ភ្នំពេញ៖ លោក ស៊ីន ស៊ីសាមុត ជាអធិរាជសំឡេងមាសខ្មែរ ដែលបានបន្សល់ទុកនូវមរតកសំឡេង និងស្នាដៃនិពន្ធចម្រៀងរាប់រយ រាប់ពាន់បទសម្រាប់ប្រជាជាតិ អស់រយះពេលជាង៥០ឆ្នាំមកហើយ។
យោងតាមក្រុមព្រះសុរិយាបានឲ្យដឹងថា លោក ស៊ីន ស៊ីសាមុត កើតនៅថ្ងៃទី២៣ ខែសីហា ឆ្នាំ១៩៣៣ នាទឹកដីខេត្តស្ទឹងត្រែង។ លោក ស៊ីន ស៊ីសាមុតជាកូនកាត់បីសាសន៍ ដោយមានសញ្ជាតិដល់ទីបីឯណោះគឺ ខ្មែរ លាវ និងចិន។
លោកបានចូលបំរើក្នុងវិស័យសិល្បៈខ្មែរ តាំងពីដើមទសវត្ស៥០ ហើយបានបញ្ចប់អាជីពនេះនៅពេលខ្មែរក្រហមឡើងកាន់អំណាចនៅថ្ងៃទី១៧ ខែមេសា ឆ្នាំ១៩៧៥។ លោក ត្រូវបានខ្មែរក្រហមសម្លាប់នៅកំឡុងខែតុលា ឆ្នាំ១៩៧៦ នាមន្ទីរ១៥ ស្រុកកោះធំ ខេត្តកណ្តាល។
ក្នុងគ្រារំលឹកថ្ងៃកំណើតរបស់លោក ក្រុមព្រះសុរិយាសូមធ្វើសេចក្តីបញ្ជាក់នូវ ចំណុចពីរយ៉ាង ជូនមហាជនអោយបានជ្រាប៖
ទី១ នាមត្រកូល មហាជនច្រើនណាស់ តែងតែអាន និងហៅត្រកូលលោកខុសថា ស៊ិន ។ យោងតាមការសិក្សាស្រាវជ្រាវយ៉ាងលំអិត អធិរាជសំឡេងមាសនៃយើង មាននាមត្រកូលថា ស៊ីន មិនមែន ស៊ិនឡើយ។
ទី២ ឆ្នាំកំណើត មានឯកសារជាច្រើនបានកត់ទុកជាយូរមកហើយថា លោកកើតនៅឆ្នាំ១៩៣២ តែសម្រាប់ក្រុមព្រះសុរិយាវិញ បានស្រាវជ្រាវរកឃើញឯកសារជាច្រើនដែលសំណាល់ឯកសារតាំងពីមុនឆ្នាំ១៩៧៥ មិនមែនជាឯកសារនិយាយតៗនោះទេ បានបញ្ជាក់ថា លោក ស៊ីន ស៊ីសាមុត កើតនៅឆ្នាំ១៩៣៣។
នេះជាចំណុចពីរដ៏សំខាន់ដែលមហាជនគួរតែដឹង និងកែសម្រួល៕
