អភិបាលខេត្តកំពង់ធំ ក្រើនរំលឹកគណៈបញ្ជាការឯកភាពរដ្ឋបាលស្រុក ខិតខំយកចិត្តទុកដាក់ថែរក្សា សន្តិសុខសណ្ដាប់ធ្នាប់សាធារណៈ

ភ្នំពេញ៖ ឯកឧត្តម ងួន រតនៈ អភិបាលខេត្តកំពង់ធំ បានក្រើនរំលឹកដល់គណៈបញ្ជាការឯកភាព រដ្ឋបាលស្រុក ខិតខំយកចិត្តទុកដាក់ថែរក្សាសន្តិសុខសណ្ដាប់ធ្នាប់សាធារណៈ ចូលរួមអនុវត្តនូវ គោលនយោបាយ “ភូមិ ឃុំមានសុវត្ថិភាព” ឲ្យបានល្អប្រសើរ ។

ថ្លែងនៅក្នុងពិធីប្រកាសចូលកាន់មុខតំណែងលោក ឃីម សុឃាង ជាអភិបាលស្រុកប្រាសាទសំបូរ នារសៀលថ្ងៃទី៣១ ខែសីហា ឆ្នាំ២០២២ឯកឧត្តម ងួន រតនៈ បានឲ្យដឹងថា ពាក់ព័ន្ធទៅនឹងការពង្រឹង មន្ត្រីនគរបាលប៉ុស្តិ៍ អោយមានភាពជាម្ចាស់ ការចាត់ចែង រួមគ្នាបង្ការ ទប់ស្កាត់ បង្រ្កាបបទល្មើសគ្រប់ ប្រភេទនៅតាមមូលដ្ឋានរៀងៗខ្លួន ពិសេសបទល្មើសគ្រឿងញៀន លួច ឆក់ ប្លន់ និងល្បែងស៊ីសង ខុសច្បាប់នៅគ្រប់មូលដ្ឋានទូទាំងស្រុកប្រាសាទសំបូរ ដើម្បីធានាបាននូវការរស់នៅប្រកបដោយ ភាពសុខដុមរមនាជូនប្រជាពលរដ្ឋ។

ជាមួយគ្នានោះដែរ ឯកឧត្តម ងួន រតនៈ បានអបអរសាទចំពោះលោក ឃីម សុខឃាង ដែលត្រូវបានសម្តេចអគ្គមហាសេនាតេជោ នាយករដ្ឋមន្ត្រី ផ្ដល់សេចក្តីទុកចិត្តតែងតាំងជាអភិបាលស្រុកប្រាសាទ សំបូរនៅពេលនេះ ក្នុងគោលបំណងដើម្បីប្រសិទ្ធភាពនៃការដឹកនាំ។

លើសពីនេះទៀតឯកឧត្ដមអភិបាលខេត្តបានជំរុញដល់ថ្នាក់ដឹកនាំស្រុកប្រាសាទសំបូរ ខិតខំដោះស្រាយបញ្ហាប្រឈម និងជម្លោះនានានៅមូលដ្ឋាន ក្នុងនោះ បញ្ហាជម្លោះដីធ្លី ជាបញ្ហាមួយក្នុងចំណោម បញ្ហាជាច្រើន ប្រើប្រាស់យន្តការដោះស្រាយដោយព្យាយាមអត់ធ្មត់ សម្របសម្រួលដោះស្រាយប្រកប ដោយតម្លាភាព យុត្តិធម៌ និងត្រូវបញ្ចៀសឱ្យបាននូវអំពើហិង្សាតាមគ្រប់រូបភាព។៕