អភិបាលខេត្តបាត់ដំបង អនុញ្ញាតឱ្យតំណាងក្រុមហ៊ុន ខ្មែរ ហ្វេស មីល ជួបសម្តែងការគួរសម និងបង្ហាញផលិតផលទឹកដោះគោស្រស់ និងអាហារកែច្នៃពីទឹកដោះគោ

ភ្នំពេញ៖ ឯកឧត្តម សុខ លូ អភិបាល នៃគណៈអភិបាលខេត្តបាត់ដំបង នៅព្រឹកថ្ងៃទី២ ខែកញ្ញា ឆ្នាំ២០២២ បានអនុញ្ញាតឱ្យតំណាងក្រុមហ៊ុន ខ្មែរ ហ្វេស មីល (Khmer Fresh Milk)សាខាខេត្តបាត់ដំបងជួបសម្តែងការគួរសម និងបង្ហាញផលិតផលទឹកដោះគោស្រស់ និងអាហារកែច្នៃពីទឹកដោះគោមួយចំនួនទៀតដែលជាផលិតផលក្នុងស្រុក។

ក្រុមហ៊ុន ខ្មែរ ហ្វេស មីល ដែលផលិត និងផ្គត់ផ្គង់ផលិតផលទឹកដោះគោស្រស់យីហោ “ គិរីសួគ៌ ” នេះមានកសិដ្ឋានចិញ្ចឹមគោពូជសុទ្ធ Holstein នាំចូលពីប្រទេសអូស្ត្រាលីចំនួន ៥៥០ ក្បាល ដែលប្រតិបត្តិការលើផ្ទៃដី៣០០ហិកតា និង រោងចក្រកែច្នៃផ្ទាល់ខ្លួននៅជើងភ្នំតាម៉ៅ ភូមិឱភាសាំង ឃុំកណ្តឹង ស្រុកបាទី ខេត្តតាកែវ។

ក្នុងឱកាសនេះ ឯកឧត្តមអភិបាលបានសំណេះសំណាល និងទទួលសណ្តាប់នូវការធ្វើបទបង្ហាញពីសំណាក់តំណាងក្រុមហ៊ុនអំពីប្រភេទ និងគុណសម្បត្តិនៃផលិតផលដែលក្រុមហ៊ុនផលិតបាន។ បន្ថែមពីនេះទៅទៀត ឯកឧត្តមក៏បានផ្តល់អនុសាសន៍ដល់ក្រុមហ៊ុនគួរពង្រីកការផ្សព្វផ្សាយផលិតផលក្នុងស្រុកនេះឱ្យខ្លាំងជាងមុន ដើម្បីអោយបងប្អូនប្រជាពលរដ្ឋខែ្មរយើងជ្រួតជ្រាប និងជួយគាំទ្រ៕