ឯកឧត្តមបណ្ឌិត ចែម វីឌ្យ៉ា អនុញ្ញាតឲ្យឯកអគ្គរដ្ឋទូតបេឡារុសប្រចាំកម្ពុជា ចូលជួបសម្ដែងការគួរសម
ភ្នំពេញ៖ ឯកឧត្តមបណ្ឌិត ចែម វីឌ្យ៉ា រដ្ឋលេខាធិការនៃក្រសួងការបរទេស និងសហប្រតិបត្តិការអន្តរជាតិ នៅថ្ងៃទី១៥ ខែកញ្ញា ឆ្នាំ២០២២ បានទទួលការចូលជួបសម្តែងការគួរសមពីសំណាក់ ឯកឧត្តម Uladzimir Baravikou ឯកអគ្គរដ្ឋទូតវិសាមញ្ញ និងពេញសមត្ថភាពនៃសាធារណរដ្ឋបេឡារុសប្រចាំកម្ពុជា នៅទីស្តីការក្រសួង បន្ទាប់ពីឯកឧត្តមឯកអគ្គរដ្ឋទូត បានជូនសារតាំងចំពោះ សម្តេចវិបុលសេនាភក្តី សាយ ឈុំ ប្រមុខរដ្ឋស្តីទី នៃព្រះរាជាណាចក្រកម្ពុជា។
នៅក្នុងកិច្ចពិភាក្សា ឯកឧត្តមឯកអគ្គរដ្ឋទូតបានសម្តែងនូវការអបអរសាទរកោតសរសើរចំពោះកម្ពុជា ដែលបានបំពេញតួនាទីជាប្រធានអាស៊ាននៅឆ្នាំ២០២២ ប្រកបដោយជោគជ័យ ហើយប្រការនេះបានរួមចំណែកយ៉ាងធំដល់សន្តិភាព និងសន្តិសុខក្នុងតំបន់ និងលើឆាកអន្តរជាតិ។
យោងទស្សនកិច្ចផ្លូវការប្រកបដោយផ្លែផ្ការបស់ សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា នៅថ្ងៃទី២៣-២៥ ខែមេសា ឆ្នាំ២០១៤ ភាគីទាំងពីរបានពិភាក្សាអំពីសក្តានុពលក្នុងកិច្ចសហប្រតិបត្តិការក្នុងវិស័យនានាដើម្បីពង្រឹងនិងពង្រីកទំនាក់ទំនងប្រទេសទាំងពីរឲ្យកាន់តែជិតស្និទ្ធ ក្នុងនោះ គឺរវាងរដ្ឋសភាទាំងពីរ និងការកោះឡើងវិញនៃកិច្ចពិគ្រោះយោបល់ផ្នែកនយោបាយរវាងក្រសួងការបរទេសទាំងពីរ ព្រមទាំងបានផ្លាស់ប្តូរទស្សនៈលើបញ្ហាតំបន់ និងអន្តរជាតិ ដែលជាចំណាប់អារម្មណ៍ និងកង្វល់រួមផងដែរ ៕
