ភ្នំពេញ៖ នៅថ្ងៃទី២៣ ខែមេសា ឆ្នាំ២០២៦នេះ កាកបាទក្រហមកម្ពុជា ដែលមាន សម្តេចព្រះមហាក្សត្រី ព្រះវររាជមាតាជាតិខ្មែរ ជាព្រះប្រធានកិត្តិយស និង សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធាន បានផ្តល់អំណោយមនុស្សធម៌ជាលើកទី៦ រួមមានគ្រឿងឧបភោគបរិភោគ សម្ភារប្រើប្រាស់ និងថវិកាមួយចំនួន ជូនដល់អង្គការផ្ទះបាយកុមារ សម្រាប់ជួយផ្គត់ផ្គង់ការហូបចុក និងការសិក្សារៀនសូត្ររបស់កុមារកំព្រា កុមារក្នុងគ្រួសារក្រីក្រ កុមាររើសអេតចាយ កុមារ សុំទាន កុមារខាត់ស្បែកជើងប្រមាណ ២០០នាក់ បុគ្គលិក ៦ និងយុវជនស្ម័គ្រចិត្ត ១០នាក់ នៃអង្គការផ្ទះបាយកុមារ ដែលពិធីនេះប្រព្រឹត្តទៅក្រោមអធិបតីភាព លោកជំទាវ ពុំ ចន្ទីនី អគ្គលេខាធិការ កាកបាទក្រហមកម្ពុជា ស្ថិតនៅបរិវេណសាលាបឋមសិក្សាជ័យជំនះ ក្នុងសង្កាត់បឹងកេងកង៣ ខណ្ឌបឹងកេងកង រាជធានីភ្នំពេញ។
លោកស្រី ឈីវ ភិរម្យ ប្រធានអង្គការផ្ទះបាយកុមារ បានមានមតិស្វាគមន៍ និងជម្រាបជូនអំពីសកម្មភាពរបស់អង្គការដែលបានធ្វេីចាប់តាំងពីឆ្នាំ២០១០ មក គឺក្នុងគោលបំណងឱ្យកុមារក្រីក្រ កុមាររើសអេតចាយ កុមារសុំទាន កុមារខាត់ស្បែកជើង លក់លៀស លក់ខ្ចៅខ្យង លក់ផ្កា លក់អំពៅ បានទទួលអាហារ ហូបឆ្អែត បានសម្អាតខ្លួន បានសម្រាក បានលេង បានអាន បានសរសេរ បានកាត់សក់ កាត់ក្រចក ងូតទឹក ជួយជំរុញកុមារឱ្យចូលរៀនដោយផ្តល់សម្លៀកបំពាក់ សម្ភារសិក្សា ជាដើម។
លោកស្រីបញ្ជាក់ថាសព្វថ្ងៃនេះមានកុមារប្រមាណជាង ៨៦៣នាក់ ទទួលសេវាពីអង្គការផ្ទះបាយកុមារ។ ជាក់ស្តែងព្រឹក នេះមានកុមារប្រមាណ២០០នាក់ ដែលមកចូលរួមដោយផ្ទាល់។ លោកស្រីបន្តថា អង្គការផ្ទះបាយកុមារមិនត្រឹមតែជួយដល់កុមារនោះទេ ប៉ុន្តែបានជួយឧបត្ថម្ភអង្ករដល់គ្រួសារកុមារ ចំនួន៤២៤ គ្រួសារ ផងដែរ។
មានប្រសាន៍សំណេះសំណាលនាឱកាសនោះ លោកជំទាវ ពុំ ចន្ទីនី អគ្គលេខាធិការ កាកបាទក្រហមកម្ពុជា បានសម្តែងនូវក្តីរីករាយដោយបានអញ្ជើញមកដល់អង្គការផ្ទះបាយកុមារសារជាថ្មីម្តងទៀត និងបានពាំនាំនូវប្រសាសន៍សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដែលផ្តាំផ្ញើសួរសុខទុក្ខ និងថ្លែងអំណរគុណយ៉ាងជ្រាលជ្រៅចំពោះ អង្គការផ្ទះបាយកុមារ ជាពិសេសលោកគ្រូ អ្នកគ្រូ បុគ្គលិក យុវជនស្ម័គ្រចិត្ត ដែលជួយមើលថែទាំ ផ្តល់ភាពកក់ក្តៅ ផ្តល់ការ សិក្សាអប់រំ និងផ្តល់ការហូបចុកដល់កុមារ ដែលនេះជាការជួយសម្រាលបន្ទុកដល់ក្រុមគ្រួសាររបស់កុមារ និងសូមបន្តនូវសកម្មភាពដ៏ល្អមួយនេះដើម្បីអនាគតកុមារទាំងនេះ។ ជាមួយគ្នានេះ សូមក្មួយៗចៅៗទាំងអស់ ត្រូវចេះស្រឡាញ់គ្នា ជួយគ្នាទៅវិញទៅមក មានសុជីវធម៌ល្អ ចេះគោរពចាស់ទុំ ពិសេសត្រូវខិតខំសិក្សារៀនសូត្រ ដើម្បីក្លាយជាធនធានមនុស្សសម្រាប់ចូលរួមអភិវឌ្ឍសង្គមជាតិឱ្យកាន់តែរីកចម្រេីន ។
