ភ្នំពេញ៖ ក្រោមការចាត់តាំងពីសំណាក់ឯកឧត្តម អ៊ុក សមវិទ្យា ប្រតិភូរាជរដ្ឋាភិបាលទទួលបន្ទុកជាអគ្គនាយកបេឡាជាតិសន្តិសុខសង្គម នាថ្ងៃទី២៨ ខែសីហា ឆ្នាំ២០២២ ប្រធាននាយកដ្ឋានតាវកាលិកសន្តិសុខសង្គម នៃ ប.ស.ស. លោក សុក បូរ៉ា បានលើកឡើងថា«មានលក្ខខណ្ឌ៣យ៉ាងដើម្បីទទួលប្រាក់សោធន(រ៉ឺត្រែត)»។
ការលើកឡើងបែបនេះក្នុងឱកាសលោកអញ្ជើញធ្វើបទបង្ហាញក្នុងសិក្ខាសាលាថ្នាក់ជាតិស្តីពី “ប្រព័ន្ធសន្តិសុខសង្គមនៅកម្ពុជា និងការសិក្សាស្វែងយល់អំពីកម្មវិធីសោធន សម្រាប់កម្មករកាត់ដេរ” ជូនដល់ថ្នាក់ដឹកនាំ និងបុគ្គលិកទាំងអស់ នៃសហព័ន្ធសហជីពកម្ពុជា (CATU)។
លោក សុក បូរ៉ា បានបន្តទៀតថា ដើម្បីទទួលបានប្រាក់សោធន កម្មករនិយោជិតនៃវិស័យឯកជន ត្រូវគោរពតាមលក្ខខណ្ឌ៣យ៉ាង ដែលក្នុងនោះរួមមាន៖
(១) បានចុះបញ្ជីក្នុងផ្នែកប្រាក់សោធន (២) មានអាយុយ៉ាងតិច៦០ឆ្នាំ (៣) បានបង់ភាគទានផ្នែកប្រាក់សោធនយ៉ាងតិច១២ខែ។ បន្ថែមពីលើនោះលោកបានឲ្យដឹងថានៅពេលដល់អាយុចូលនិវត្តន៍ គ្រប់សមាជិក ប.ស.ស. ទាំងអស់នឹងទទួលបានអត្ថប្រយោជន៍ដូចជាៈ(១)ទទួលបានប្រាក់សោធនជារៀងរាល់ខែ ដោយក្នុងនោះ១ខែត្រូវបើកជូនសមាជិក២ដង (២)ទទួលបានសេវាព្យាបាលនិងថែទាំវេជ្ជសាស្រ្តនៅមូលដ្ឋានសុខាភិបាលដៃគូ ប.ស.ស.។
លោកបានបន្តទៀតថា ការបង់ភាគទានផ្នែកប្រាក់សោធន គឺតម្រូវឲ្យមានកាតព្វកិច្ចបង់ភាគទានចំនួន ៤ភាគរយ ក្នុងនោះនិយោជកបង់ ២ភាគរយ និងកម្មករនិយោជិតបង់ ២ភាគរយ។
លោកបានគូសបញ្ជាក់ថា៖ ប្រសិនបើគាត់ធ្វើការនៅរោងចក្រមួយ ហើយធ្វើការបាន ១ឆ្នាំ រោងចក្រនោះក៏បិទទ្វារ កម្មករនោះនឹងត្រូវបានកត់ត្រានៅក្នុងប្រព័ន្ធ ប.ស.ស. ដែរ។ នៅពេលគាត់បានការងារនៅកន្លែងថ្មី អតីតភាពត្រូវបានបូកបន្តទៀតរហូតដល់គាត់មានអាយុ ៦០ឆ្នាំ ទើបគាត់អាចទទួលបានប្រាក់សោធន។
សូមបញ្ជាក់ថា៖ បទបង្ហាញខាងលើរៀបចំដោយសហព័ន្ធសហជីពកម្ពុជា (CATU) និងមូលនិធិ SUISS-SOLIDAR និង OXFAM FIRST សហការជាមួយបេឡាជាតិសន្តិសុខសង្គម ស្ថិតនៅសណ្ឋាគារសាន់វ៉េភ្នំពេញ ប្រព្រឹត្តទៅពេញមួយថ្ងៃ ដោយមានវត្តមានចូលរួមប្រមាណជាង ៦០នាក់៕
