ឯកឧត្តម លេង វី រដ្ឋលេខាធិការក្រសួងមហាផ្ទៃ អញ្ជើញប្រកាសចូលកាន់ មុខតំណែងអភិបាលរង នៃគណៈអភិបាលខេត្តព្រៃវែង

ភ្នំពេញ៖ ឯកឧត្តម លេង វី រដ្ឋលេខាធិការក្រសួងមហាផ្ទៃ តំណាងដ៏ខ្ពង់ខ្ពស់
សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ នាព្រឹកថ្ងៃទី២៩ ខែសីហា ឆ្នាំ២០២២នេះ បានអញ្ជើញជាអធិបតីភាព ក្នុងពិធីប្រកាសចូលកាន់មុខតំណែងអភិបាលរង នៃគណៈអភិបាលខេត្តព្រៃវែង ។

ក្នុងឱកាសនោះឯកឧត្តម លេង វី បានមានប្រសាសន៍ថា សមិទ្ធផល និងស្នាដៃដែលខេត្តព្រៃវែងសម្រេចបាននាពេលកន្លងមក ពិតជាបានរួមចំណែកយ៉ាងសំខាន់ក្នុងការពង្រឹងសន្តិភាព ស្ថិរភាពនយោបាយ ស្ថិរភាពសង្គម និងការអភិវឌ្ឍសេដ្ឋកិច្ច សង្គម ដែលជាការចូលរួមចំណែកធ្វើឲ្យសេដ្ឋកិច្ចប្រទេសកម្ពុជាទទួលបានកំណើនគួរឱ្យកត់សម្គាល់បន្ទាប់ពីរងនូវវិបត្តិដែលបណ្តាលមកពីជំងឺកូវីដ-១៩ និងបានបង្កលក្ខណៈសម្បត្តិដល់ការកាត់បន្ថយភាពក្រីក្ររបស់ប្រជាពលរដ្ឋ សំដៅកសាងសង្គមកម្ពុជាយើង ឲ្យមានការរីកចម្រើនប្រកបដោយចីរភាពបន្តទៀត។

ឯកឧត្ដមបានអបអរសាទរចំពោះលោក ឈាង សុវណ្ណារ៉ា លោក លាត ភិរុណ លោក ហ៊ី ធួក និងលោកស្រី ហ៊ន់ សុធារី ដែលទទួលបានការតែងតាំងមុខតំណែងជាអភិបាលរងខេត្តព្រៃវែង នាពេលនេះ។ ឯកឧត្ដមសង្ឃឹមជឿជាក់ថា លោក លោកស្រីអភិបាលរងខេត្តថ្មីទាំង ៤រូប នឹងខិតខំប្រឹងប្រែងអនុវត្តតួនាទី ភារកិច្ចរបស់ខ្លួន តាមរយៈចំណេះដឹង សមត្ថភាព និងបទពិសោធន៍ដែលមានពីមុនមក ដើម្បីបន្តចូលរួមក្នុងការងារដឹកនាំ គ្រប់គ្រង និងអភិវឌ្ឍន៍ខេត្តព្រៃវែងរបស់យើងឲ្យកាន់តែរីកចំរើន និងទទួលបានសមិទ្ធផលថ្មីៗថែមទៀត ។

ក្នុងស្មារតីនេះ ឯកឧត្ដមរដ្ឋលេខាធិការ បានស្នើឲ្យក្រុមប្រឹក្សាខេត្តព្រៃវែង អភិបាល អភិបាលរងខេត្តព្រៃវែង មន្ទីរ អង្គភាពនានា មន្រ្តីរាជការ កងកម្លាំងប្រដាប់អាវុធ រដ្ឋបាលក្រុង ស្រុក និងឃុំ សង្កាត់ ព្រមទាំងប្រជាពលរដ្ឋទូទាំងខេត្តព្រៃវែង ផ្តល់ការគាំទ្រដល់លោក លោកស្រីអភិបាលរងខេត្តថ្មីទាំង ៤រូបខាងលើ ដើម្បីបន្តរួមគ្នាថែរក្សាពង្រឹងសន្តិភាព ស្ថិរភាពនយោបាយ ស្ថិរភាពសង្គម សន្តិសុខ សណ្តាប់ធ្នាប់សាធារណៈ និងខិតខំរួមគ្នាធ្វើការអភិវឌ្ឍខេត្តព្រៃវែង ឲ្យកាន់តែមានការរីកចម្រើនលើគ្រប់វិស័យបន្តទៀត។

ឯកឧត្ដមរដ្ឋលេខាធិការក៏បានផ្តល់នូវការណែនាំដល់ឯកឧត្តម លោកជំទាវ លោកស្រី អស់លោក អំពីកិច្ចការសំខាន់ៗមួយចំនួន ដូចខាងក្រោម៖

ទី១៖ ការបន្តថែរក្សា និងពង្រឹងសន្តិភាព ស្ថិរភាពនយោបាយ សន្តិសុខ និងសណ្តាប់ធ្នាប់សាធារណៈការបន្តថែរក្សា និងពង្រឹងសន្តិភាព ស្ថិរភាពនយោបាយ សន្តិសុខ និងសណ្តាប់ធ្នាប់សាធារណៈ នៅតែជាកត្តាគន្លឹះសម្រាប់បង្កបរិយាកាស ដល់ការលើកកម្ពស់លទ្ធិប្រជាធិបតេយ្យ សេរីពហុបក្ស ការលើកស្ទួយសិទ្ធិសេរីភាពរបស់ប្រជាពលរដ្ឋ ការអភិវឌ្ឍសេដ្ឋកិច្ច សង្គម ការបន្តប្រយុទ្ធនឹងជំងឺកូវីដ-១៩ និងការដោះស្រាយផលប៉ះពាល់បណ្តាលមកពីវិបត្តិនៃជំងឺនេះ និងវិបត្តសាកលនានា សំដៅអភិវឌ្ឍប្រទេសជាតិលើគ្រប់វិស័យប្រកបដោយចីរភាព និងពង្រឹងសុខដុមនីយកម្មក្នុងសង្គម ។

