ឯកឧត្តម នេត្រ ភក្រ្តា៖ វេទិកាយុវជនជជែកពិភាក្សាបរិស្ថាន បានដើរតួនាទីយ៉ាងសំខាន់ លើការផ្សព្វផ្សាយបញ្ហាបរិស្ថាន និងបណ្តុះស្មារតីឲ្យស្រឡាញ់បរិស្ថាន

ភ្នំពេញ៖ ឯកឧត្តម នេត្រ ភក្រ្តា រដ្ឋលេខាធិការក្រសួងបរិស្ថាន បានលើកឡើងថា វេទិកាយុវជនជជែកពិភាក្សាបរិស្ថាន គឺពិតជាបានដើរតួនាទីយ៉ាងសំខាន់ ទៅលើការផ្សព្វផ្សាយបញ្ហាបរិស្ថាន និងពិសេសការបណ្តុះស្មារតីឱ្យស្រឡាញ់បរិស្ថាន ទៅលើការបង្កើនចំណេះដឹងបរិស្ថាន។

ក្នុងឱកាសអញ្ជើញជាអធិបតី ក្នុងវេទិកាយុវជនជជែកពិភាក្សា អំពីបរិស្ថានឆ្នាំ២០២២ កាលពីថ្ងៃទី២៦ ខែសីហា ឆ្នាំ២០២២ នៅខេត្តព្រះសសីហនុ ឯកឧត្តម នេត្រ ភក្រ្តា បានមានប្រសាសន៍ថា កម្ពុជាកំពុងមានការរីកចម្រើនជឿនលឿន ដោយសារសុខសន្តិភាព និងស្ថេរភាពនយោបាយពេញលេញ ហើយរាជរដ្ឋាភិបាលក៏បានគិតគូរ ពីការអភិវឌ្ឍប្រកបដោយចីរភាព គឺសំដៅលើការរីកចម្រើននៃសេដ្ឋកិច្ច ការរីកចម្រើននៃសង្គមជាតិ និងការយកចិត្តលើសកម្មភាពមេត្រីភាពបរិស្ថាន កាន់តែខ្ពស់ជាងមុន។

លើសពិនេះដែរ ឯកឧត្តមរដ្ឋលេខាធិការ បានលើកឡើងថាវេទិកាយុវជនជជែកពិភាក្សាបរិស្ថាន គឺជាមធ្យោបាយមួយក្នុងការចែករំលែក ព័ត៌មានបរិស្ថាន និងការស្រឡាញ់បរិស្ថានទៅកាន់ពលរដ្ឋដទៃទៀត បន្ថែមលើយន្តការផ្សេងៗទៀតដែល ក្រសួងបរិស្ថានបានរៀបចំឡើង ក្នុងការបញ្ជ្រាបនិងផ្សព្វផ្សាយចំណេះដឹងបរិស្ថាន ក្នុងចំណោមប្រជាពលរដ្ឋ។

ឯកឧត្តម នេត្រ ភក្រ្តា បានថ្លែងអំណរគុណដល់ថ្នាក់ដឹកនាំនៃអគ្គនាយកដ្ឋានចំណេះដឹង និងព័ត៌មានបរិស្ថាន និងជាពិសេសនាយកដ្ឋានអប់រំបរិស្ថាន និងដៃគូពាក់ព័ន្ធ ដែលបានខិតខំបង្កើតកម្មវិធីផ្សព្វផ្សាយចំណេះដឹងបរិស្ថាន ដើម្បីលើកកម្ពស់សកម្មភាពកិច្ចគាំពារបរិស្ថាន ការគ្រប់គ្រងធនធានធម្មជាតិ ការអភិរក្សជីវៈចម្រុះ និងការរស់នៅដោយចីរភាព។

សូមបញ្ជាស់ថា វេទិកាយុវជនជជែកពិភាក្សាអំពីបរិស្ថាន ឆ្នាំ២០២២ ជាលើកទី៤២ និងជាលើកទី១ដែលបានរៀបចំនៅខេត្តព្រះសីហនុ ដែលបានចាប់ផ្ដើមតាំងពីខែមេសា ដល់ខែសីហា ឆ្នាំ២០២២ និងបានចែកចេញជាបីវគ្គ គឺ វគ្គណែនាំ វគ្គប្រកួតដំបូង និងវគ្គប្រកួតផ្ដាច់ព្រ័ត្រ។
វេទិកានេះដែរបានផ្ដល់ឱកាសដល់យុវជនសិក្សាស្រាវជ្រាវ ស្វែងរកទឡ្ហីករណ៍ថ្មីៗតាមបែបវិទ្យាសាស្រ្តគាំទ្រគោលជំហររបស់ខ្លួន ផ្លាស់ប្តូរចំណេះដឹង និងបទពិសោធន៍ពីបណ្តាវាគ្មិន និងមន្រ្តីជំនាញផ្នែកបរិស្ថាន ព្រមទាំងបានចែករំលែកនូវចំណេះដឹងទាំងនោះ ទៅកាន់សាធារណជនទូទៅថែមទៀត ក្នុងការចូលរួមការគ្រប់គ្រងបរិស្ថានរបស់ប្រទេសកម្ពុជានាថ្ងៃអនាគតកាន់តែល្អប្រសើរ ៕