លោកជំទាវ ឃួន សុដារី ដឹកនាំកិច្ចប្រជុំគណៈកម្មាធិការស្រ្តី(វ៉ាយប៉ា/WAIPA) តាមប្រព័ន្ធនិម្មិត
ភ្នំពេញ៖ លោកជំទាវកិត្តិសង្គហបណ្ឌិត ឃួន សុដារី អនុប្រធានទី២ នៃរដ្ឋសភា និងជាប្រធានដឹកនាំកិច្ចប្រជុំគណៈកម្មាធិការស្រ្តី (WAIPA) នៃមហាសន្និបាតអន្តរសភាអាស៊ានអាយប៉ា លើកទី៤៣ នៅព្រឹកថ្ងៃទី៣០ ខែសីហា ឆ្នាំ២០២២ បានអញ្ជើញដឹកនាំកិច្ចប្រជុំពិគ្រោះយោបល់ នៃគណៈកម្មាធិការសមាជិកសភាស្រ្តី (WAIPA) តាមប្រព័ន្ធនិម្មិត ដែលផ្សាយចេញពីវិមានរដ្ឋសភា នៃព្រះរាជាណាចក្រកម្ពុជា។
កិច្ចប្រជុំពិគ្រោះយោបល់នៃគណៈកម្មាធិការសមាជិកសភាស្រ្តី (WAIPA) មានគោលបំណង៖
– ប្រមូលធាតុចូលទាក់ទងនឹងផលប៉ះពាល់បណ្តាលមកពីជំងឺឆ្លងរាតត្បាត COVID-19 ទៅលើសុខភាពផ្លូវកាយ និងផ្លូវចិត្តរបស់ស្រ្តីនិងក្មេងស្រី សុខភាពបន្តពូជរបស់ស្រ្តី អំពើហិង្សាពីដៃគូ អាជីវកម្មនិងអក្ខរកម្មឌីជីថល ការដាក់បន្ទុកទៅលើស្រ្តីជាបុគ្គលិកសុខាភិបាល និងស្រ្តីដែលជាអ្នកថែទាំអ្នកជំងឺនៅផ្ទះ ក្រុមស្រ្តីងាយរងគ្រោះ ព្រមទាំងវាយតម្លៃលើការឆ្លើយតបក្នុងក្របខណ្ឌគតិយុត្តិ និងឆន្ទះនយោបាយនៅក្នុងតំបន់ និងទស្សនៈវិស័យទៅថ្ងៃអនាគត។
– បន្តជំរុញរបៀបវារៈស្ត្រី សន្តិភាព និងសន្តិសុខ ដែលត្រូវបានផ្តួចផ្តើមដោយដំណោះស្រាយក្រុមប្រឹក្សាសន្តិសុខអង្គការសហប្រជាជាតិលេខ 1325 ក្នុងឆ្នាំ២០០០ និងផ្តួចផ្តើមសំណើគោលនយោបាយ ដើម្បីអនុវត្តឱ្យមានប្រសិទ្ធភាពនូវសេចក្តីថ្លែងការណ៍រួមស្តីពីការលើកកម្ពស់ស្ត្រី សន្តិភាព និងសន្តិសុខក្នុងអាស៊ាន ដោយមេដឹកនាំអាស៊ាននៅក្នុង ឆ្នាំ ២០១៧។
– បង្កើតមធ្យោបាយប្រកបដោយនវានុវត្តន៍ ឆ្ពោះទៅរកការស្តារឡើងវិញប្រកបដោយចីរភាព បរិយាប័ន្ន និងភាពធន់តាមរយៈការផ្តល់ភាពអង់អាចដល់ស្ត្រី និងក្មេងស្រីចូលរួមពេញលេញក្នុងសេដ្ឋកិច្ចឌីជីថល។
– រិះរកវិធី និងផ្តល់ឱកាសដើម្បីបង្កើនការចូលរួមដោយស្មើភាពរបស់ស្ត្រីក្នុងតួនាទីដឹកនាំ ការធ្វើសេចក្តីសម្រេចចិត្ត ការចូលរួមក្នុងនយោបាយ និងដំណើរការនៃការស្តាសេដ្ឋកិច្ចឡើងក្រោយវិបត្តិកូវីដ១៩។
– ប្រមូលធាតុចូលពីសមាជិកសភា AIPA សម្រាប់សេចក្តីព្រាងសេចក្តីសម្រេចដែលត្រូវដាក់ក្នុងកិច្ចប្រជុំគណៈកម្មាធិការ WAIPA នៃមហាសន្និបាត AIPA លើកទី៤៣ នៅខែវិច្ឆិកា ឆ្នាំ២០២២។
សមាសភាពគណៈប្រតិភូសភានៃព្រះរាជាណាចក្រកម្ពុជា ចូលរួមកិច្ចប្រជុំនេះរួមមាន លោកជំទាវ ឡោក ខេង ប្រធានគណៈកម្មការទី៨ នៃរដ្ឋសភា លោកជំទាវ និន សាផុន ប្រធានគណៈកម្មការទី៩ នៃរដ្ឋសភា លោកជំទាវ ឃួន ឃុនឌី សមាជិកព្រឹទ្ធសភា ឯកឧត្តម ទី សុគន្ធ លេខាធិការគណៈកម្មការទី៥ នៃរដ្ឋសភា រួមនឹងមន្រ្តីជំនាញ នៃអគ្គលេខាធិការដ្ឋានសភាកម្ពុជា ៕
