ឧត្តមសេនីយ៍ឯក បណ្ឌិត ណុប នរិន្ទ ដឹកនាំក្រុមការងារចុះរៀបចំ ត្រួតពិនិត្យ និងបើកប្រអប់សំបុត្រឡើងវិញ នៅប៉ុស្ដិ៍ច្រកទ្វារព្រំដែនអន្តរជាតិ ជាំ និងអូរស្មាច់

ភ្នំពេញ៖ ឯកឧត្តម ឧត្តមសេនីយ៍ឯក បណ្ឌិត ណុប នរិន្ទ អគ្គនាយករង និងជាប្រធានក្រុមការងាររៀបចំ ត្រួតពិនិត្យ និងបើកប្រអប់សំបុត្ររបស់អគ្គនាយកដ្ឋានអន្តោប្រវេសន៍ នៅថ្ងៃទី១៦ ខែតុលា ឆ្នាំ២០២២ បានដឹកនាំក្រុមការងារចុះរៀបចំ ត្រួតពិនិត្យ និងបើកប្រអប់សំបុត្រឡើងវិញ នៅប៉ុស្ដិ៍ច្រកទ្វារព្រំដែនអន្តរជាតិ ជាំ និងប៉ុស្ដិ៍ច្រកទ្វារអន្ដរជាតិអូរស្មាច់ នៃនាយកដ្ឋានច្រកទ្វារទី១ បន្ទាប់ពីមានការរីករាលជំងឺកូវីដ-១៩ អស់រយៈពេលជាង ២ឆ្នាំកន្លងមក ។

ជាមួយគ្នានេះដែរ ឯកឧត្តមប្រធានក្រុមការងារ បានពាំនាំនូវប្រសាសន៍ផ្ដាំផ្ញើសួរសុខទុក្ខរបស់ឯកឧត្តម នាយឧត្ដមសេនីយ៍ អគ្គនាយក ដល់បងប្អូនមន្រ្តីនគរបាលអន្តោប្រវេសន៍។

បន្ទាប់មក ឯកឧត្តម ប្រធានក្រុមការងារបានណែនាំលើការគោរពវិន័យ ពង្រឹងសាមគ្គីភាពផ្ទៃក្នុងឱ្យបានល្អប្រសើរ ការស្លៀកពាក់ឯកសណ្ឋានឱ្យបានត្រឹមត្រូវ និងមានស្នាមញញឹមក្នុងពេលបំពេញការងារ ព្រមទាំងដាក់ស្លាក ”គ្មានការបង់ប្រាក់នៅទីនេះ” តាមបញ្ជរបែបបទចូល និងបញ្ជរបែបបទចេញ ៕