បរទេស៖ បើតាមការចេញផ្សាយដោយទីភ្នាក់ងារសារព័ត៌មាន Reuters អនុប្រធានាធិបតីអាមេរិក លោក JD Vance នៅថ្ងៃព្រហស្បតិ៍ ទី១៨ ខែមិថុនា ឆ្នាំ២០២៦ បានរិះគន់បកទៅនឹងការរិះគន់របស់អ៉ីស្រាអែល ចំពោះកិច្ចព្រមព្រៀងអ៉ីរ៉ង់ ដោយនិយាយថាលោកប្រធានាធិបតី ដូណាល់ ត្រាំ គឺជាសម្ព័ន្ធមិត្តតែមួយគត់របស់អ៉ីស្រាអែលដែលទទួលបានជំនួយយោធាពីសហរដ្ឋអាមេរិករាប់ពាន់លានដុល្លារក្នុងមួយឆ្នាំៗ។
ការកត់សម្គាល់របស់លោក JD Vance ធ្វើឡើងក្នុងគ្រាដែលរដ្ឋបាលលោក ត្រាំ ការពារកិច្ចព្រមព្រៀងបិទបញ្ចប់សង្រ្គាមជាមួយអ៉ីរ៉ង់ និងជាការឆ្លើយតបទៅនឹងការសាកសួរអំពីសេចក្ដីរាយការណ៍ថានាយករដ្ឋមន្ត្រីអ៉ីស្រាអែល លោក Benjamin Netanyahu ខឹងសម្បារចំពោះកិច្ចព្រមព្រៀងជាមួយអ៉ីរ៉ង់។
លោក Vance បាននិយាយថា លោកមិនបានស្ដាប់ឮការរិះគន់ផ្ទាល់ចេញពីមាត់លោក Netanyahu ប៉ុន្តែលោកបានរិះគន់មន្ត្រីមួយចំនួនក្នុងជួរគណៈរដ្ឋមន្ត្រីអ៉ីស្រាអែលដែលលោកនិយាយថាបានវាយប្រហារពាក្យសម្ដីលើកិច្ចព្រមព្រៀង និងលោក ត្រាំ។
«ជាសាររបស់ខ្ញុំទៅកាន់ពួកគេ នោះគឺលោក ត្រាំ ជាប្រមុខរដ្ឋតែមួយគត់នៅលើពិភពលោកដែលមានសមានចិត្តទៅនឹងប្រជាជាតិអ៉ីស្រាអែលក្នុងកាលៈទេសៈសព្វថ្ងៃ»។ នេះជាការគូសបញ្ជាក់របស់លោក JD Vance ដោយបន្ថែមថាប្រសិនបើខ្ញុំជាសមាជិកក្នុងគណៈរដ្ឋមន្ត្រីអ៉ីស្រាអែល ខ្ញុំនឹងមិនរិះគន់ ឬប្រឈមមុខជាមួយសម្ព័ន្ធមិត្តមួយមានអំណាចដ៏ខ្លាំងក្លាមួយ ដែលឈរនៅខាងអ៉ីស្រាអែលនោះទេ។
គួរបញ្ជាក់ថា សហរដ្ឋអាមេរិកបានផ្ដល់ជំនួយយោធាឱ្យអ៉ីស្រាអែលជិត ៤ពាន់លានដុល្លារក្នុងមួយឆ្នាំ ហើយក៏តែងតែប្រើសិទ្ធិអំណាចវេតូរបស់ខ្លួននៅ អង្គការសហប្រជាជាតិដើម្បីការពារអ៉ីស្រាអែលពីការរិះគន់ ឬថ្កោលទោសទាំងឡាយផងដែរ៕
