សោភ័ណភាពតំបន់អភិរក្សក្រុងបាត់ដំបង ចាប់ផ្ដើមលេចចេញរូបរាងជាបណ្ដើរៗហើយ ក្រោយមានការសហការពីប្រជាពលរដ្ឋ នឹងរដ្ឋបាលខេត្ត
បាត់ដំបង៖ សោភ័ណភាពនៃតំបន់អភិរក្សក្រុងបាត់ដំបង មកទល់នឹងថ្ងៃទី០២ ខែសីហា ឆ្នាំ២០២២ បានចាប់ផ្ដើមលេចចេញនូវរូបរាងជាបណ្ដើរៗហើយ ក្រោយពីមានការសហការចូលរួមពីប្រជាពលរដ្ឋជាមួយនឹងរដ្ឋបាលខេត្តបាត់ដំបង និងរដ្ឋបាលក្រុងបាត់ដំបង ក្នុងការកាត់សំយ៉ាបផ្ទះ និងផ្ទាំងប៉ាណូផ្សព្វផ្សាយពាណិជ្ជកម្មធំៗ ដែលបិតបាំងអគារបុរាណដែលមានអាយុកាលរាប់សិបទស្សវត្សន៍មកនេះ ។
គួរបញ្ជាក់ផងដែរថា ការរៀបចំរុះរើសំយ៉ាប ផ្ទាំងប៉ាណូពាណិជ្ជកម្មទាំងអស់នេះ និងធ្វើការកែសម្រួលជំនួសមកនូវសំយ៉ាបផ្ទះ និងផ្ទាំងពាណិជ្ជកម្មទៅតាមគោលការណ៍របស់រដ្ឋបាលខេត្តបាត់ដំបងដែលបានកំណត់ ។ រដ្ឋបាលខេត្តបាត់ដំបងនឹងបន្តធ្វើការរៀបចំសោភ័ណភាពក្រុងបាត់ដំបងជាជំហានៗនាពេលបន្តបន្ទាប់ទៀត ។
ឯកឧត្តម សុខ លូ អភិបាល នៃគណៈអភិបាលខេត្តបាត់ដំបង បានមានប្រសាសន៍ថ្លែងអំណរគុណយ៉ាងជ្រាលជ្រៅដល់ប្រជាពលរដ្ឋដែលរស់នៅក្នុងតំបន់អភិរក្សទាំងអស់ ចំពោះស្មារតីចូលរួមចំណែកក្នុងការរុះរើសំយ៉ាបផ្ទះ ផ្ទាំងប៉ាណូពាណិជ្ជកម្មធំ ដើម្បីត្រៀមទទួលយកប្លង់មេរួមមួយតាមការណែនាំរបស់រដ្ឋបាលខេត្តបាត់ដំបង ដើម្បីឱ្យទីក្រុងបាត់ដំបងកាន់តែមានសោភ័ណភាពស្រស់ស្អាត និងអាចស្រូបទាញនូវភ្ញៀវទេសចរណ៍ជាតិ និងអន្តរជាតិមកទស្សនា រូបរាងពេញលេញនូវអគារបុរាណដែលបន្សល់ទុកពីសម័យអាណានិគមនិយមបារាំង និងដើម្បីប្រកួតប្រជែងជាទីក្រុងស្អាតអាស៊ានផងដែរ ៕
