ឧត្តមសេនីយ៍ទោ សោម ស៊ុន បន្តនាំយកស្បៀងអាហារ និងថវិការបស់ឧត្ដមសេនីយ៍ឯក ហ៊ុន ម៉ាណែត ទៅផ្ដល់ជូនគ្រួសារអតីតយុទ្ធជនពិការ ដែលមានជីវភាពលំបាកខ្វះខាត
ភ្នំពេញ៖ ឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ ប្រធានសមាគមអតីតយុទ្ធជនកម្ពុជាខេត្តកំពង់ធំ នៅថ្ងៃទី១២ ខែកញ្ញា ឆ្នាំ២០២២ បានដឹកនាំសហការី នាំយកអំណោយស្បៀងអាហារនិងថវិការបស់ឧត្តមសេនីយ៍ឯក ហ៊ុន ម៉ាណែត មេបញ្ជាការកងទ័ពជើងគោក និងលោកជំទាវ ព្រមទាំង បាន នាំ ក្រុមគ្រូពេទ្យទៅព្យាបាលជំងឺជូនក្រុមគ្រួសារអតីតយុទ្ធជនពិការ ដែលមានជីវភាពលំបាកខ្វះខាតនៅភូមិត្រពាំងចំបក់ ឃុំត្រពាំងឫស្សី ស្រុកកំពង់ស្វាយ ខេត្តកំពង់ធំ ។
លោក ចាន់ រ៉ាវី ជាអតីតយុទ្ធជនពិការដែលមានសមាជិកគ្រួសារចំនួន៥នាក់ ហើយមានជីវភាពលំបាកខ្វះខាត ។ កន្លងមកត្រូវបានគណៈកម្មាធិការសមាគមអតីតយុទ្ធជនកម្ពុជាខេត្តកំពង់ធំ សាងសង់ផ្ទះ ថ្មី មួយ ខ្នង ដែលជាអំណោយដ៏ថ្លៃថ្លារបស់សម្ដេចតេជោ ហ៊ុន សែន ផ្តល់ជូនគាត់កាលពីឆ្នាំ២០១៩ ។
លោក ចាន់ រ៉ាវី អតីតយុទ្ធជនពិការ បានរៀបរាប់ថា ដោយសារគាត់ពិការមានជំងឺប្រចាំកាយ ក្រុមគ្រួសារក៏មានជំងឺឈឺស្កាត់ ប្រចាំកាយផងដែរ មិនអាចទៅប្រកបមុខរបរអ្វីបាន។ ការរស់នៅប្រចាំថ្ងៃ អាស្រ័យដោយការចិញ្ចឹមមាន់ ទា បន្តិចបន្តួច និងដាំបន្លែបង្កានៅជុំវិញផ្ទះ ដើម្បីដោះស្រាយជីវភាពរស់នៅប្រចាំថ្ងៃ ដែល មាន កូន នៅ ក្នុង បន្ទុក ចំនួន ៥ នាក់ ហើយ
នៅក្នុងរដូវបុណ្យកាន់បិណ្ឌភ្ជុំនេះ គាត់មិនមានលទ្ធភាព ដើម្បីធ្វើបុណ្យទានឧទ្ទិសកុសលផលបុណ្យ ដល់ញាតិការទាំងប្រាំពីរសណ្តាន ដែលបានចែកឋានទៅនោះទេ។
ដោយទទួលបានព័ត៌មានពីការលំបាកខ្វះខាតនេះ ឧត្តមសេនីយ៍ទោ សោម ស៊ុន បាននាំយកនូវស្បៀងអាហារ ថវិកា ដែលជាអំណោយរបស់ឯកឧត្តម ឧត្តមសេនីយ៍ឯក ហ៊ុន ម៉ាណែតមេបញ្ជាការកងទ័ពជើងគោកនិងលោកជំទាវ ទៅឧបត្ថម្ភជូនគាត់មានអង្ករចំនួន៥០គីឡូក្រាម មីជាតិចំនួន២កេស ទឹកត្រីទឹកស៊ីអ៊ីវចំនួន២យួរ ត្រីខកំប៉ុងចំនួន១យួរ និងថវិកាមួយចំនួន ជាមួយនោះក៏បានដឹកនាំក្រុមគ្រូពេទ្យដើម្បីពិគ្រោះនិងផ្តល់ថ្នាំសង្កូវ សម្រាប់ព្យាបាលជំងឺ ជូនក្រុមគ្រួសាររបស់គាត់ ផងដែរ ។
លោក ចាន់ រ៉ាវី និងក្រុមគ្រួសារ បានសូមគោរពថ្លែងអំណរគុណដ៏ជ្រាលជ្រៅជាទីបំផុត ចំពោះឯកឧត្តម ឧត្តមសេនីយ៍ឯក ហ៊ុន ម៉ាណែត និងលោកជំទាវ ពេជ ចន្ទមុនី ព្រមទាំងឧត្តមសេនីយ៍ទោ សោម ស៊ុន ប្រធានសមាគមអតីតយុទ្ធជនកម្ពុជាខេត្តកំពង់ធំ ដែលតែងតែផ្សារភ្ជាប់យកចិត្តទុកដាក់ ជួយដោះស្រាយនូវរាល់ទុក្ខលំបាក ខ្វះខាតរបស់បងប្អូនអតីតយុទ្ធជន នៅគ្រប់ទីកន្លែងក្នុងខេត្តកំពង់ធំ។ និងបានសូមគោរពជូនពរឯកឧត្តម លោកជំទាវ លោក លោកស្រី ក្រុមការងារទាំងអស់ សូមទទួលបាននូវពុទ្ធពរទាំងឡាយប្រាំប្រការ គឺអាយ វណ្ណៈ សុខៈពលៈ និងបដិភានៈ កុំបីឃ្លៀងឃ្លាតឡើយ៕
