ឯកឧត្តម ផាន់ ផល្លា និងនាយក UNCDF ចុះហត្ថលេខាលើអនុស្សរណៈនៃការយោគយល់គ្នា ដើម្បីបំពេញបន្ថែមនូវក្របខណ្ឌ និងកិច្ចសហប្រតិបត្តិការដែលស្ថាប័នទាំងពីរបានឯកភាពគ្នា
ភ្នំពេញ៖ ឯកឧត្តម ផាន់ ផល្លា រដ្ឋលេខាធិការ ក្រសួងសេដ្ឋកិច្ច និងហិរញ្ញវត្ថុ និងលោកស្រី Preeti Sinha នាយកប្រតិបត្តិមូលនិធិអភិវឌ្ឍន៍មូលធននៃអង្គការសហប្រជាជាតិ (UNCDF) កាលពីថ្ងៃទី១៨ ខែសីហា ឆ្នាំ២០២២ បានចុះហត្ថលេខាលើអនុស្សរណៈនៃការយោគយល់គ្នា (MoU) ដើម្បីបំពេញបន្ថែមនូវក្របខណ្ឌ និងកិច្ចសហប្រតិបត្តិការដែលស្ថាប័នទាំងពីរបានឯក ភាពគ្នា តាមរយៈ MoU ដែលបានចុះហត្ថលេខាកាលពីឆ្នាំ២០១៩ កន្លងមក។
ឯកឧត្តម ផាន់ ផល្លា បានលើកឡើងថា ក្រោមក្របខណ្ឌយុទ្ធសាស្ត្រ និងកម្មវិធីស្តារ និងជំរុញសេដ្ឋកិច្ចកម្ពុជា ក្នុងការរស់នៅជាមួយកូវីដ-១៩ តាមគន្លងប្រក្រតីភាពថ្មី សម្រាប់ឆ្នាំ២០២១-២០២៣ រាជរដ្ឋាភិបាលបានដាក់ចេញ នូវមធ្យោបាយគាំទ្រការអនុវត្តន៍វិធានការគោលនយោបាយសំខាន់ៗមួយចំនួន ដោយក្នុងនោះរួមមានការ ប្រើប្រាស់យន្តការភាពជាដៃគូរវាងរដ្ឋ និងឯកជន (PPP) នេះផងដែរ។
ឯកឧត្តមបន្តទៀតថា បន្ទាប់ពីច្បាប់ស្តីពី ការប្រើប្រាស់យន្តការភាពជាដៃគូរវាងរដ្ឋ និងឯកជន ត្រូវបានប្រកាសឱ្យប្រើកាលពីខែវិច្ឆិកា ឆ្នាំ២០២១ រាជរដ្ឋាភិបាលគ្រោងនឹងដាក់ឱ្យប្រើប្រាស់នីតិវិធីគ្រប់គ្រងប្រតិបត្តិការរួម (SOP) សម្រាប់ការរៀបចំអភិវឌ្ឍ និងគ្រប់គ្រងគម្រោងភាពជាដៃគូ រវាងរដ្ឋ និងឯកជននាពេលឆាប់ៗនេះ។ ផ្អែកលើមូលដ្ឋាននេះ ក្រសួងសេដ្ឋកិច្ច និងហិរញ្ញវត្ថុ និង UNCDF នឹងបន្តកិច្ចសហការលើការគាំទ្រ ក្នុងការរៀបចំបញ្ជីសំណើគម្រោងវិនិយោគសាធារណៈ តាម យន្តការ ការប្រើប្រាស់យន្តការភាពជាដៃគូរវាងរដ្ឋ និងឯកជន ដើម្បីចូលរួមចំណែកក្នុងការស្តារ និងជំរុញសេដ្ឋកិច្ចកម្ពុជា។
ឯកឧត្តម បានស្នើឱ្យក្រសួង-ស្ថាប័នពាក់ព័ន្ធរបស់រាជរដ្ឋាភិបាល ចូលរួមនិងផ្តល់កិច្ចសហការលើការរៀបចំ សំណើគម្រោងវិនិយោគសាធារណៈ ដែលមានសក្តានុពលអនុវត្តតាមយន្តការ ការប្រើប្រាស់យន្តការភាពជាដៃគូរវាងរដ្ឋ និងឯកជន ។
ឯកឧត្តម ផាន់ ផល្លា បានថ្លែងអំណរគុណ និងវាយតម្លៃខ្ពស់ចំពោះការចូលរួមរបស់ UNCDF ស្ថិតក្នុងបរិការណ៍បច្ចុប្បន្ននេះដើម្បីបន្តផ្តល់ការគាំទ្រដល់ការអភិវឌ្ឍន៍ហេដ្ឋារចនាសម្ព័ន្ធសាធារណៈនៅកម្ពុជា និងអភិវឌ្ឍន៍សមត្ថភាពជំនាញពាក់ព័ន្ធក្នុងការរៀបចំអភិវឌ្ឍគម្រោងវិនិយោគសាធារណៈ តាមយន្តការ ការប្រើប្រាស់យន្តការភាពជាដៃគូរវាងរដ្ឋ និងឯកជន ផងដែរ។
សូមបញ្ជាក់ថា MoU នេះ មានសុពលភាពរយៈពេល៣ឆ្នាំ ដែលនឹងលើកកម្ពស់ និងពង្រីកវិសាលភាពកិច្ចសហប្រតិបត្តិការរវាងភាគីទាំងពីរ ដែលធ្លាប់មានកន្លងមក ដោយផ្តោតសំខាន់ មានដូចជា៖ (១) ការគាំទ្រលើការផ្តល់ហិរញ្ញប្បទាន ប្រកបដោយនវានុវត្តន៍, (២) ការគាំទ្រដល់ការអភិវឌ្ឍន៍សមត្ថភាព, (៣) ការគាំទ្រដល់ការផ្សព្វផ្សាយច្បាប់ ស្តីពីភាពជាដៃគូរវាងរដ្ឋ និងឯកជន (PPP) និងលិខិតបទដ្ឋានគតិយុត្តពាក់ព័ន្ធ (៤) ការគាំទ្រដល់ការរៀបចំអភិវឌ្ឍគម្រោង PPP និង (៥) ការគាំទ្រដល់ការរៀបចំបង្កើតយន្តការ គាំទ្រហិរញ្ញវត្ថុសម្រាប់គម្រោង PPP៕
