តំបន់ប្រតិបត្តិការសឹករងកំពង់ឆ្នាំង រៀបចំពិធី សំណេះសំណាលជាមួយ ប្រតិភូយោធភូមិភាគទី៩ នៃកងទ័ពប្រជាជនវៀតណាម
ភ្នំពេញ៖ នាថ្ងៃទី១២ ខែសីហា ឆ្នាំ២០២២ នៅទីបញ្ជាការតំបន់ប្រតិបត្តិការសឹករងកំពង់ឆ្នាំង បានរៀបចំ បដិសណ្ឋារកិច្ច គណៈប្រតិភូយោធភូមិភាគទី៩ នៃកងទ័ពប្រជាជនវៀតណាម ដឹកនាំដោយឯកឧត្តមឧត្ដមសេនីយ៍ត្រី ហ្វៀន វ៉ាន់ទៀន អញ្ជើញមកសំណេះសំណាល និងសួរសុខទុក្ខ នាយទាហាន នាយទាហានរង និងពលទាហាន ក្នុងអង្គភាពតំបន់ប្រតិបត្តិការសឹករងកំពង់ឆ្នាំង ដែលពិធីនេះស្ថិតក្រោមអធិបតីភាព ឯកឧត្ដម សាន់យូ អភិបាលរងខេត្ត តំណាងដ៏ខ្ពង់ខ្ពស់ ឯកឧត្ដម ស៊ុន សុវណ្ណារិទ្ធិ អភិបាលគណៈអភិបាលខេត្តកំពង់ឆ្នាំង ,លោកវរសេនីយ៍ឯក ឃូ សុផាន់ មេបញ្ជាការស្តីទី តំបន់ប្រតិបត្តិការសឹករងកំពង់ឆ្នាំង ។
ស្ថិតក្នុងឱកាសនោះដែរ លោកវរសេនីយ៍ឯក ឃូ សុផាន់ មេបញ្ជាការស្តីទី តំបន់ប្រតិបត្តិការសឹករងកំពង់ឆ្នាំង បានឡើងរាយការណ៍អំពីលទ្ធផល ការបោះឆ្នោតជ្រើសរើសតំណាងរាស្រ្តអាណត្តិទី៥ និងកិច្ចសហប្រតិបត្តិការស្រាវជ្រាវរុករកអដ្ឋិធាតុកងទ័ពស្ម័គ្រចិត្ត និងជំនាញការវៀតណាម រដូវប្រាំងឆ្នាំ២០២១- ២០២២ កន្លងទៅនេះ ។
ក្រោយពីបានស្ដាប់របាយការណ៍ របស់លោក មេបញ្ជាការស្តីទី តំបន់ប្រតិបត្តិការសឹករងកំពង់ឆ្នាំង គណៈប្រតិភូ យោធាភូមិភាគទី៩ នៃកងទ័ពប្រជាជនវៀតណាម បានថ្លែងអំណរគុណ អបអរសាទរ និងកោតសរសើរជាខ្លាំង ចំពោះការដឹកនាំរបស់ប្រមុខរាជរដ្ឋាភិបាល ក្នុងការអភិវឌ្ឍន៍ ប្រទេសជាតិគួរឲ្យកត់សម្គាល់ ពិសេសកិច្ចសហប្រតិបត្តិការ រវាងយោធភូមិភាគទី៩ នៃកងទ័ពប្រជាជនវៀតណាម ជាមួយអង្គភាពតំបន់ប្រតិបត្តិការសឹករងកំពង់ឆ្នាំង យោធភូមិភាគពិសេស នៃកងយោធពលខេមរភូមិន្ទ ។
ឯកឧត្តម សាន់ យូ អភិបាលរងខេត្តកំពង់ឆ្នាំង បានថ្លែងអំណរគុណយ៉ាងជ្រាលជ្រៅ ចំពោះវត្តមានគណៈប្រតិភូ យោធភូមិភាគទី៩ នៃកងទ័ពប្រជាជនវៀតណាម ដែលបានចំណាយពេលវេលាដ៏មានតម្លៃ អញ្ជើញមកសួរសុខទុក្ខ និងសំណេះសំណាល ជាមួយនាយទាហាន នាយទាហានរង និងពលទាហាន ក្នុងតំបន់ប្រតិបត្តិការសឹករងកំពង់ឆ្នាំង និងបានជូនពរគណៈប្រតិភូ សូមមានសុខភាពល្អ ជោគជ័យគ្រប់ភារកិច្ច និងសូមឲ្យចំណងមិត្តភាព កម្ពុជា-វៀតណាម ស្ថិតស្ថេរយូរអង្វែង និងសូមឱ្យការនិវត្តន៍របស់គណៈប្រតិភូទៅកាន់មាតុប្រទេសវិញ ប្រកបដោយសុខសុវត្ថិភាព ។
ចុងបញ្ចប់នៃកម្មវិធី ប្រតិភូនៃប្រទេសទាំងពីរ កម្ពុជា-វៀតណាម បានប្តេជ្ញារក្សាកិច្ចសហប្រតិបត្តិការចំណងមិត្តភាព សាមគ្គីភាព រវាងគ្នានិងគ្នា ឲ្យស្ថិតស្ថេរចីរកាល និងបានថ្លែងអំណរគុណ ជូនពរ ព្រមទាំងបានជូនវត្ថុអនុស្សាវរីយ៍ទៅវិញទៅមកផងដែរ ។
