សម្ដេចតេជោ ហ៊ុន សែន សូមការអាធ្យាស្រ័យ ដោយមិនអាចរៀបចំការជួបជុំ ជាមួយបងប្អូនខ្មែររស់នៅអាមេរិក និងកាណាដា ដោយសារមានរយៈពេលខ្លី និងមានកម្មវិធីច្រើន

ភ្នំពេញ៖ សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានផ្ញើការនឹករលឹកដល់បងប្អូន ដែលរស់នៅសហរដ្ឋអាមេរិក និងកាណាដា ជាពិសេសសូមការអាធ្យាស្រ័យ ដោយមិនអាចរៀបចំការជួបជុំជាមួយបងប្អូន ដោយសារការស្នាក់នៅទីក្រុងញូយ៉ក មានរយៈពេលខ្លីនិងមានកម្មវិធីច្រើន ។

សម្ដេចតេជោ ហ៊ុន សែន បានសរសេរសាររៀបរាប់ តាមបណ្ដាញសង្គមហ្វេសប៊ុក នៅថ្ងៃទី២០ កញ្ញានេះ ក្នុងន័យដើមទាំងស្រុងដូចខាងក្រោម៖

បងប្អូនរួមជនរួមជាតិ ជាទីគោពស្រឡាញ់! ថ្ងៃស្អែក២១ កញ្ញា ២០២២ ខ្ញុំនឹងដឹកនាំគណប្រតិភូ ទៅចូលរួមមហាសន្និបាតអង្គការ
សហប្រជាជាតិលើកទី៧៧ នាទីក្រុងញូយ៉ក សហរដ្ឋអាមេរិក។ បន្ទាប់ពីនោះនឹងបន្តដំណើរ ទៅទស្សនកិច្ចផ្លូវការនៅគុយបា ព្រមទាំងបន្តដំណើរមកទីក្រុងតូត្យូ ប្រទេសជប៉ុន ដើម្បីចូលរួមបុណ្យសពឯកឧត្តមស៊ីនហ្សូ អាបេអតីតនាយករដ្ឋមន្ត្រីជប៉ុន។

ខ្ញុំសូមផ្ញើការនឹករលឹកដល់បងប្អូន ដែលរស់នៅសហរដ្ឋអាមេរិក និងកាណាដានិងសូមការអាធ្យាស្រ័យ ដោយមិនអាចរៀបចំការជួបជុំ
ជាមួយបងប្អូនបានអាស្រ័យ ដោយការស្នាក់នៅទីក្រុងញូយ៉ក មានរយៈពេលខ្លីនិងមានកម្មវិធីច្រើន ។ ម្យ៉ាងទៀតយើងក៍ទើបជួបគ្នា កាលពីខែឧសភា ២០២២កន្លងទៅ នៅទីក្រុងវ៉ាស៊ីនតុនហើយដែរ។

សង្ឃឹមថា បងប្អូននឹងមានការយោគយល់។ សូមជូនពរបងប្អូនជនរួមជាតិ ទាំងក្នុងនិងក្រៅប្រទេស ជួបតែសេចក្តីសុខសេចក្តីចម្រើន និងសប្បាយរីករាយ ក្នុងឱកាសបុណ្យភ្ជុំបិណ្ឌនេះ ៕