ឥណ្ឌូណេស៊ី៖ មនុស្ស៨នាក់បានស្លាប់ នៅក្នុងហេតុការណ៍គ្រោះថ្នាក់ធ្លាក់ឧទ្ធម្ភាគចក្រមួយគ្រឿង

ហ្សាការតា៖ បើតាមការចេញផ្សាយដោយទីភ្នាក់ងារសារព័ត៌មាន Reuters អាជ្ញាធរនៅក្នុងប្រទេសឥណ្ឌូណេស៊ី បានឱ្យដឹងនៅថ្ងៃសុក្រ ទី១៧ ខែមេសា ឆ្នាំ២០២៦ ថាមនុស្ស៨នាក់បានស្លាប់នៅក្នុងហេតុការណ៍គ្រោះថ្នាក់ធ្លាក់ ឧទ្ធម្ភាគចក្រមួយគ្រឿង នៅក្នុងខេត្ត West Kalimantan ខណៈក្រុមអ្នកជួយសង្រ្គោះកំពុងព្យាយាមប្រមូលសាកសព និងបំណែកឧទ្ធម្ភាគចក្រ។

ឧទ្ធម្ភាគចក្រនេះបានបាត់ការទាក់ទងកាលពីព្រឹកថ្ងៃព្រហស្បតិ៍ម្សិលមិញ បន្ទាប់ពីហោះឡើងពីតំបន់ក្នុងទីក្រុង Melawi។ លោក Mohammad Syafii ជាប្រធាន ទីភ្នាក់ងារជួយសង្រ្គោះរបស់ឥណ្ឌូណេស៊ី បាននិយាយថាទីតាំងធ្លាក់ និងដាច់ការទាក់ទងគឺស្ថិតនៅពីលើតំបន់ព្រៃភ្នំ។ លោកបន្ថែមថាក្រុមអ្នកជួយសង្រ្គោះបានរកឃើញ បំណែកដែលសង្ស័យថាជាផ្នែកកន្ទុយរបស់ឧទ្ធម្ភាគចក្រ។

ភ្លាមៗមិនទាន់មានការបញ្ជាក់ឱ្យច្បាស់ពីមូលហេតុបណ្ដាលឱ្យឧទ្ធម្ភាគចក្រខាងលើធ្លាក់នៅឡើយទេ។ តាមអាជ្ញាធរឥណ្ឌូណេស៊ី មនុស្សទាំង៨នាក់ដែលបានស្លាប់ គឺសុទ្ធតែជាអ្នកជិះនៅលើឧទ្ធម្ភាគចក្រធុន Airbus H130 ដែលរួមមានអ្នកដំណើរ៦នាក់ និងអ្នកធ្វើការនៅលើឧទ្ធម្ភាគចក្រ ២នាក់៕