កុកច្រើនតែភ្លេចជុង តែជុងមិនដែលកុក! ប្រព្រឹត្តបទល្មើសតាំងពីឆ្នាំ២០១២ គេចខ្លួនអស់១០ឆ្នាំ ទីបំផុតនគរបាលចាប់ខ្លួននៅឆ្នាំ២០២២
ភ្នំពេញ៖ ជនជាប់ចោទម្នាក់ ក្នុងចំណោម០២នាក់ ត្រូវបានកម្លាំងនៃអធិការដ្ឋាននគរបាល ស្រុកភ្នំស្រុក ចាប់ឃាត់ខ្លួន នៅវេលាម៉ោង១០និង៣០នាទីព្រឹក ថ្ងៃទី០៣ ខែកញ្ញា ឆ្នាំ២០២២ តាមដីកាបង្គាប់ឲ្យចាប់ខ្លួន លេខ១៥២ ដក ចខ របស់សាលាដំបូងខេត្តបន្ទាយមានជ័យ ចុះថ្ងៃទី២០ ខែឧសភា ឆ្នាំ២០១៥ ចេញដោយ លោក អ៊ី សាវិញ ចៅក្រមជំនុំជម្រះ សាលាដំបូងខេត្ត ។
លោកវរសេនីយ៍ទោ ប៉ិក គឹមហ៊ាក់ អធិការនគរបាល ស្រុកភ្នំស្រុក បានឲ្យដឹងថា ជនត្រូវចាប់ខ្លួន ឈ្មោះបូ សីហា ហៅ ទល់ ភេទប្រុស អាយុ៣១ នៅភូមិតាអុង ឃុំប៉ោយចារ ស្រុកភ្នំស្រុក ខេត្តបន្ទាយមានជ័យ ។
ការចាប់ខ្លួននេះ ដោយអនុវត្តតាម ដីកាបង្គាប់ឲ្យចាប់ខ្លួន លេខ១៥២ ដក ចខ របស់សាលាដំបូងខេត្តបន្ទាយមានជ័យ ចុះថ្ងៃទី២០ ខែឧសភា ឆ្នាំ២០១៥ ចេញដោយ លោក អ៊ី សាវិញ ចៅក្រមជំនុំជម្រះ សាលាដំបូងខេត្ត បន្ទាយមានជ័យ ។ដោយជនជាប់ចោទ និងបក្ខពួក០១នាក់ទៀត ឈ្មោះ បូ ដុល្លា បានប្រព្រឹត្តអំពើហឹង្សាដោយចេតនា មានស្ថានទម្ងន់ទោស កាលពីថ្ងៃទី០៣ ខែមករា ឆ្នាំ២០១២ នៅភូមិតាអុង ឃុំប៉ោយចារ ស្រុកភ្នំស្រុក ខេត្តបន្ទាយមានជ័យ រួចរត់គេចខ្លួនទៅរកស៊ី នៅប្រទេសថៃ ពេលត្រឡប់មកវិញ ក៏ត្រូវនគរបាលចាប់ខ្លួនតែម្តង ។
លោកអធិការបានបញ្ជាក់ឈ្មោះបូ សីហា ហៅ ទល់ ត្រូវបានកម្លាំងនគរបាលជំនាញ នៃអធិការដ្ឋាននគរបាលស្រុកភ្នំស្រុក បានបញ្ជូនខ្លួនទៅស្នងការដ្ឋាននគរបាលខេត្ត ដើម្បីចាត់ការបន្តហើយដែរ៕
