ្នាំ២០២៣នេះសម្តេចតេជោ មានប្រសាសន៍ថា «សំណូមពរបស់ខ្ញុំមកកាន់ទីនេះ ដែលនៅតែបន្ត នោះគឺរួមគ្នាការពារសន្តិភាព ដើម្បីធានាការអភិវឌ្ឍន៍របស់ប្រទេស មិនទុកឱ្យអនុភាពប្រតិកិរិយាណា ទោះបីជាអសិរពិសយ៉ាងណាក៏ដោយ បំផ្លាញសន្តិភាពនេះ បានទេ ទោះបីដោយតម្លៃណាក៏ដោយ អ្នកណាចង់ថាអីក៏ថាទៅ ក៏ប៉ុន្តែយើងត្រូវតែការពារនូវសន្តិភាពនេះឱ្យបាន បើការពារសន្តិភាពមិនបាន កុំនិយាយទៅដល់ការអភិវឌ្ឍន៍ និយាយពីរឿងត្រៀមស្លាប់ត្រៀមរបួស និងត្រៀមភ្លើងឆេះផ្ទះទៅ» ៕
