ការសាងសង់រោងទូក ង វែងជាងគេលើពិភពលោក “កម្ពោជិកបុត្តាខេមរាតរី” សម្រេចបាន ៧០% ហើយ

ភ្នំពេញ៖ ឯកឧត្ដម ស សុខា បានឲ្យដឹងថា ការសាងសង់រោងទូក ង វែងជាងគេលើពិភពលោក “កម្ពោជិកបុត្តាខេមរាតរី” សម្រេចបាន ៧០% ហើយគិតមកត្រឹមថ្ងៃទី២០ ខែសីហា ឆ្នាំ២០២២។

តាមរយៈបណ្ដាញសង្គមហ្វេសប៊ុក ឯកឧត្ដម ស សុខាបានឲ្យដឹងយ៉ាងដូច្នេះថា ពុកម៉ែ បងប្អូនប្រជាពលរដ្ឋខ្មែរ ជាទីរាប់អាន ប្រហែលជាមិនទាន់ភ្លេចទេ ទូក ង ខ្មែរដ៏អស្ចារ្យ និងជាប់កំណត់ត្រាជាទូក ង វែងជាងគេលើ ពិភពលោក ដែលចុះវាយតម្លៃផ្ទាល់ដោយតំណាងអង្គការ Guinness World Records នៅថ្ងៃទី១២ ខែវិច្ឆិកា ឆ្នាំ២០១៨ ឈ្មោះ “កម្ពោជិកបុត្តាខេមរាតរី” ពេលនេះបាននិងកំពុងសាងសង់រោងសម្រាប់ដាក់តាំង បង្ហាញជូនសាធារណជន ទស្សនា និងផ្តិតយករូបភាព នៅភូមិលេខ១ សង្កាត់កំពង់លាវ ក្រុងព្រៃវែង ខេត្តព្រៃវែង (មុខសាលាខេត្តព្រៃវែង) ។

ជាលទ្ធផលការសាងសង់រោងទូក ង គិតមកដល់ពេលនេះ សម្រេចបាន ៧០% ហើយ និងគ្រោងបញ្ចប់នៅ បំណាច់ឆ្នាំ២០២២ នេះ ដែលមានទំហំទទឹង ៨,៦០ម៉ែត្រ បណ្តោយ ៩៨,៨០ម៉ែត្រ កម្ពស់ ១១ម៉ែត្រ លើផ្ទៃដី ២ ៤៩២ម៉ែត្រការេ ។

ទូក ង “កម្ពោជិកបុត្តាខេមរាតរី” ផលិតឡើងតាមរថនាបថ និងបច្ចេកទេសកូនខ្មែរ ជាទូកវែងជាងគេលើពិភពលោក ដែលមានប្រវែង ៨៧,៣០ម៉ែត្រ ទទឹង ១,៩៤ម៉ែត្រ ជម្រៅ ០,៨០ម៉ែត្រ និងកម្រាស់សាច់ឈើទូក ៧សង់ទីម៉ែត្រ ដែលអាចផ្ទុកចំណុះបានចំនួន ១៧៩នាក់ ។

ក្នុងនាមជាអ្នកស្ថាបនិកដឹកនាំកសាងទូក ង “កម្ពោជិកបុត្តាខេមរាតរី” ឯកឧត្ដម ស សុខា សូមថ្លែងអំណរគុណយ៉ាងជ្រាលជ្រៅ ចំពោះក្រុមការងារគ្រប់ផ្នែក គ្រប់ជំនាញទាំងអស់ ក៏ដូចជាបងប្អូនប្រជាពលរដ្ឋ យុវជន យុវនារី សិស្ស និស្សិត ដែលបានរួមគ្នាកសាង និងថែរក្សាទូក ង ស្នាដៃកូនខ្មែរដ៏ល្អប្រណីត និងល្បីល្បាញ លើឆាកអន្តរជាតិមួយនេះ៕