ឧត្តមសេនីយ៍ទោ សេង ធារិន អញ្ជើញចុះត្រួតពិនិត្យគ្រឿងចក្រឈូសឆាយ ធ្វើផ្លូវឡើងចំណុចខ្ពស់ តាមបន្ទាត់ព្រំដែន
ភ្នំពេញ៖ ឧត្តមសេនីយ៍ទោ សេង ធារិន មេបញ្ជាការរង នាយសេនាធិការយោធភូមិភាគទី៥ នៅថ្ងៃទី៣១ ខែសីហា ឆ្នាំ២០២២ អមដំណើរដោយ ឧត្តមសេនីយ៍ត្រី កែវ សេងលន មេបញ្ជាការកងពលតូចថ្មើរជើងលេខ៥៣ ឧត្តមសេនីយ៍ត្រី សុខ គឹមសឿន នាយសេនាធិការរង មេបញ្ជាការទិសទី២យោធភូមិភាគទី៥ ឧត្តមសេនីយ៍ត្រី ម៉ុក ឌីណា មេបញ្ជាការរងតំបន់ប្រតិបត្តិការសឹករងខេត្តបាត់ដំបង បានអញ្ជើញចុះត្រួតពិនិត្យការឈូសឆាយធ្វើផ្លូវឡើងភ្នំ១៨២ អង្គភាពកងអនុសេនាធំទី២ វរសេនាតូចថ្មើរជើងលេខ៥៣១ ស្ថិតនៅភូមិចាំចាប ឃុំបឹងរាំង ស្រុកកំរៀង និងត្រួតពិនិត្យការធ្វើផ្លូវឡើងភ្នំ អង្គភាពកងអនុសេនាធំទី២ វរសេនាតូចថ្មើរជើងលេខ៥៣២ តំបន់ចំណុចខ្ពស់ភ្នំប្រុស ស្ថិតនៅភូមិភ្នំតូច ឃុំពេជ្រចិន្តា ស្រុកភ្នំព្រឹក ខេត្តបាត់ដំបង។
ឧត្តមសេនីយ៍ទោ មេបញ្ជាការរង នាយសេនាធិការយោធភូមិភាគទី៥ បានមានប្រសាសន៍ថា ចំណុចខ្ពស់ទាំងពីរនេះ គឺជាកន្លែងយុទ្ធសាស្ត្រដ៏សំខាន់ផ្នែកការពារអាកាស សម្រាប់ប្រៀបការពារជាតិ ដូច្នេះត្រូវកសាងផ្លូវជាចាំបាច់ ដើម្បីធានា និងសម្រួលក្នុងការធ្វើដំណើរបំពេញការងាររបស់យោធិន ដែលអង្គភាពស្ថិតនៅចំណុចខ្ពស់នេះ។
ឧត្តមសេនីយ៍ទោ សេង ធារិន ក៏បានណែនាំកងកម្លាំងត្រូវថែរក្សាការពារបរិស្ថានបរិវេណភ្នំឲ្យបានល្អកុំឲ្យមានការកាប់បំផ្លាញព្រៃឲ្យសោះ ជាពិសេសថែរទាំផ្លូវកុំឲ្យមានរណ្តៅដក់ទឹកអាចនាំឲ្យឆាប់ខូច ព្រោះផ្លូវនេះសម្រាប់ប្រើជាយុទ្ធសាស្ត្រកងទ័ពយូរអង្វែង៕
