ឯកឧត្តម ហឿ ស៊ីយ៉ែម ស្នើរឲ្យប្រជាពលរដ្ឋទាំងអស់ បន្តការប្រុងប្រយ័ត្នអំពីការងើបឡើងវិញនូវស្ថានភាពជំងឺកូវីដ-១៩
ភ្នំពេញ៖ ឯកឧត្តម ហឿ ស៊ីយ៉ែម ប្រធានក្រុមប្រឹក្សាខេត្តក្រចេះ និងឯកឧត្តម ដួង ពៅ អភិបាលរងខេត្ត តំណាងឯកឧត្តម វ៉ា ថន អភិបាលខេត្ត នាព្រឹកថ្ងៃពុធ ៣កើត ខែបឋមាសាឍ ឆ្នាំថោះ បញ្ចស័ក ព.ស.២៥៦៧ ត្រូវនឹងថ្ងៃទី២១ ខែមិថុនា ឆ្នាំ២០២៣ បានអញ្ជើញជាអធិបតីក្នុងកិច្ចប្រជុំសាមញ្ញលើកទី៤៩ អាណត្តិទី៣ ឆ្នាំទី៤ របស់ក្រុមប្រឹក្សាខេត្ត។
កិច្ចប្រជុំនាពេលនេះមានរបៀបវារៈចំនួន៣ រួមមាន៖
១-ពិនិត្យ និង អនុម័តសេចក្ដីព្រាងកំណត់ហេតុកិច្ចប្រជុំសាមញ្ញលើកទី៤៨ អាណត្តិទី៣ ឆ្នាំទី៤ របស់ ក្រុមប្រឹក្សាខេត្ត។
២-ពិនិត្យ និងអនុម័តសេចក្តីព្រាងរបាយការណ៍បូកសរុបលទ្ធផលការងារប្រចាំខែឧសភា ឆ្នាំ២០២៣ និងលើកទិសដៅការងារបន្ត របស់រដ្ឋបាលខេត្ត។
៣-ពិនិត្យ និងអនុម័តសេចក្តីព្រាងប្រតិទិននៃកិច្ចប្រជុំសាមញ្ញ អាណត្តិទី៣ ឆ្នាំ៥ របស់ក្រុមប្រឹក្សាខេត្ត។
ឯកឧត្តម ហឿ សុីយ៉ែម ប្រធានក្រុមប្រឹក្សាខេត្ត បានមានប្រសាសន៍កោតសរសើរ និងវាយតម្លៃខ្ពស់ចំពោះការបើកនូវព្រឹត្តិការណ៍កីឡារស៊ីហ្គេមលើកទី៣២ របស់កម្ពុជា ដែលទើបបញ្ចប់ថ្មីៗនេះក្រោមវត្តមានចូលរួមនិងគាំទ្រពីគ្រប់ស្រទាប់មហាជន និងជាការផ្សព្វផ្សាយទៅដល់មហាជនបរទេសឲ្យដឹងពីការអភិវឌ្ឍន៍រីកចម្រើនរបស់កម្ពុជាក្រោមដំបូលសន្តិភាព។
ទន្ទឹមនោះឯកឧត្តម ហឿ ស៊ីយ៉ែម ក៏ស្នើរឲ្យប្រជាពលរដ្ឋទាំងអស់ បន្តការប្រុងប្រយ័ត្នអំពីការងើបឡើងវិញនូវស្ថានភាពជំងឺកូវីដ-១៩ ដែលបានរកឃើញបម្លែងថ្មី និងមានការឆ្លង និងចម្លងឡើងវិញ ត្រូវបន្តពង្រឹងការងារសន្តិសុខសណ្តាប់ធ្នាប់តាមទីសាធារណ: និងនៅតាមមូលដ្ឋាន ដើម្បីដំណើរការបោះឆ្នោតជ្រើសតាំងតំណាងរាស្ត្រ ប្រព្រឹត្តទៅប្រកបដោយបរិយាកាស រីករាយរលូន តម្លាភាព និងសុក្រិតភាព នឹងជាពិសេសដើម្បីផ្សារភ្ជាប់ទៅនឹងជីវភាពប្រចាំថ្ងៃរបស់ប្រជា ពលរដ្ឋផងដែរ។
ឯកឧត្តមប្រធានក្រុមប្រឹក្សាខេត្ត បានបន្តថា ចំពោះការងារសន្តិសុខបន្ទាត់ព្រំដែន សូមបន្តពង្រឹងការត្រួតពិនិត្យ និងចុះល្បាតជាប្រចាំ កុំឲ្យមានចរាចណ៍បទល្មើសចូលប្រទេស ជាពិសេសបទល្មើសគ្រឿងញៀន -អាវុធជាតិផ្ទុះ និងចោរកម្មផ្សេងៗ។
ក្នុងនោះដែរ ឯកឧត្តម ដួង ពៅ អភិបាលរងខេត្ត បានមានប្រសាសន៍ គាំទ្រនូវការស្នើរសុំ និងវិធានការដល់បងប្អូនមូលដ្ឋាន សុំឲ្យបន្តចូលរួមនិងការពារពីការងើបផ្ទុះថ្មីនៃជំងឺកូវីដបម្លែងថ្មី ដើម្បីសុខមាលភាពសហគមន៍របស់យើង ៕