ទី២៖ ការបន្តអនុវត្តវិធានការដើម្បីប្រយុទ្ធនឹងជំងឺកូវីដ-១៩ និងការដោះស្រាយផលប៉ះពាល់ដែលបណ្តាលមកពីវិបត្តិនៃជំងឺនេះ
ក្នុងរយៈពេលជាងពីរឆ្នាំកន្លងមកនេះ ជំងឺកូវីដ-១៩ បានបង្កឱ្យមានផលប៉ះពាល់យ៉ាងធ្ងន់ធ្ងរមកលើសេដ្ឋកិច្ច និងជីវភាពរស់នៅរបស់ប្រជាពលរដ្ឋយើង។ រាជរដ្ឋាភិបាលបានចាត់វិធានការនានាដើម្បីគ្រប់គ្រង ឆ្លើយតបបានទាន់ពេលវេលាចំពោះការឆ្លងរីករាលដាលនៃជំងឺកូវីដ-១៩ និងបានបើកប្រទេសឱ្យដំណើរការលើគ្រប់វិស័យចាប់ពីចុងឆ្នាំ២០២១ ធ្វើឱ្យសកម្មភាពសេដ្ឋកិច្ចសង្គម មានដំណើរការជាប្រក្រតីឡើងវិញ។

ទី៣៖ ការគ្រប់គ្រង និងការអភិវឌ្ឍនៅតាមតំបន់ព្រំដែន
អាជ្ញាធរ និងកងកម្លាំងមានសមត្ថកិច្ចនានា ត្រូវបង្កើនកិច្ចសហការក្នុងការគ្រប់គ្រង ព្រំដែន សំដៅថែរក្សាការពារឱ្យបានគត់មត់នូវបូរណភាពទឹកដី អធិបតេយ្យជាតិ ការរក្សាសន្តិសុខ សណ្តាប់ធ្នាប់សាធារណៈ និងការបង្ការ ទប់ស្កាត់ បង្ក្រាបបទល្មើសឆ្លងកាត់ព្រំដែនគ្រប់ប្រភេទ។

ទី៤៖ អំពីការផ្តល់សេវាសាធារណៈ ការផ្តល់សេវាសាធារណៈ គឺជាតួនាទី និងការទទួលខុសត្រូវដ៏សំខាន់របស់រដ្ឋបាលថ្នាក់ក្រោមជាតិ ដើម្បីឆ្លើយតប និងដោះស្រាយនូវសំណើ សំណូមពរ និងតម្រូវការចាំបាច់នានារបស់ប្រជាពលរដ្ឋ។

ទី៥៖ អំពីកំណែទម្រង់វិមជ្ឈការ និងវិសហមជ្ឈការ
ក្នុងគោលបំណងជំរុញការអនុវត្តគោលនយោបាយវិមជ្ឈការ និងវិសហមជ្ឈការ ឱ្យកាន់តែស៊ីជម្រៅ រាជរដ្ឋាភិបាលបានសម្រេចអនុម័តនូវកម្មវិធីជាតិសម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិដំណាក់កាលទី២ សម្រាប់រយៈពេល១០ឆ្នាំបន្តទៀត គឺចាប់ពីឆ្នាំ២០២១ ដល់ឆ្នាំ២០៣០។

ទី៦៖ ការដឹកនាំ ការគ្រប់គ្រង និងរបៀបរបបការងាររបស់រដ្ឋបាលខេត្ត
ច្បាប់ស្តីពីការគ្រប់គ្រងរដ្ឋបាលរាជធានី ខេត្ត ក្រុង ស្រុក ខណ្ឌ បានកំណត់ឱ្យមានក្រុម-ប្រឹក្សា និងគណៈអភិបាល ដែលជាតួអង្គដឹកនាំដ៏សំខាន់របស់រដ្ឋបាលរាជធានី ខេត្ត និងរដ្ឋបាលក្រុង ស្រុក ខណ្ឌ។ទី៧៖ ការបំពេញតួនាទី ភារកិច្ចរបស់ក្រុមប្រឹក្សាឃុំ សង្កាត់អាណត្តិទី៥
ផ្អែកតាមលទ្ធផលនៃការបោះឆ្នោតជ្រើសរើសក្រុមប្រឹក្សាឃុំ សង្កាត់អាណត្តិទី៥ ក្រុម-ប្រឹក្សាថ្មីដែលកើតចេញពីការបោះឆ្នោតតាមឃុំ សង្កាត់នីមួយៗ បានរៀបចំពិធីប្រកាសចូលកាន់តំណែងរួចរាល់អស់ហើយចាប់ពីថ្ងៃទី០៤ ខែកក្កដា ដល់ថ្ងៃទី៩ ខែកក្កដា ឆ្នាំ២០២២នេះ។

ជាថ្មីម្តងទៀត ក្នុងនាមសម្តេចក្រឡាហោម ស ខេង ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ ថ្នាក់ដឹកនាំក្រសួងមហាផ្ទៃ ឯកឧត្ដម លេង វី សម្តែងនូវការកោតសរសើរដោយស្មោះ និងសូមវាយតម្លៃខ្ពស់ទៅលើ សមិទ្ធផលការងារគ្រប់វិស័យ របស់ខេត្តព្រៃវែងនាពេលកន្លងមក ៕