រដ្ឋមន្ត្រីអប់រំ អញ្ជើញសម្ពោធដាក់ឱ្យប្រើប្រាស់បណ្ណាល័យសិក្សា និងសមិទ្ធផលនានា នៅមជ្ឈមណ្ឌលគរុកោល្យភូមិភាគខេត្តតាកែវ

ភ្នំពេញ៖ ឯកឧត្តម បណ្ឌិតសភាចារ្យ ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា នៅថ្ងៃទី២២ ខែសីហា ឆ្នាំ២០២២នេះ បានអញ្ជើញជាអធិបតី ក្នុងពិធីសម្ពោធដាក់ឲ្យប្រើប្រាស់បណ្ណាល័យសិក្សា និងសមិទ្ធផលនានា ក្នុងមជ្ឈមណ្ឌលគរុកោល្យភូមិភាគខេត្តតាកែវ។ ពិធីនេះដែរ ក៏មានវត្តមានចូលរួមពី ឯកឧត្តម លោកជំទាវ ប្រតិភូអមដំណើរ និង លោក ឡោ វីរិទ្ធ ប្រធានមន្ទីរអប់រំ យុវជន និងកីឡាខេត្តតាកែវ មន្ដ្រីអប់រំ គណៈគ្រប់គ្រងមជ្ឈមណ្ឌលគរុកោសល្យ លោកគ្រូ អ្នកគ្រូ សិស្សានុសិស្សជាច្រើនរូបផងដែរ។

បើតាមការបញ្ជាក់ពី លោក ង៉ែត សូដា នាយកមជ្ឈមណ្ឌលគរុកោសល្យភូមិភាគខេត្តតាកែវ បានឱ្យដឹងថា បណ្ណាល័យ ដែលរៀបចំពិធីសម្ពោធនេះដែរ ក៏មានរៀបចំសៀវភៅរាប់រយក្បាល បម្រើដល់ការអាន និងសិក្សាស្រាវជ្រាវ របស់សិស្សនិស្សិត ប្រជាពលរដ្ឋ និងសាធារណៈជនទូទៅ ដែលមានបំណងចង់ចេះចង់យល់ដឹងបន្ថែមផងដែរ ស្ថិតក្នុងមជ្ឈមណ្ឌលគរុកោល្យ ដែលទើបតែធ្វើការសាងសង់រួចរាល់ ដែលជាអំណោយដ៏ថ្លៃថ្លាបំផុតរបស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ដ្រី នៃព្រះរាជាណាចក្រកម្ពុជា ។

ឆ្លៀតក្នុងឱកាសនេះផងដែរ ឯកឧត្តម បណ្ឌិតសភាចារ្យ ហង់ ជួនណារ៉ុន រដ្ឋមន្រ្តីក្រសួងអប់រំ យុវជន និងកីឡា ក៏បានជួបសំណេះសំណាល និងប្រគល់លិខិតថ្លែងអំណរអរគុណ ជូនដល់លោកគ្រូ អ្នកគ្រូ និងបានឧបត្ថម្ភសម្ភារៈកីឡាមួយចំនួនផងដែរ៕