ឯកឧត្តម ហ៊ុន ម៉ានី៖ គណបក្សប្រជាជន នឹងមិនចាញ់ល្បិចកលក្នុងការរុញចលនាប៉ុនប៉ងបំបែកបំបាក់សាមគ្គីផ្ទៃក្នុងបក្សឡើយ
ភ្នំពេញ៖ ឯកឧត្តម ហ៊ុន ម៉ានី សមាជិកគណៈកម្មាធិការកណ្តាល និងជាអគ្គលេខាធិការនៃអគ្គលេខាធិការដ្ឋានគណៈចលនាមហាជន គណៈកម្មាធិការកណ្តាលគណបក្សប្រជាជនកម្ពុជា បានមានប្រសាសន៍ថា គណបក្សប្រជាជន នឹងមិនចាញ់ល្បិចកលក្នុងការរុញចលនាប៉ុនប៉ងបំបែកបំបាក់សាមគ្គីផ្ទៃក្នុងបក្សឡើយ។
ឯកឧត្តម ហ៊ុន ម៉ានី បានថ្លែងបែបនេះ ក្នុងពិធីសំណេះសំណាលជាមួយរចនាសម្ព័ន្ធគណៈចលនាមហាជនខេត្តបាត់ដំបង នារសៀលថ្ងៃទី១៨ ខែកញ្ញា ឆ្នាំ២០២២ ។
ការលើកឡើងខាងលើនេះ គឺស្របពេលដែល ឯកឧត្តម ហ៊ុន ម៉ានី គូសបញ្ជាក់ពីតម្លៃនៃសាមគ្គីភាព និងឯកភាពផ្ទៃក្នុង ដែលជាភាពខ្លាំងរបស់គណបក្សប្រជាជនដែលមិនអាចកាត់ថ្លៃបាន។
ជាមួយគ្នានេះ ឯកឧត្តមអគ្គលេខា បានឆ្លុះបញ្ចាំងពីសមត្ថភាពនៃការដឹកនាំរបស់ថ្នាក់ដឹកនាំគណបក្សប្រជាជនកម្ពុជាបច្ចុប្បន្នដែលជាឥស្សរជនជំនាន់មុន ក្នុងបុព្វហេតុដឹកនាំប្រទេសលើគ្រប់សភាពការណ៍ តាំងពីបាតដៃទទេរ រហូតទទួលបានសមិទ្ធផលសន្តិភាពនាពេលបច្ចុប្បន្ន និងទៅអនាគត។
ទន្ទឹមនេះ ឯកឧត្តម ក៏បានកត់សម្គាល់នូវការចូលរួម និងភាពហត់នឿយរបស់ថ្នាក់ដឹកនាំ សមាជិក សមាជិកា គណបក្សមូលដ្ឋានគ្រប់រូប ទូទាំងប្រទេស ជាពិសេសខេត្តបាត់ដំបង ក្នុងការកសាង សមិទ្ធផលផ្សេងៗ និងកិច្ចប្រឹងប្រែងនានា ដើម្បីដណ្តើមប្រៀបឈ្នះឱ្យគណបក្សប្រជាជនកម្ពុជានាពេលកន្លងមក។
ក្នុងឱកាសនៃជំនួបនេះដែរ ឯកឧត្ដម ហ៊ុន ម៉ានី បានផ្តាំផ្ញើឱ្យសមាជិក សមាជិកានៃគណៈកម្មាធិការគណបក្សក្នុងមូលដ្ឋានទាំងអស់ ត្រៀមខ្លួនជាដាច់ខាត ដើម្បីការទប់ស្កាត់គម្រោងការធ្វើបដិវត្តន៍ពណ៌ណាមួយ ដើម្បីសុខសន្តិភាពយូរអង្វែង៕