លោកជំទាវលើកឡើងថា ចៅៗទាំងអស់នៅទីនេះជាអ្នកមានសំណាងល្អ ព្រោះកេីតមកមានរូបរាងល្អ មានកាយសម្បទា ល្អ និងសតិល្អ ដូចនេះចៅៗត្រូវតែយកចិតទុកដាក់ថែទាំសុខភាពឱ្យល្អ ទាំងផ្លូវកាយ និងផ្លូវចិត្ត ឱ្យបានរឹងមាំល្អ គឺត្រូវមានអនាម័យជានិច្ចក្នុងការរស់នៅ រៀបចំផ្ទះសម្បែងឱ្យបានស្អាត និងលាងសម្អាតដៃជាមួយសាប៊ូ ព្រមទាំងបរិភោគអាហារឱ្យបានត្រឹមត្រូវ កុំផ្អែមពេក កុំប្រៃពេក កុំខ្លាញ់ពេក អាហារកំប៉ុងច្រើនពេក ការផឹកគ្រឿងស្រវឹង និងការជក់បារីជាដើម ដើម្បីអាចជៀសផុតពីជំងឺមិនឆ្លងសំខាន់ៗចំនួន៤រួមមាន ជំងឺទឹកនោមផ្អែម ជំងឺបេះដូងសសៃឈាម ជំងឺមហារីក និងជំងឺរលាកផ្លូវដង្ហើមរាំរ៉ៃ ដែលកំពុងប្រឈមក្នុងចំណោមប្រជាពលរដ្ឋទូទៅ នាពេលបច្ចុប្បន្ន។ ទន្ទឹមនេះសូមចៅៗ បន្តប្រាប់ដល់ឪពុកម្តាយ បងប្អូនដែលរស់នៅជាមួយ មិត្តភក្តិនៅក្នុងសាលា អ្នក ស្គាល់ អំពីបញ្ហាសុខភាពដូចជា មិនប្រៃពេក មិនខ្លាញ់ពេក មិនផ្អែមពេក មិនពិសារគ្រឿងស្រវឹង ជាដេីម ។ ក្នុងឱកាសនោះលោកជំទាវ អគ្គលេខាធិការ បានជូនពរចៅៗទាំងអស់មានសុខភាពល្អ រៀនពូកែ និងសុខសប្បាយទាំងអស់គ្នា។
សូមបញ្ជាក់ថា អំណោយមនុស្សធម៌លេីកទី៦ ដែលឧបត្ថម្ភជូនអង្គការផ្ទះបាយកុមារពេលនេះរួមមាន៖ អង្ករ ២តោន, អង្ករសុខភាព ១០កេស, មី ២០កេស, ត្រីខ ៣កេស, ប្រេងឆា ៣កេស(មួយកេសស្មើ១២ដប), ឆៃពៅ ២០កំប៉ុង, ទឹកត្រី១០យួរ, ទឹកស៊ីអ៊ីវ ១០យួរ, ទឹកបរិសុទ្ធ ១០កេស, ទឹកក្រូច ១០កេស, សាប៊ូកក់សក់ ៤កេស, សាប៊ូដុសខ្លួន ៤កេស, ម៉្សៅសាប៊ូ ៤កេស និងថវិកា ១០លានរៀល ព្រមទាំងផ្តល់ជូនអាហារសម្រន់១ប្រអប់ (ភ្លៅមាន់២ដុំ ក្រូចខ្វិច ១ផ្លែ)។ ដោយស្បៀងសម្ភារ:ថវិកានេះ ជាអំណោយរបស់សប្បុរសជនតាមរយៈកាកបាទក្រហមកម្ពុជា។
សូមជម្រាបជូនដែរថា សកម្មភាពមនុស្សធម៌របស់កាកបាទក្រហមកម្ពុជា នៅអង្គការផ្ទះបាយកុមារ នៅថ្ងៃនេះក៏ដូចជានៅតាមមណ្ឌលកុមារកំព្រា និងអង្កការមួយចំនួន កន្លងមក គឺជាផ្នែកមួយនៃយុទ្ធនាការកៀរគររកមូលនិធិក្នុងឱកាសទិវា ៨ ឧសភា ដើម្បីបង្ហាញជូនសប្បុរសជននូវថវិកាដែលបានទទួលពីសប្បុរសជន គឺតែងតែបានទៅដល់ដៃអ្នករងគ្រោះបំផុត និងអ្នកដែលត្រូវការឱ្យជួយ។ ដូចនេះក្នុងឱកាសទិវា ៨ ឧសភា ២០២៦ កាកបាទក្រហមកម្ពុជា បន្តអំពាវនាវដល់សប្បុរសជនពីគ្រប់មជ្ឈដ្ឋានសូមអញ្ជើញចូលរួមបរិច្ចាគនូវធនធាននិងថវិកាតាមសទ្ធាជ្រះថ្លានិងតាមការស្ម័គ្រចិត្ត ដើម្បីឱ្យកាកបាទក្រហមកម្ពុជា មានលទ្ធភាពបំពេញបេសសកកម្មមនុស្សធម៌បន្ត។ មួយវិញទៀតតាមរយៈការចូលរួមឧបត្ថម្ភគាំទ្រសកម្មភាពមនុស្សធម៌ ជាមួយកាកបាទក្រហមកម្ពុជា គឺពិតជាមានគុណតម្លៃណាស់ក្នុងការលើកកម្ពស់ស្មារតីវប្បធម៌នៃការចែករំលែក ដែលជាការផ្សារភ្ជាប់រវាងសប្បុរសជនជាមួយអ្នកទទួលផលជាក់ស្តែង៕
