ឯកឧត្តម មាស សុភ័ណ្ឌ៖ ៥ឆ្នាំចុងក្រោយនេះ វិស័យព័ត៌មាន និងសោតទស្សន៍ នៅកម្ពុជា មានការរីកចម្រើន ដើម្បីសម្របខ្លួនឲ្យទាន់ ការវិវឌ្ឍរបស់បច្ចេកវិទ្យាឌីជីថល

ភ្នំពេញ៖ ឯកឧត្តម មាស សុភ័ណ្ឌ អនុរដ្ឋលេខាធិការក្រសួងព័ត៌មាន បានលើកឡើងថា ក្នុងរយៈពេល ៥ឆ្នាំចុងក្រោយនេះ វិស័យព័ត៌មាន និងសោតទស្សន៍ នៅកម្ពុជា មានការរីកចម្រើនបន្ថែមទៀត ដើម្បីសម្របខ្លួនឲ្យទាន់ទៅនិង ការវិវឌ្ឍរីកចម្រើនយ៉ាងឆាប់រហ័ស បច្ចេកវិទ្យាឌីជីថលនាពេលបច្ចុប្បន្ននេះ ។

ក្នុងសន្និសីទ្ធសារព័ត៌មាន ស្ដីពី “សមិទ្ធផលសម្រេចបានរយៈពេល ៥ឆ្នាំកន្លងមក របស់ក្រសួងព័ត៌មាន” ដែលរៀបចំដោយអង្គភាពអ្នកនាំពាក្យរាជរដ្ឋាភិបាល នាថ្ងៃទី១ កញ្ញានេះ ឯកឧត្តម មាស សុភ័ណ្ឌ ក៏បានផ្តោតទៅលើ ៣ចំណុចសំខាន់ៗ៖
១.ការកសាងនូវលិខិតឬឯកសារកិត្តិយុទ្ធដើម្បីកំពារទៅដល់ការអនុវត្តការងាររបស់ក្រសួង សា្ថនភាពរបស់មន្រ្តីរាជការក៏ដូចជាការកសាងសមត្ថភាពរបស់មន្រ្តីរាជការរបស់ក្រសួងព័ត៌មាន។
២.ការគ្រប់គ្រងនិងដឹកនាំវិស័យព័ត៌មាននិងសោតទស្សន៍នៅក្នុងព្រះរាជាណាចក្រកម្ពុជា។
៣.ការធ្វើឬក៏ការពង្រឹងការពង្រីកនៅក្នុងកិច្ចសហប្រតិបត្តិអន្តរជាតិនៅក្នុងក្រមខណ្ឌក្រសួងព័ត៌មានជាមួយបណ្ដាល់ប្រទេសជាមិត្តដៃគូអភិវឌ្ឍន៍ក៏ដូចជាដៃគូពាក់ពន្ធ័នានា។

ឯកឧត្ដមបន្ថែមថា ប្រពន្ធ័ផ្សព្វផ្សាយប្រកបដោយភាពចម្រុះគ្រប់ទស្សនៈបាននិងកំពុងបំពេញតួនាទីរបស់ខ្លួនយ៉ាងសកម្មនៅក្នុងការផ្សព្វផ្សាយព័ត៌មានព្រឹតិ្តការណ៍ឬហេតុការណ៍ផ្សេងៗដែលកើតឡើងនៅក្នងប្រទេសក៏ដូចជានៅក្នុងពិភពលោកទាំងមូលជូនទៅដល់សាធារណៈជនបានយ៉ាងទូលំទូលាយនិងទាន់សភាពការផងដែរ។

ឯកឧត្ដម គូសបញ្ជាក់ថា បន្ថែមពីនេះទៀតការរីកចម្រើនទៅលើវិស័យព័ត៌មាននិងសោតទស្សន៍នេះបានបង្ហាញយ៉ាងច្បាស់អំពីការប្ដេជ្ញាចិត្តដ៏មុតមាំរបស់រាជរដ្ឋាភិបាលកម្ពុជាក្នុងការធានាការគោរពសិទ្ធិសេរីភាពអ្នកសារព័ត៌មាន សិទ្ធិសេរីភាពក្នុងការបោះពុម្ពផ្សព្វផ្សាយ សិទ្ធិសេរីភាពក្នុងការបញ្ចេញមតិ សិទ្ធិសេរីនៅក្នុងការទទួលបានព័ត៌មាននិងសិទ្ធិដទៃទៀតផងដែរ ៕