ឯកឧត្ដម សូ ខនឬទ្ធិគុណ ដឹកនាំយុវជន ស.ស.យ.ក វិស័យបរិស្ថាន ដាំដើមកោងកាង ២០២២ដើម នៅសហគមន៍ត្រពាំងសង្កែ ក្នុងខេត្តកំពត

ភ្នំពេញ៖ នាពេលថ្មីនេះ ឯកឧត្ដម សូ ខនឬទ្ធិគុណ រដ្ឋលេខាធិការ ក្រសួងបរិស្ថាន បានដឹកនាំយុវជន ស.ស.យ.ក. វិស័យបរិស្ថាន ចូលរួមដាំដើមកោងកាងចំនួន ២០២២ដើម នៅសហគមន៍ត្រពាំងសង្កែ ក្នុងភូមិសាស្រ្តខេត្តកំពត។

ឯកឧត្ដម សូ ខនឬទ្ធិគុណ បានលើកឡើងថា ព្រឹត្តិការណ៍នាពេលនេះ បានចូលរួមពីតំណាងរដ្ឋបាលខេត្តកំពត មន្ទីរបរិស្ថានខេត្តកំពត តំណាងក្រុមហ៊ុន HEINEKEN និងយុវជន ស.ស.យ.ក. វិស័យបរិស្ថានជាច្រើនរូបចូលរួម ដើម្បីអបអរសារទរ ក្នុងពិធីបុណ្យរុក្ខទិវា ហើយជាយន្តការសម្រាប់បញ្ជ្រាបការយល់ដឹងអំពីសារៈសំខាន់ និងផលប្រយោជន៍របស់ដើមកោងកាង ក៏ដូចជា ព្រៃឈើ ជួយដល់ការការពារគ្រោះមហន្តរាយធម្មជាតិ ក៏ដូចជាការបំផុសគំនិតដល់យុវជន និងសាធារណជនទាំងអស់ឱ្យចូលរួមស្រឡាញ់ និងការពារអភិរក្សធនធានធម្មជាតិបន្ថែម។

គួរបញ្ជាក់ថា ការដាំដើមកោងកាងនេះ បានចូលរួមយ៉ាងសំខាន់ក្នុងការអភិរក្សធនធានធម្មជាតិ និងកាត់បន្ថយគ្រោះមហន្តរាយធម្មជាតិផ្សេងៗ។ ព្រោះដើមកោងកាងជាអង្គរក្សសមុទ្រដ៍សំខាន់ ក្នុងការទប់ស្កាត់ខ្យល់ព្យុះ ទឹកជំនន់ បង្កើនទីជម្រកដល់ជីវៈចម្រុះទាំងអស់ ក៏ដូចជាការស្តារសេដ្ឋកិច្ច-សង្គម ជូនដល់ប្រជាជនតាមសហគមន៍ និងជាប្រជានេសាទ ដែលរស់នៅ និងប្រកបរបរនៅតាមតំបន់ឆ្នេសមុទ្រកម្ពុជា។

ការដាំស្តារព្រៃឡើងវិញ ជួយបង្កើនគម្របព្រៃឈើដែលជាទីជម្រកដ៏សំខាន់របស់ជីវៈចម្រុះ ដើម្បីចូលរួមអភិរក្សពូជមច្ឆាជាត់ ជាពិសេសកាត់បន្ថយផលប៉ះពាល់បរិស្ថាន និងសង្គម៕