សម្ដេចតតេជោ ថាជំនួបរវាងសម្ដេច និងអគ្គលេខាធិកា UN មិនមានជជែកលើបញ្ហាផ្ទៃក្នុង របស់កម្ពុជាឡើយ
ភ្នំពេញ៖ សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានថ្លែងបញ្ជាក់ថា ជំនួបរវាងសម្តេច និងឯកឧត្ដម អង់តូនីញ៉ូ ហ្គោទែរ៉េស (Antonio Guterres) អគ្គលេខាធិការអង្គការសហប្រជាជាតិ មិនមានជជែកលើបញ្ហាផ្ទៃក្នុង របស់កម្ពុជាឡើយ ។
ក្នុងឱកាសអញ្ជើញបិទសន្និបាតជាតិខួប៣០ឆ្នាំ នៃសកម្មភាពមីននៅកម្ពុជា នៅព្រឹកថ្ងៃទី២២ ខែវិច្ឆិកានេះ សម្តេចតេជោ ហ៊ុន សែន បានរំលឹកថា ក្នុងជំនួបជាមួយអគ្គលេខាធិការ អង្គការសហប្រជាជាតិនាពេលកន្លងទៅ សម្តេចបានស្នើឱ្យដាក់ចេញគោលដៅ បោសសំអាតមីន ក្នុងផែនការអភិវឌ្ឍសហវត្សរ៍ ។
សម្តេចតេជោបន្តថា សម្តេច និងលោកអគ្គលេខាធិការអង្គការសហប្រជាជាតិ ជាដៃគូល្អនឹងគ្នាតាំងទសវត្សរ៍៨០ ។
សម្តេចតេជោ បានសម្តែងការហួសចិត្តជាខ្លាំង ចំពោះមានអ្នកខ្លះលើកឡើងថា លោកអគ្គលេខាធិការអង្គការសហប្រជាជាតិ បង្គាប់បញ្ជាសម្តេចលើបញ្ហាផ្ទៃក្នុងរបស់កម្ពុជា។
សម្តេចតេជោ ហ៊ុន សែន បានមានប្រសាសន៍ថា ចាប់តាំងពីឆ្នាំ២០០៦ ក្នុងឋានៈជារដ្ឋសមាជិកអង្គការសហប្រជាជាតិ កម្ពុជាបានខិតខំចែករំលែកកងកម្លាំងបោសសម្អាតមីនរបស់ខ្លួន ចូលរួមចំណែកសម្រាលទុក្ខជូនដល់ប្រទេសផ្សេងៗ ដែលកំពុងប្រឈម និងរងគ្រោះថ្នាក់ដោយសារមីន និងយុទ្ធភណ្ឌមិនទាន់ផ្ទុះ ដូចជាប្រទេសស៊ូដង់ ស៊ូដង់ខាងត្បូង ឆាត ម៉ាលី អាហ្វ្រិក កណ្តាល ស៊ីប លីបង់ ស៊ីរី និងយេម៉ែន ដែលកម្លាំងរក្សាសន្តិភាពកម្ពុជា បាននិងកំពុងចូលរួមដើម្បីធ្វើការបោសសម្អាតមីនមនុស្សធម៌ និងផ្តល់នូវភាពសុខក្សេមក្សាន្តដល់ប្រជាជននៃប្រទេសទាំងនោះ ៕
