ឯកឧត្តម ហង់ជួន ណារ៉ុន រដ្ឋមន្ត្រីអប់រំ អញ្ជើញបើកការតាំងពិព័រណ៍អប់រំស្នាដៃ ស្រាវជ្រាវរបស់គរុនិស្សិតកម្រិតឧត្តមសិក្សា ជំនាន់ទី២៦

ភ្នំពេញ៖ ពិធីបើកការតាំងពិព័រណ៍អប់រំស្នា ដៃស្រាវជ្រាវរបស់គរុនិស្សិតកម្រិតឧត្តមសិក្សា (បរិញ្ញាបត្រ+១) ជំនាន់ទី២៦ ឆ្នាំសិក្សា២០២១-២០២២ មានរយៈពេល២ថ្ងៃ ចាប់ពីថ្ងៃទី៧ ដល់ថ្ងៃទី៨ ខែកក្កដា ឆ្នាំ២០២២ ដោយមានគរុនិស្សិតចូលរួមស្រាវជ្រាវចំនួន១២០៤នាក់ លើ១៩មុខវិជ្ជាឯកទេស មាន២០៤ប្រធានបទ។

សារៈសំខាន់នៃការតាំងពិព័រណ៍នេះ ក្នុងគោលបំណងជំរុញឱ្យគរុនិស្សិត មានការយល់ដឹងពីតម្លៃនៃការផលិតសម្ភារឧបទេសសម្រាប់បង្រៀន និងរៀន ធ្វើឱ្យខ្លឹមសារមេរៀនមានលក្ខណៈងាយស្រួលយល់បានស៊ីជម្រៅ ធ្វើឱ្យគរុនិស្សិតចាប់អារម្មណ៍ និងចូលរួមការស្រាវជ្រាវ ចេះសហការធ្វើការជាក្រុម បង្កើតស្មារតីសាមគ្គីភាព យល់ពីតម្លៃសមូហភាព គ្មានគំនិតអាត្មានិយម បណ្តុះគរុនិស្សិតឱ្យមានគំនិតច្នៃប្រឌិតខ្ពស់ក្នុងការបង្រៀន ។

ពិធីនេះបានប្រព្រឹត្តទៅក្រោមអធិបតីភាព ឯកឧត្តមសភាចារ្យ ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា ឯកឧត្តម លោកជំទាវ ថ្នាក់ដឹកនាំក្រសួង សាស្រ្តាចារ្យ លោកគ្រូ អ្នកគ្រូ និងគរុនិស្សិត ជាច្រើនរូបទៀត។ ក្នុងឱកាសនោះឯកឧត្តមណ្ឌិតសភាចារ្យ បានវាយតម្លៃខ្ពស់ចំពោះវិទ្យាស្ថានជាតិអប់រំ ដែលបានរៀបចំឱ្យមានការតាំងពិព័រណ៍នេះឡើង ធ្វើឱ្យប្អូនៗគរុនិស្សិត ទទួលបាននូវចំណេះដឹងថ្មីៗបន្ថែមទៀត ឯកឧត្តមបានបញ្ជាក់ថា គុណភាពគ្រូបង្រៀន គឺជាគុណភាពវិស័យអប់រំ ជាអនាគត និងជាសរសរទ្រូងរបស់ប្រទេសជាតិ។

ក្រសួងអប់រំបានដាក់ចេញនូវការធ្វើកំណែទម្រង់វិស័យអប់រំ ក្នុងនោះផ្នែកមួយដ៏សំខាន់ គឺការលើកកម្ពស់គុណភាពគ្រូបង្រៀនតាមរយៈការអនុវត្តគោលនយោបាយគ្រូបង្រៀន ទាក់ទាញសិស្ស និស្សិត ដែលមានសមត្ថភាពខ្ពស់ ចូលបម្រើការងារគ្រូបង្រៀន ការកែលម្អលក្ខខណ្ឌការងារគ្រូបង្រៀន និងបង្កើនប្រាក់បៀវត្សរ៍ជូនគ្រូបង្រៀនជាដើម។

ឯកឧត្តមរដ្ឋមន្ត្រីបានបញ្ជាក់ថា វិជ្ជាជីវៈស្តង់ដាគ្រូបង្រៀន ត្រូវទាមទារឱ្យគ្រូបង្រៀនមានចំណេះដឹងទូលាយ ទាំងផ្នែកវប្បធម៌ទូទៅ សីលធម៌រស់នៅល្អ មានចិត្តសាស្ត្រគរុកោសល្យ ដូចផ្នែកជំនាញ និងមានការស្រាវជ្រាវបន្ថែមជាប្រចាំ លើចំណេះដឹងឱ្យកាន់តែស៊ីជម្រៅ លើខ្លឹមសារមេរៀនកាន់តែល្អប្រសើរ ការប្រតិបត្តិវិជ្ជាជីវៈគ្រូបង្រៀនមិនមែនត្រឹមតែចេះដឹងនូវខ្លឹមសារមេរៀនប៉ុណ្ណោះទេ តែត្រូវស្គាល់បញ្ហា នៃកាវិវត្តន៍របស់សិស្ស ត្រូវយល់ដឹងពីចិត្តគរុកោសល្យ ស្វែងយល់ពីវិធីសាស្រ្តបង្រៀននៅសាលារៀនជំនាន់ថ្មី ដែលកំពុងត្រូវបានអនុវត្តនូវវិធីសាស្រ្តបង្រៀនទំនើបថ្មីៗ ដើម្បីបណ្តុះបំណិនសតវត្សរ៍ទី២១ ដូចជាបំណិនត្រិះរិះពិចារណា ដោះស្រយបញ្ហា ធ្វើការងារជាក្រុម នវានុវត្តន៍ រួមទាំងចំណេះផ្នែកបច្ចេកវិទ្យាផ្សេងៗទៀត។ បន្ទាប់ពីបញ្ចប់ការថ្លែងសន្ទរកថា គណៈអធិបតី បានអញ្ជើញទស្សនាពិព័រណ៍ជាស្នាដៃគរុនិស្សិតតាមមុខវិជ្ជា៕